YUSE ATSA LUK 7 - AMÜSA BAIBEL (BSI)

Jisu-nü Roman Rothsazirü Kulirü Kyangjücho

¹ Jisu-nü nyitsarütite yu hiri apüm yokhangpü abi Kapernaum lang wücho.

² Hütsüla Roman rothsazirü khüdu kulirü sü abinü dee müi licho, hütsüvi tsü asünungthsa füdhsa licho.

³ Adibong tsünü Jisu nengdang yuchide, abinü Jihudarü azirü khürü müthehnü ro abi kuliba kyangjüng pü tsingdhingnung wüsohcho.

⁴ Arühnü Jisu yanglang ro abi te kihchi yocho, “Hiba nyitsarünü nü arüku ngunung alenge.

⁵ Abinü ihrü nyitsarü dee müire ko ihrü khyang Sinagog-sü thsajüko.”

⁶ Achotsü Jisu-nü arüh yola wücho. Abi kuh chihnungthsade adibong tsünü abi shangrüti abi yang müthehnü yocho, “Adirü, nüh tülongmüzi. Nüh I kulang ronungthsa Ih müdekheng,

⁷ mahkhang nü yanglang Ipu ronungsü I jangjang müdekheng lümre. Yah yuzeng du jüng, ko I kuliba tsü kyangpehnung.

⁸ Ih miinü I pohki rothsarü yohpüpü yuzeng pohki tase bichirü nyüh khüdu. Ihnü khüdu te, ‘Wüng’ khang abinü würe; ko khüu te ‘Rung’ khang abinü rore; ko Ihnü I yurü te, ‘Hi nguching’ khang abinü hütsü nguchire!”

⁹ Hi yuchide Jisu nyemüyangcho; ko abinü ximüla abi khanglang rorüh amülungte yocho, “Ihnü nührü te yore, Israel la Ihnü hiroh-i yudsi khodesü müngudhing!”

¹⁰ Yusi hirüti tsü thali adibong kulang wüdelü kuliba tsü kyangpü licho.

Jisu-nü Chomirü khüdu Tsurü Kanglisohcho

¹¹ Tunyah mülipü Jisu-nü yangdi khüdu anengnü Nain lang amonoti ko sühdi amülahnü müyang wücho.

¹² Abi yangdi tbükhüm chihyeng, merang würü ro mütohcho. Asüba nyitsarü tsü chomitpü tsurü hütsü du thsacho, ko amülung arangcheh yangdila tsünü abükyü te iiwücho.

¹³ Abüdongba-nü abükyü ngude, alasih la abükyü nengdang dhsa lümcho, ko abinü abükyü te yocho, “Tütra.”

¹⁴ Hütsüpü abinü wünü kong chah tsü thahpücho, ko me dhirü tsünü yajücho. Jisu-nü yocho, “Dhrezaba! Ihnü nüte yore, Shemüsung!”

¹⁵ Asüba nyitsarü tsü shemüsu pümcho ko chotanung dikehcho, ko Jisu-nü abi atpa khyang jücho.

¹⁶ Arüh atümung adrünü jeng Tsingrangba secho. “Ihsa yola azikehrü amülah khüdu chüroko! Tsingrangba amüyurü khümchonung ro lile!”

¹⁷ Jisu nengdang yusi tsü Judea lih ko mükangmüshü apümlang sobhocho.

Baptijüba Johan Chahnü Yusi Hirü

¹⁸ Khode Johan te amonotinü hiri apüm nengdang yocho, abinü arüh nyüh anyüh dsicho

¹⁹ ko Abüdongba te hita tsingdhingnung müthehcho, “Aronung liba tsü nüh a mahkhang aparü khürü yingnung?”

²⁰ Khode arühnü Jisu yanglang rocho, arühnü yocho, “Baptijüba Johan-nü aronung liba tsü nüh a mahkhang aparü khüdu yingnung pü tsingdhingnung nüh yang ihrü müthehchoe.”

²¹ Hütsü shikhela tsü Jisu-nü füdhsa, dhsara ko amünyi nbünü rangcho nyitsarü adrong kyangjücho, ko nahtohrü adrong ngusohcho.

²² Abinü Johan yusi hirüti te lalingcho, “Thali wüng ko nührünü tu ngucho ko yuchicho hütsü Johan te young: nahtohrünü ngure, jingjahrünü tsehchehre, mübhira kehrü müsachehre, nangtbengrünü yuchire, asürü kanglisohre, ko yuse atsa tsü ailümrü te thsingyure.

²³ Sürünü I nengdang tu tütohnyünyeh müliro arüh akünyangnung!”

²⁴ Johan yusi hirüti tsiko khanglang, Jisu-nü Johan nengdang amülung te chonung dikehcho: “Nührünü lipilih lang tu dhingnung wücho? Thohva nyübongnü füchi yacho dhingnung wücho mah-o?

²⁵ Asehyahcho jengki khyürü khüdu dhingnung wücho mah-o? Hütsütari jengki khyürü tsü yangthsarü kuh la lire!

²⁶ Nührünü tu dhingnung wücho? Azikehrü khüdu ang? Ho, yuje, ta nührünü azikehrü tenü awüu nguko.

²⁷ Tunüo Johan nengdang amüsa yunü yore: ‘Ihnü nü bekhu nü lang rungnümsohnung I yusi hirü müthehnung.’

²⁸ Jisu-nü yocho, Johan tsü lirocho nyitsarü yola atümung tenü adiu. Ta sü ninglang yanglih la azau liro abi tsü Johan tenü adiuba.”

²⁹ Nyitsarü atümungnü abi yu nyicho; arüh ko alathsa alihmüthsü dhrirüti, arühnü Tsingrangba amüsa yu nyicho ko Johan-nü arüh baptijo licho.

³⁰ Ta Farisirü ko yuzeng adorütinü arüh nengdang Tsingrangba alümcho tsü mükhyüchocho ko Johan khyang mübaptisohcho.

³¹ Jisu-nü mütozah yocho, “Ade Ihnü tu te hiba shang nyitsarü hi müjangdhingnung? Arüh tu kyoro?

³² Arüh shithsachah pümba azarüti kyole. Mülung khüdunü khüdu te züderü, ‘Ihrünü nührü nengdang kukangba khi thsacho, ta nührünü münyiichi. Ihrünü meshü khi thsacho ta nührünü mütra!’

³³ Baptijüba Johan rocho, abinü kongcho ko yongkha müyongcho ko nührünü yocho, ‘Abi chah amünyi nbü lile!’

³⁴ Nyitsarü Tsurü rocho, abinü tsucho ko yongcho ko nührünü yocho, ‘Nyitsarü hi dhing! Abi amünyomüra ko amüxüprü, alihmüthsü dhrirü ko münyirü shangrü!’

³⁵ Ta Tsingrangba lümlong tsü yuje-epü hütsü khyüchorü atümungnü ngusohre.”

Jisu Simon Kuh la

³⁶ Farisirü khüdunü Jisu yangtsunung dsiyohcho, ko Jisu-nü arüh kulang wücho ko yangtsunung nengdang pümcho.

³⁷ Hütsüba yangdila amünyilarü khüdu licho. Abükyünü Jisu tsü Farisiba kuh la yangtsu pümlepü yuchinü, axümlichi tuji alabaster füh khüdu jeng bipü ro

³⁸ Jisu khangte, ajingte tranü anahshükihnü ajing kyangjücho. Hütsüpü abükyü kuvanü ajing nipehjücho ko ajing chah müthsüpnü axümlichi tuji tsünü müyühjücho.

³⁹ Khode Farisiba tsünü hi ngucho, ajangjang lümcho, “Hiba nyitsarü hi yuje azikehrüelang, abi chah thahpüba khingkurü tsü sünang müdhebae; tunüo abükyü tsü münyilarü khüdu lile!”

⁴⁰ Jisu-nü abi te laling yocho, “Simon, Ihnü nüte lango ayonung lile.” Abinü yocho, “Youngtü, Adorü.”

⁴¹ “Alirü khüdu te thsite teerü nyüh anyüh licho,” “Nyüh khüdu thsih münga ko akhüu tsü thsi dhünyang kehcho.

⁴² Anyüh sünüsü müsahchehchonü, abinü anyüding thsite pehjücho. Hütsükhang, anyüh yola sünü abi alaa müinung?”

⁴³ Simon-nü lalingcho, “Ihnü lümchonü, sü khyang alaa pehjücho, hütsüvinü alaa müinung.” Jisu-nü yocho, “Nühnü yuje yoko.”

⁴⁴ Hütsüpü abinü khingkutpü yanglang ximülanü Simon te yocho, “Nühnü khingkurü hi münguo? Ih nü kuh la zürocho ko I jing thsütohnung nühnü kih müjü, ta abükyü nahshükihnü I jing kyangjücho ko akuvanü nikungjücho.

⁴⁵ Nühnü bemüthsüpnü Ih münüyoh, ta abinü Ih rodu I jing chah müthsüpcho müzahre.

⁴⁶ Nühnü tujinü I thah nengdang mümüyühjü, ta abükyünü axümlichi tujinü I jing müyühjüko.

⁴⁷ Hütsüeko Ihnü nüte yore, abükyünü ngusohba amüi amülah tsünü abükyü mülang khütango pehjükopü yuzi jüre. Ta sü khyang mülang azikyah pehjücho abinü amüi azikyah du ngusohre.”

⁴⁸ Hütsüpü Jisu-nü khingkutpü te yocho, “Nü münyiti pehjüko.”

⁴⁹ Aparü yangtsu chah pümrütinü arüh yola chotacho, “Amünyi mii pehjüba nyitsarü hi süo?”

⁵⁰ Ko Jisu-nü khingkutpü te yocho, “Nü yudsinü nüh khümchoko; mülümxüpü tsieng.”