ZEFANIA 2 - AMÜSA BAIBEL (BSI)

Lasih Thsamülanung Akihchiba

¹ Ashahmükeh yucho, yungpi roh-i mükutpah müsüde,

² Abüdongba nührü chah mürode, Abi rihlong chüro nyümong müchihde, nührü Abi yang rung.

³ Nührü limih la alonglümrü ko Abi yuzeng nyirüti, Abüdongba yang rung. Yuje tsü nguching ko Abüdongba bete nührü jangjang longlüm. Abüdongba zichüro nyümong akhingchi lanü nührü tsiphunungsü kohle.

Israel Mükang Yuchoti Akhingchi

⁴ Gaza yangdila süsü münyingnung. Ashkelon tsishonung. Ashdod-rü nyümong achangshola iipehnung, ko Ekronrü arüh yangdi lanü iipehnung.

⁵ Nührü Filistiarü nührü kihbekhümla lirüti ahohah. Abüdongba-nü nührü yu khapehko. Abinü nührü changjünung, ko nührü süsü münyingnung.

⁶ Kihdi müshüm nührü lih tsü san nyahrü kuh ko san kuh zeh jungchah kangnung.

⁷ Amütrüh Judarünü nührü lih khyünung. Arüh santi hütsüla lamungsohnung ko Ashkelon-rü kuh la yüpnung. Abüdongba arüh Tsingrang arüh te linung ko arüh thali amüwa kangsohnung.

⁸ Akohba Abüdongba-nü yore, “Moab ko Amon-rünü I nyitsarü mükhimüngu mütichicho, ko arüh lih rohcho khyünungepü müthsehmülacho Ihnü yuchicho.

⁹ Ih akang liba Israel Tsingrang thsachonü, Sodom ko Gomora roh-i Moab ko Amon changjünung Ihnü yuchümre. Lede nengdang trümtipü chiti liba mii shukuh müdüm kyo kangnung. I nyitsarü amütrühnü arüh kohcheh arüh lih khyüjünung.”

¹⁰ Hütsüta Moab ko Amon-rü arüh müthseh ko mülahmüshicho ko Akohbong Abüdongba müyurü nyüpmüsehcho ngang arüh khingchinung.

¹¹ Abüdongba-nü arüh drümüyangsohnung. Abinü limih tsingrangti adeng kangsohnung ko yucho atümungnü arühbürü lih la abi mübünung.

¹² Abüdongba-nü Ethiopia nyitsarüsü süsohnung.

¹³ Abüdongba-nü ataseh bichi Assyria changjünung. Abinü Nineve yang apehcho ko kih müliba lipilih yangdi kangsohnung.

¹⁴ Hütsü kanglungrü lüpcho mungji kangsohnung. Yangpeh la tsü bhohphu mungnung ko kukhitpeh lanü khongnung. Khüyahlanü trahtri ying lanü khongnung. Cedar Singnü thsaba kuh tsü trümnah tsinung.

¹⁵ Hütsüta apu dümpipü khümchonung lümba yangdila tsü tikehnung. Hütsüla nyitsarünü arüh yangdi tsü adiubaepü lümre. Yangpeh tsü rangmü kanglungrü mungji ko anaying kangnung. Alahkhurü atümungnü adrüchonü ximüla tsinung.