ZEFANIA 3 - AMÜSA BAIBEL (BSI)

Jerusalem Amünyi ko Akhümcho

¹ Jerusalem, achangba, abürü nyitsarü nyüpmüsehba yangdi, ahohah!

² Abinü Abüdongba te yocho mühnyirü ko thsingyucho mükhyüchore. Abüdongba chah mülonglang mahkhang Abi arüku müching.

³ Abi adirüti tsü kangdi kyo rengre; abi yukharü tsü nyangnyü khüu chii arühlungrü mii müpehjüba amünyo rangfü kyole.

⁴ Azikehrü tsü longmülangba ko akihyochürü; bebürünü Amüsa tsü münyijüre ko arühbürü tsanung phi Tsingrangba yuzeng khyümüla bichire.

⁵ Ta Abüdongba tsü yangdila lile; Abinü khodesü amüthsalang münguchire. Nyangnyü mükhu müyurü khyang mütiphehpü yuje hirojüre. Ta amümüsarünü mütozah amütsa nguchire ko müshahre.

⁶ Abüdongba-nü yore, “Ihnü alimih apüm wohpehko; Ihnü arüh yangditi thsangnyangjücho ko arüh tbü ko roshengvi khülusohko. Yangdi tsishoko; yanglong adeng, süsü mühle.

⁷ Hütsükhang, I müyurünü I jengreng drünung ko I thsingyucho nyinung ko I docho arühnü khodesü münbüchünungepü Ihnü lümcho. Ta tunyah müli amüngu roh-i arühnü amütsa du bichicho.

⁸ “Abüdongba-nü yocho, “Ying, Ihnü yuchoti mülangjüba nengdang ying. I rihlong zii arüh khyang müdhesohnung yuchoti ko yangditi nübülungnung Ihnü dhrongchehko. I rihlong michangnü lihküp changjünung.

⁹ “Hütsüde Ihnü yuchoti thsamülajünung, ko I chah khu aparü tsingrang te müdangkhidangnangsohnung. Arüh atümungnü Iyu nyinung.

¹⁰ Ashula liba Ethiopia la tsipitsiza liba I nyitsarünü I khyang amübü hirojünung.

¹¹ Hütsütade, nührü I müyurünü Ih nyümcho nengdang müshahsohnung. Amüthseh ko ahongzi atümung Ihnü khyümüinung ko I Amüsa khang chah nührünü khodesü Ih nyüm müyanung.

¹² Hütsüla alonglüm ko aküna nyitsarü I arüku yangchirü lisohnung.

¹³ Amütrüh Israelrü sütesü amütsa münguchinung, arahkheh müchonung, mahkhang kihyochünung mümüküpnung. Arüh süsü müdrüpü müwajü khümcho linung.”

Akünyang Khi

¹⁴ Israelrü, akünyangnü züde khi thsaang! Jerusalem! Nü lasih apümnü künyang!

¹⁵ Abüdongba-nü nü akhingchi changkajüko; Abinü nü rorüh apüm khyükhujüko. Abüdongba Israel Tsingrang nührü te lile; adelü tu adrünung mühle.

¹⁶ “Zion yangdi, tüdrü! Nü kheh tükyah pü arühnü Jerusalem te yonung nyümong role.

¹⁷ Abüdongba Tsingrang nührü te lile; Abi ziinü akoh jüre. Abüdongba-nü nü chah künyangnung, ko Abi amüila nü khyang akang asi jünung.

¹⁸ Nyitsarünü thsütila künyangcho kyo Abinü nü khyanglangnü khi thsanung ko künyangnung.” Abüdongba-nü yore, “Ihnü nührü chokehchola ko ashah khyümüijüko.

¹⁹ Bekhyah tsü tsehle! Nüh sehchirü Ihnü khingchinung, Jahloh-hilohrü khümchonung ko yangpirü noronung. Arüh ashah khyünü adhichi kangsohnung, ko lihküprünü arüh senung.

²⁰ Bekhyah tsü tsehle! Tsisho liba müyurü Ihnü noronung; limih la Ihnü nüh anengkhong kangsohnung ko nüh thali müwajünung.” Abüdongba-nü choko.