YUSE ATSA LUK 4 - AMÜSA BAIBEL (BSI)

Jisu Thsadsücho

¹ Jisu, Anbü Amüsanü jeng Jordan lanü thali rocho ko lipilih lang anbünü notsicho,

² ko motsingnü nyümong yüre thsadsücho. Hütsü bekhyah ayung abinü tusü mütsucho, ko hütsü bekhyah khude abi yangcho.

³ Motsing tsünü abi te yocho, “Nüh Tsingrangba tsurü thsakhang, lung hinü hümdhse kangsohng.”

⁴ Ta Jisu-nü lalingcho, “Amüsa yunü yore, ‘Nyitsarünü hümdhse dunü akang mülicheh.’ ”

⁵ Hütsüpü motsingnü abi notuwücho ko limih la yanglihti apüm nahsüp müthsae abi te ngusohcho. Motsing tsünü abi te yocho,

⁶ “Ihnü nü khyang hiri zii ko kuthsi apüm jünung. Hiri apüm I khyang jopehko, ko Ihnü jünyürü khyang jünung kohle.

⁷ Nühnü Ih mübükhang, hi atümung nüyo kangnung.”

⁸ Jisu-nü lalingcho, “Amüsa yunü yore, ‘Abüdongba nü Tsingrang mübüng ko abi du dikehng!’”

⁹ Hütsüpü motsingnü abi Jerusalem lang nowücho ko amübü kumung athsengu chah pümsohcho, ko abi te yocho, “Nüh Tsingrangba Tsurü thsakhang, nü jangjangthsa hilanü tsohchoung.

¹⁰ Tunüo amüsa yunü yore, ‘Tsingrangba-nü nüh xükümnung nengdang abi riwürüti khyang yuzeng jünung.’

¹¹ ‘Ko nü jing mii lung chah mümüthinung nengdang arühnü arüh kheh la nüh wüpchonung.’”

¹² Ta Jisu-nü lalingcho, “Amüsa yunü yore, ‘Abüdongba nü Tsingrang tüthsadsü.’ ”

¹³ Khode motsing tsünü lang papanü Jisu thsadsükhangcho, abinü azachah nengdang abi pehjücho.

Galil la Jisu-nü Anguchi Dikehcho

¹⁴ Hütsüpü Jisu Galil lang thali rocho, ko Anbü Amüsa zii abi te licho. Ko abi nengdang yusi tsü hütsü mükyah apümlang sobhocho.

¹⁵ Abinü Sinagog la docho ko atümungnü abi secho.

Nazaret la Jisu Mükhyüchocho

¹⁶ Hütsüpü Jisu-nü abi zichehba Nazaret lang wücho, ko Sabath nyümong abi nanathsacho roh-i Sinagog la züducho. Abinü amüsa yu khinung yamüsucho

¹⁷ ko azikehrü Isaya vakha abi khyang jücho. Abinü thrahlohcho tsü lehchehcho ko hita thrah licho ngucho.

¹⁸ “Abüdongba Nbü I chah lile, tunüo ailümrü khyang yusi atsa hironung abinü Ih müyühjü throchehcho. Arangyoh la lirü te nyüje seyohjünung ko nahtohrü trahsohnung; ko ayurü lehcheh müthehsohnung,

¹⁹ ko Abüdongba-nü müyurüti khümchonung becho chihko pü züdesohnung abinü Ih müthehcho.”

²⁰ Jisu-nü thrahloh tsü lohtipü, anguchirü khyang thali jüpü pümcho. Sinagog la pümrü atümungnü abi chah du dhinglah dhing pümcho,

²¹ abinü arüh te yocho, “Nührünü khi yuchicho roh-i, hiba amüsa yu chünye tikehre.”

²² Abinü tsara chocho yuchi arüh atümungnü nyemüyang yocho, “Hivi hi Josef tsurüsü mahrü do?”

²³ Abinü arüh te yocho, “Akyangjürü, nü jangjangthsa kyang; nühnü Kapernaum la nguchicho Ihrünü yuchicho kyokyo nüpu yang hilasü nguching” pü nührünü Ite yoririepü Ihnü müdhecho.

²⁴ Ihnü nührü te yuje yore, “Palu lih lalü azikehrü tsü khodesü mükhyüchore.”

²⁵ “Hi nyieng: Israel lih la Elija shikhe khode kang asang pü achangsho tsing mürocho ko yangkong apümlang tikehcho, hütsütade chomilarü khütango lichoeba tsü yuje.

²⁶ Israel la sü yanglang sü Elija müwüsoh, ta Sidon lih la Zarefat la liba chomitpü yanglang du wüsohcho.

²⁷ Ko azikehrü Elisha shikhe Israel la mübhira kehrü khütango licho; ta Syria-ba Naman chah khu arüh süsü mükyangcho.”

²⁸ Sinagog la lirünü hi yuchide, arüh rihlong chürocho.

²⁹ Arühnü shemüsunü yangdi lanü abi dsepehcho ko khüi zong la arüh yangdi thri licho, hütsü zong chah notuwücho. Arühnü lungdhong la tsü dümyohchü süsohnung lümcho,

³⁰ ta abinü arüh kahlanü bücheh tsipehcho.

Amünyi Nbünü Rangchoba Nyitsarü Khüdu

³¹ Hütsüpü Jisu-nü Galil la yangdi khüdu Kapernaum lang wücho ko Sabath nyümong abinü nyitsarüti te docho.

³² Abinü docho yuchi arüh atümungnü nyemüyangcho, tunüo abinü tase bichi chocho.

³³ Sinagog la tsü nyitsarü khüdu amünyi nbünü rangchoba zehcho; ko abinü yuva amülahnü züdecho,

³⁴ “Hai, ihrü te nüh tu nguchinyüro, Nazaret-rü Jisu? Nüh ihrü changsohnung hila rocho mah-o? Nüh sünang Ihnü müdhele: Nüh Tsingrangba amüsa yusi hirü!”

³⁵ Jisu-nü anbü te tsü yuzengjo yocho, “Tümümüpko nyitsarü chah tsünü chürung!” Amünyi tsünü arüh bete nyitsarüba tsü khülusohcho ko tu mülerohpejüpü abi chahnü tsipehcho.

³⁶ Ko nyitsarü atümung nyemüyangnü khüunü khüu te yocho, “Yu hiri hi tuo? Tase ko zii la nyitsarü hinü amünyi nbü khyang yuzeng jüre ko arüh chürore!”

³⁷ Ko Jisu nengdang yusi tsü hütsü lih apümlang sobhocho.

Jisu-nü Nyitsarü Adrong Kyangjücho

³⁸ Jisu-nü Sinagog tsü pehjücho ko Simon kuh la züducho. Ko Simon nitpü atpa rihminü khee dhsa yüpjocho, ko arühnü Jisu te abükyü nengdang yocho.

³⁹ Abinü wü abükyü yüpji müshüm yacho, ko rihmi te tsü abükyü pehjünung yuzengjücho. Rihmi tsünü abükyü pehjücho, ko hütsütade tsünü shemüsu abükyünü arüh dikehcho.

⁴⁰ Nyü züdupü, dhsara papanü füdhsarü atümung Jisu yanglang norocho; ko arüh nyitsarü müipi chah apu khehnü nyümkeh arüh atümung kyangjücho.

⁴¹ Amünyi nbütisü nyitsarü adrong chahnü chüro, “Nüh Tsingrangba Tsurüe, pü züde tsicho!” Jisu-nü amünyiti khyang yuzeng jonü müchosohcho, tunüo arühnü abi Mesia epü müdhecho.

Jisu-nü Sinagog la Thsingyucho

⁴² Nyangnyü khüu Jisu-nü yangdi tsü pehjüpü anaying müdüm khüdu lang tsipehcho. Hütsünü nyitsarütinü abi yangchimüsucho, ko arühnü abi ngude, abi mütsisohnung müküpcho.

⁴³ Ta abinü arüh te yocho, “Ihnü Tsingrangba yanglih Yuse Atsa tsü apa yangdi langsü thsingyubae, tunüo hütsü nengdang Tsingrangba-nü Ih müthehcho.”

⁴⁴ Hütsünü Judea lih Sinagog apüm la abinü thsingyu rachicho.