YUSE ATSA LUK 5 - AMÜSA BAIBEL (BSI)

Jisu-nü Akhudiba Monoti Dsire

¹ Nyümong khüdu Jisu Genesaret kihdi bekhümla yade, nyitsarütinü Tsingrangba yu nyinung nyingta wücho.

² Kihtang anyüh kihbekhümla yohpüpü ngurangrüti arüh yojeh thsütohchiya abinü ngucho.

³ Jisu-nü kihtang khüdu chah küducho, hütsü Simon yo thsacho ko abi te kihbekhümla tsünü azikyah düm-müthehnung tsingdhingcho. Jisu-nü kihtang la tsü pümpü amülung te docho.

⁴ Ayu chozahde, abinü Simon te yocho, “Kihtang tsü ayü asoh-ulang düm-müthehng, ko ngurangnung nengdang nührü yojeh tsü phayohchüng.”

⁵ Simon-nü lalingcho, “Abüdongba, ihrünü shomang müyüp phako ta tusü mürang. Ta nühnü yorü tsü, Ihnü yojeh tsü phanung.”

⁶ Arühnü phayohchücho ko ngu khütango phatichonü arüh yojeh arohrüprü du thsacho.

⁷ Achotsü arühnü kihtang akhüula pümrü arüh shangrü te ro troung pü khehnü dsicho. Ko arüh rocho ko kihtang anyüding ngunü jengmülümchonü kihtangti tsü amülingyohrü thsacho.

⁸ Simon Peter-nü atikehcho tsü ngude, abinü Jisu bete mükhukeh yocho, “I tenü za tsieng, Abüdongba. Ih amünyi nyitsarüe!”

⁹ Arühnü ngu khütango rangcho ngu abi ko abi te aparü atümung dee nyemüyangcho.

¹⁰ Simon müyangrüti Zebede tsurü Jakob nyüsü hütsü roh-i nyemüyangcho. Jisu-nü Simon te yocho, “Tüdrü; ade tinü nühnü nyitsarü rangnung.”

¹¹ Arühnü arüh kihtangti kihbekhümla tphahchehpü, lüpcho pehjüko Jisu khanglang iiwücho.

Jisu-nü Nyüh Khüdu Kyangjücho

¹² Nyümong khüdu Jisu yangdi khüdula pümde, mübhira kehrü khüdu abi yang rocho. Khode abinü Jisu ngucho, apu jangjang thsütsu abi te kihchicho, “Adirü, nühnü lümkhang, Ih müsachehjünung kohle!”

¹³ Jisu-nü akheh müyungchü abi chah thahpo yocho, “Ihnü lümre, müsachehng.” Hütsüdenü adhsa tsünü nyitsarüba tsü pehjücho.

¹⁴ Jisu-nü abi te yuzengjo yocho, “Sütesü tüyo, ta bebüba yanglang wüng ko abi khyang dhingsohng; ko atümung bete nüh müsachehkopü yuzithsanung nengdang, Mosa-nü mülacho amübü mübüng.”

¹⁵ Ta Jisu nengdang yusi tsü alaa du apümlang sobhocho, ko nyitsarü khütango abi yu nyinung ko arüh dhsara kyangsohnung nengdang abi yang rocho.

¹⁶ Ta abinü anayinglang dangkhidangnangnung tsipehcho.

Dsidsisonü Dhsarü khüdu Kyangjücho

¹⁷ Nyümong khüdu Jisu-nü do lide, Galil, Judea ko Jerusalem yangdi müipi lanü rocho Farisirü ko yuzeng adorüti khürü hütsüla pümcho. Adhsangnangrü kyangjüsohnung Abüdongba zii abi chah licho.

¹⁸ Nyitsarü khürünü dsidsisonü füdhsarü nyüh khüdu chongnong lanü dhi rocho, ko arühnü abi kuh la tsü dhi züdu Jisu bete yohpünung müküpcho.

¹⁹ Ta sühdirachonü arühnü abi münozüduchehcho. Hütsünü arühnü abi kumungchah dhi küducho ko kuh chuphohnü abi chongnong chahnü amülung longla Jisu bete dhichahchücho.

²⁰ Jisu-nü arüh yudsi mülahcho ngunü nyitsarüba te tsü yocho, “I müyang, nü münyi pehjüko.”

²¹ Yuzeng adorüti ko Farisirütinü arühbürü chotarü, “Hiroh-i müthsamünyü choba nyitsarü hi süo! Münyi pehjünung kohba tsü Tsingrangba due!”

²² Jisu-nü arüh lümcho müdhe arüh te yocho, “Nührünü tuepü hütsüta lümro?

²³ ‘Nü münyi pehjüko pü yonung amülaba a, mahkhang, Shemüsung ko tsehng pü yonung amülabao’?

²⁴ Khang, Ihnü nührü te tsidsa yonung, Nyitsarü Tsurü chah hiba limih la münyi pehjünung tase kehle.” Hütsüpü abinü dsidsisüba nyitsarü te tsü yocho, “Shemüsung, nü yüpji dhing ko kulang wüng!”

²⁵ Hütsüdenü nyitsarüba tsü arüh atümung betenü shemüsucho, ko abi yüpji tsü dhipü Tsingrangba nengse kulang tsicho.

²⁶ Arüh atümung khütang nyemüyang, drüsehnü Tsingrangba nengse yocho, “Chünye Ihsanü anyemüyangnung nguchi nguko!”

Jisu-nü Levi Dsicho

²⁷ Hütsüpü, Jisu-nü dongkhu chüducho ko alihmüthsü dhrirü anengnü Levi, abi dochungkuh la püm ngucho. Jisu-nü abi te yocho, “Ih iirung.”

²⁸ Levi-nü shemüsucho, ko lüpcho pehjüpü abi iiwücho.

²⁹ Hütsüpü Levi-nü abi kuh la Jisu nengdang thsüti arangcheh külüpcho, ko shirü yola tsü alihmüthsü dhrirü ko aparü adrong zehcho.

³⁰ Farisirü ko yuzeng adorü khürünü Jisu mono nyümnü abi te yocho, “Tuepü nührünü alihmüthsü dhrirü ko amünyirü yola tsuyongro?”

³¹ Jisu-nü arüh te lalingcho, “Tsayengrü nengdang akyangjürü müdhsütah, ta füdhsarü nengdang dhsütahre.

³² Ih amüsarü lasih thsamülasohnung müro, ta münyirü nengdang rocho.”

Kongcho Nengdang Atsingdhingba

³³ Nyitsarü khürünü Jisu te yocho, “Johan monotinü adrongpi kongnü dangkhidangnangre, ko Farisirü monotinüsü hütsü roh-i nguchire; ta nü monotilü tsure ko yongre.”

³⁴ Jisu-nü lalingcho, “kukangbong arüh yola lipü kulang würü shirüti nührünü kongsohnung mah-o? Hütsüta mah.

³⁵ Ta arüh yolanü kuthribong notsinung nyümong tsü ronung, hütsüde arühnü kongnung.”

³⁶ Jisu-nü arüh te yukitaba hisü yocho: “Sünüsü shü asi chahnü rehcho athreh chah mükhümkehre. Tunüo shü asi tsü rehrüpnung, ko shü asi dsi-o tsüsü ahi chah tsü müphishunung.

³⁷ Mahkhang, sünüsü cikih anu shinga ahi la müliire, tunüo cikih anu tsünü shinga tsü tsohrüpnung, ko cikih tsü tsüthohnung, ko shinga tsüsü thsangnyangnung.

³⁸ Hütsü müli, cikih anu tsü shinga asi la liire!

³⁹ Ko sünüsü cikih azicho yongpü khanglang anu mühyongre. ‘Azicho tsü atsaubaepü abinü yore.’ ”