YUSE ATSA LUK 3 - AMÜSA BAIBEL (BSI)

Baptijüba Johan Athsingyuba

¹ Yangthsaba Tiberius yangthsacho kang dhüremüngau la; Pontius Pilat tsü Judea governor, Herod tsü Galil yangthsarü, ko amung Filip tsü Iturea ko Trakonitis limih la yangthsarü; Lesanias tsü Abilene yangthsarü,

² ko Annas e Kaifas nyüh tsü Amungthriba Bebürüti licho. Hütsü shikhela lipilih la Zekaria tsurü Johan yanglang Tsingrangba yu rocho.

³ Hütsünü Johan-nü Jordan yongkhi mükang liba lih atümunglang wünü thsingyu yocho, “Nührü münyi lanü ximüla bapting, ko Tsingrangba-nü nührü münyi pehjünung.”

⁴ Azikehrü Isaya vakha la thrah licho roh-i: “Lipilih la nyüh khüdunü züdele: ‘Abüdongba nengdang lang rungnüm; abi tsehsohnung lang müchongkhüti pihng!

⁵ Lihkoh atümung sühmüjangnung, akhang azong atümung ngah kangnung. Lang amüshi tsü müchongsohnung, ko aküprah lang müjangri kangsohnung.

⁶ Ko nyitsarü atümungnü Tsingrangba akangcheh ngunung!’”

⁷ Nyitsarü khütango Johan yanglang abi khyang baptisohnung rocho. Abinü arüh te yocho, “Nührü mürü zati!” “Tsingrangba-nü müthehnung liba akhingchi lanü tsiphunung kohnungepü sünü nührü te yocho?

⁸ Nührü münyi lanü ximülakopü ngusohnung nguchiti nguching. Ko nührü yola Abraham tsü nührü jümürüepü yonung tüdikeh. Ihnü nührü te yore, Tsingrangba-nü lung hirinü Abraham tsurüti kangsohnung kohle!

⁹ Singdong tsü ayingnü renung püh rungnüm lile; asih atsa müsihba singdong atümung retsu michang la dhiyohchünung.”

¹⁰ Amülung tsünü abi te tsingdhingcho, “Khang Ihrünü tu nguchinung?”

¹¹ Abinü lalingcho, “Sü fükhüm anyüh liro abinü amüliba khyang khüdu jüng, ko sü tsuyongnung liro abinü hütsü changtaang.”

¹² Alihmüthsü dhrirü khürü baptisohnung rocho, ko arühnü abi te tsingdhingcho, “Adorü, Ihrünü tu nguchinung?”

¹³ Abinü arüh te yocho, “Yuzeng chah alaa tüdhri.”

¹⁴ Rothsarü khürünüsü abi te tsingdhingcho, “Ihrü khüta? Ihrünü tu nguchibao?” Abinü arüh te yocho, “Sü chahnüsü thsi rohcho tükhyü mahkhang arahkheh la süsü tümülangjü. Nü chothsila longkyang lieng.”

¹⁵ Nyitsarü alongdi alaa limüsucho, ko arühnü Johan tsü Mesia a mahnangpü lümcho.

¹⁶ Hütsünü Johan-nü arüh te yocho, “Ihnü nührü kih la baptijüre, ta I tenü adiuba khüdu tsehle. Ihlü abi jingkhüm yo lehchehnungsü müleng. Abinü nührü Anbü Amüsa ko michang la baptijünung.

¹⁷ Pungkhyang lanü fürü wicheh abi shih la khyübülungnung nengdang, apu kheh la müro biyale; ta abinü ayülü khodesü mümehba michang la tahpehnung.”

¹⁸ Johan-nü lang papa adrongnü thsüchi arüh te yuse atsa thsingyucho.

¹⁹ Ta Johan-nü governor Herod yübücho, tunüo abinü amung nitpü Herodias khyüjücho, ko apa münyi nguchi adrong nguchicho.

²⁰ Hütsüpü Herod-nü alaa amütsau nguchi Johan arangyoh kuh la khangticho.

Jisu Bapticho

²¹ Nyitsarü atümung baptipü khanglang, Jisu sü bapticho. Abi dangkhidangnang yade ning khangthrucho,

²² ko Anbü Amüsa mümüdhrü kyo abi chah jürocho. Ko ninglangnü yuva khüdu rocho, “Nüh Ihnü müiba Tsurü. Nü chah I long kyangre.”

Jisu Jümürüti

²³ Khode Jisu anguchi dikehcho, abi kang sangreo azirü thsacho. Abi nyitsarünü lümcho roh-i Josef tsurü, sü Heli tsurü licho,

²⁴ Mathat tsurü, Levi tsurü, Melki tsurü, Jannai tsurü, Josef tsurü,

²⁵ Matathias tsurü, Amo tsurü, Nahum tsurü, Esli tsurü, Nagai tsurü,

²⁶ Math tsurü, Matathias tsurü, Semein tsurü, Josek tsurü, Joda tsurü,

²⁷ Joanan tsurü, Resa tsurü, Zerubabel tsurü, Shealtil tsurü, Neri tsurü,

²⁸ Melki tsurü, Addi tsurü, Kosam tsurü, Elmadam tsurü, Er tsurü,

²⁹ Joshua tsurü, Eliezer tsurü, Jorim tsurü Mathat tsurü, Levi tsurü,

³⁰ Simeon tsurü, Juda tsurü, Josef tsurü, Jonam tsurü, Eliakim tsurü,

³¹ Melea tsurü, Menna tsurü, Matatha tsurü, Nathan tsurü, David tsurü,

³² Jesse tsurü, Obed tsurü, Boaz tsurü, Salmon tsurü, Nashon tsurü,

³³ Aminadab tsurü. Admin tsurü, Arni tsurü, Hezron tsurü, Perez tsurü, Juda tsurü,

³⁴ Jakob tsurü, Isak tsurü, Abraham tsurü, Tera tsurü, Nahor tsurü,

³⁵ Serug tsurü, Reu tsurü, Peleg tsurü, Eber tsurü, Shela tsurü,

³⁶ Kainan tsurü, Arfaxad tsurü, Shem tsurü, Noa tsurü, Lamek tsurü

³⁷ Methusela tsurü, Enok tsurü, Jared tsurü, Mahalalel tsurü, Kenan tsurü,

³⁸ Enosh tsurü, Seth tsurü, Adam tsurü, Tsingrangba tsurü.