YUSE ATSA LUK 6 - AMÜSA BAIBEL (BSI)

Sabath Nengdang Atsingdhingba

¹ Sabath nyümong khüdu Jisu-nü luh lahkhu tsiyacho. Amonotinü mamüphung müchahsahnü arüh müyo lanü münohpü tsucho.

² Farisirü khürünü tsingdhingcho, “Yuzengnü mümülacho tuepü nührünü Sabath nyümong nguchiro?”

³ Jisu-nü arüh te yocho, “David ko anyitsarüti yangseh lide abinü tu nguchicho hütsü nührünü mükhidhingcho do?

⁴ Abinü Tsingrangba kuh la züducho ko Tsingrangba khyang mübücho hümdhse tsü khyo tsucho, ko anyitsarüti khyangsü jücho. Hitari hümdhse tsü bebürü chah khu aparünü tsunung tsü Yuzeng nyüm lile.”

⁵ Ko Jisu-nü yocho, “Nyitsarü Tsurü tsü Sabath michah Abüdongba.”

Akheh Sücho Nyitsarü Khüdu

⁶ Sabath nyümong apa khüdu Jisu-nü Sinagog apa khüdula züdupü docho. Hütsüla akheh tsalang sücho nyüh khüdu licho.

⁷ Farisirü ko yuzeng adorü khürünü Jisu-nü Sabath nyümong kyangjü a mükyangjünang pü abi mülangjünung chehdhingyacho.

⁸ Ta Jisu-nü arüh lümcho richeh ngu nyitsarüba te tsü yocho, “Yamüsung ko belang hila rung.” Ko abinü shemüsu hütsüla yacho.

⁹ Hütsüpü Jisu-nü arüh te yocho, “Ihnü nührü te tsingdhingre: Ihsa yuzengnü Sabath nyümong tu nguchinung müla liro? Tronung a thsakehjünung? Nyüh khüdu khümchonung a mahkhang hütsü changjünung?”

¹⁰ Ko Jisu-nü arüh atümung chah dhingcho ko abi te yocho, “Nü kheh müyungchüng.” Abinü müyungchücho ko abi kheh tsapecho.

¹¹ Arüh zichüronü Jisu chah tu nguchinung pü arühbürü yola yu kitacho.

Jisu-nü Riwürü Dhüreanyüh Throchehcho

¹² Hütsü shikhela Jisu-nü akhang khüdu lang dangkhidangnangnung tuwücho ko hütsüla müyüp Tsingrangba te dangkhidangnangcho.

¹³ Nyangnyü khüu, abinü amonoti abi yanglang dsicho ko arüh dhüreanyüh throchehcho, ko arüh te abinü Riwürü pü dsicho:

¹⁴ Simon (süte Peter dsicho) ko ani Andreu; Jakob ko Johan, Filip ko Bartholomeu,

¹⁵ Mat ko Thomas, Alfaeus tsurü Jakob, ko Simon (süte yanglih müirü dsicho)

¹⁶ Jakob tsurü Judas, ko Judas Iskariot, sü kihyochüjürü kangcho.

Jisu-nü Docho ko Kyangjücho

¹⁷ Khode Jisu akhanglang tsünü riwürüti yola jürocho, abinü amonoti khütango yola angah khüdula yacho. Hütsüla nyitsarü khütango Judea lanü, Jerusalem lanü ko kihbekhüm yangditi Tyre ko Sidon lanü ro licho;

¹⁸ arühnü abi yu nyinung ko arüh dhsara kyangjüsohnung rocho. Amünyi nbünü dhsümthserütisü ro kyangcho.

¹⁹ Atümungnü abi chah thahpünyücho, tunüo abi chahnü azi ronü arüh atümung kyangjücho.

Akünyang ko Awah

²⁰ Jisu-nü amonoti chah dhingcho ko yocho, “Nührü ailümrü akünyangnung; tunüo Tsingrangba yanglih nührü yo!

²¹ Nührü ade yangrü akünyangnung; tunüo nührü kükyüsohnung! Nührü ade trarü akünyangnung; tunüo nührü münyünung!

²² “Nyitsarü Tsurü thsacholanü khode nyitsarünü nührü thrünyinang, mükhyüchonang, müchümükehnang ko nührü amünyiepü yonang, nührü akünyangnung!

²³ Hütsü roh-i tikehde künyang, ko alongphinü tsohching, tunüo nührü khyang ninglang jiyü amülah yohpüjüle. Tunüo arüh jümürütinü hütsü kyokyo azikehrü te nguchicho.

²⁴ “Ta ade nührü alirü khüta adrünung; tunüo akünyang akang tsü lipehko.

²⁵ Ade kükyo lirü khüta adrünung; tunüo nührü yangkongnung! Ade münyürü khüta adrünung; tunüo meshünung ko tranung!

²⁶ “Khode atümungnü nührü tsacho senang khüta adrünung; arüh jümürütinü hütsü kyokyo azikehrüti nengdang arahkheh chocho.

Arorüh Müinung

²⁷ “Ta Ihnü nührü I yu yuchirüte yore: Nührü rorüh müing, nührü thrünyirüte atsa nguching,

²⁸ nührü chokehcholarü müwajüng, ko nührü mütsa bichirü nengdang dangkhidangnangjüng.

²⁹ Khürünü nü müchüp khüdulang tangkhang, khüulangsü tangsohng; khürünü nü shü khyüjükhang, nü fükhümsü khyüsohng.

³⁰ Nüte chingrü atümung khyang jüng, khode bürünü nüyo khyünang, hütsü thali tüching.

³¹ Bürünü nührü khyang khüta nguchisohnyo nührünü lümro, nührünüsü arüh te hütsü roh-i nguching.

³² “Nührü te müirüte du nührünü müikhang, tu nengdang amüwa ngunung? Münyirü nüsü arüh te müirülü müire!

³³ Ko nührü te atsa nguchirüte du nührünü atsa nguchikhang, tu nengdang amüwa ngunung? Münyirü nüsü hütsü roh-i nguchire!

³⁴ Nührünü thali ngunung alongdi lirü khyang du nührünü nyajükhang, tu nengdang amüwa ngunung? Adongdong ngunung nengdanglü münyirünüsü münyirü khyang nyajüre!

³⁵ Doh! Nührü rorüh müing; ko arüh te atsa nguching, ko thali ngunung mülongdipü nyajüng. Hütsütakhang nührü jiyü amülah ngunung, ko nührü Amichahba Tsingrangba tsurüti kangnung. Tunüo müci müthri ko amükhyu nyitsarü tesü abinü müire.

³⁶ Nührü Aunü yanglilümcho roh-i nührünüsü yanglilüm.

Aparü Yukhacho

³⁷ “Aparü yu tükha, ko Tsingrangba-nü nührü yu mükhanung; aparü tümülangjü, ko Tsingrangba-nü nührü mümülangjünung; bürü mülang pehjüng, ko Tsingrangba-nü nührü mülang pehjünung.

³⁸ Aparü khyang jüng, ko Tsingrangba-nü nührü khyang jünung. Ajüje, nührü khyang ajeng, nyümchi, shühchi, dhradhranü jünung. Nührünü aparü nengdang khüiba akyahsing bichinang Tsingrangba-nüsü nührü nengdang hütsü du bichinung.”

³⁹ Ko Jisu-nü arüh te yukitaba hi yocho: “Nahtohrü khüdunü nahtohrü nünung mükoh; anyüding yongroh la thungyohnung.

⁴⁰ Mono khüdu tsü adorü tenü adiuba mah; ta mono müipi, khode abi anyichoba thümnang, adoba kyo kangnung.

⁴¹ “Tuepü nüpu nahtse la singnah zehcholü müngupü, nü jünirü nahtse la anyahlü dhingro?

⁴² Nüpu nah la singnahlü müngupü nühnü khüta nü jünirüte, ‘Ihnü nü nahtse la anyah tsü pehjünung o’ pü yochehnung? Nührü akhürahrüti! Nüpu nah lanü singnah tsü akhu pehng, hütsüpü du nü jünirü nah la anyah tsü pehjünung nühnü tsidsa ngunung.

Singdong ko Asih

⁴³ “Singdong atsa chah singsih amütsa müsire, mahkhang singdong amütsa chah singsih atsa müsire.

⁴⁴ Singdong müipi abükyü sihnü müdhere; zengdong chah ngurüsih müsihre mahkhang zengshü chah shükusih müsire.

⁴⁵ Nyitsarü atsa lasiking lanü atsa chürore; nyitsarü amütsa lasiking lanü amütsa chürore. Tunüo lasih la tu jeng liro hütsü du benü chore.

Kuh Anyüh Thsarü

⁴⁶ “Tuepü nührünü Ite ‘Abüdongba, Abüdongba’ pü dsiro, ta Ihnü yocholü mühnyiro?

⁴⁷ Sünü I yanglang roro, I yu nyiro, ko hütsüri bichiro abi tu kyoro hütsü Ihnü nührü te ngunung.

⁴⁸ Abi lung michah asoh jupü khyüm thsaba kuthsarü nyüh khüdu kyole. Kih dii rocho ko kuh chah tsü nyümkehcho, ta hütsü mümühachicho, tunüo hütsü drengdreng thsacho.

⁴⁹ Ta sünü I yu yuchiro ko hütsü mübichiro, abi kuh thsade aying drengdreng mükhyümpü thsaba nyitsarü tsü kyole; khode kih dii ro hütsüba kuh chah tsü nyümkehcho, hütsü khüdupinü khülucho ko hütsü khüluba tsü athsangnyang khütoh-i thsacho!”