YUSE ATSA LUK 2 - AMÜSA BAIBEL (BSI)

Jisu Surocho

¹ Hütsü shikhela yangthsaba Augustus-nü Roman yanglih atümunglang mono khinung yuzengjücho.

² Hiba akhudiba mono khide tsü Quirinius tsü Syria la Governor thsacho.

³ Ko atümungnü palu neng thrahyohnung palu yangdi lang wücho.

⁴ Josef tsü Galil la Nazaret yangdi lanü Judea la liba Bethlehem, Yangthsaba David suro lih yang wücho, tunüo abi David chahnü trahchocho khüdu licho.

⁵ Abi te xengnung müxingta litpü Mary nüpü neng thrahyohnung wücho.

⁶ Abükyü fü müdeng licho ko arüh Bethlehem la lide, zatbünung becho chihcho.

⁷ Hütsü abükyünü akhudiba azarü surocho, ko shü anana la müshüpü misü tbhü la abi yüpsohpücho, tunüo shilangkuh la arüh nengdang amüdongchah mülicho.

San Nyahrüti ko Riwürüti

⁸ San nyahrü khürü hütsü lih müdümla tsü aromang jungchah Santi nyahnü licho.

⁹ Abüdongba ninglang riwürü khüdu arüh bete chüro ngucho, ko Abüdongba ahechi arüh chah hekehjücho. Arüh dee drüsehcho,

¹⁰ ta ninglang riwürü tsünü arüh te yocho, “Tüdrü! Ihnü nührü nengdang yusi atsa hirore, khüinü nyitsarü atümung khyang akünyang amülah hirojünung.

¹¹ Chünye David yangdila nührü Kangchehjüba Abüdongba Khrista tsü suroko!

¹² Ko nührü te hi amüdhethsa linung: nührünü akhunga khüdu shü anananü müshüpü misü tbhü la yüpjo ngunung.”

¹³ Thohdhünü riwürü yola tsü ninglangrü khütang zehpü Tsingrangba nengsekhi thsanü yorü:

¹⁴ “Amichahba ninglang lih la Tsingrangba khyang ahechi thsaang, ko limih chah sürü te abinü longsüro arüh te atbachi thsaang!”

¹⁵ Khode ninglang riwürü tsü arüh tenü za thali ninglang tuwücho, San nyahrütinü khüunü khüu te yorü, “Abüdongba-nü Ihsa te atikehcho tu yocho, hütsü dhingnung Ihsanü Bethlehem lang wünung.”

¹⁶ Achotsü arühnü dhsüdhsa wünü Mary e Josef nyüh shirücho ko akhunga tsü Misü tbhü la yüpjo ngucho.

¹⁷ San nyahrütinü abi ngude, akhunga nengdang ninglang riwürünü tu yocho hütsü arüh te yocho.

¹⁸ San nyahrünü tu yocho hütsü yuchirü atümungnü nyemüyangcho.

¹⁹ Mary-nü hiri apüm lümchehcho ko hütsüri nengdang soh lümdhingcho.

²⁰ San nyahrütinü tu yuchicho, ko ngucho hütsüri nengdang Tsingrangba nengse thali tsicho; hütsü ninglang riwürünü arüh te yocho roh-i du licho.

Jisu Neng Dsijücho

²¹ Nyükhih khüdu khanglang, khode akhunga tsü müjüp-pehnung bekhyah chihcho, abi longla mühiede ninglang riwürünü jücho roh-i, abi neng Jisu dsijücho.

Jisu Amübükuh la Jücho

²² Mosa yuzengnü mülacho roh-i, Josef ko Mary nyünü müsachehba nyümong chii rode; arühnü Abüdongba khyang jünung abi Jerusalem lang nowücho.

²³ Abüdongba yuzeng la thrahnü licho roh-i: “Adhrerü aukhurü atümung Abüdongba khyang khakhuchüjünung.”

²⁴ Abüdongba Yuzengnü mümüdhrü anyüh mahkhang kuh-mümüdhrü za anyüh amübü jüng pü yocho roh-i, anyüsü mübünung wücho.

²⁵ Hütsü shikhela nyüh khüdu anengnü Simon Jerusalem la licho. Abi amüsarü Tsingrangba jengreng drürü nyüh khüdu ko Israel khümchosohnung mükhyah ying licho. Anbü Amüsa abi chah licho,

²⁶ ko abinü Abüdongba anyengchocho Mesia tsü müngu delü müsünungepü abi te nyengchocho.

²⁷ Anbünü Simon amübükuh yang nowücho. Khode tpurünü azarü Jisu tsü amübükuh lang yuzeng yangthsa roh-i abi nengdang nguchinung norocho,

²⁸ Simon-nü azarü tsü akheh la wüpchocho ko Tsingrangba khyang anengse jücho:

²⁹ “Ade, Abüdongba, nüh anyengchocho yuje, nü dikehrü atbachila tsisohng.

³⁰ Ipu nahnü nü akangcheh nguko,

³¹ khüiba nühnü liküprü bete rungnümcho.

³² Yangpirü te nü lümcho mishanung atsingse khüdu ko nü müyurü Israelrü nengdang ahechi.”

³³ Au e atpa nyüh tsü Simon-nü abi nengdang chocho yuchi nyemüyangcho.

³⁴ Simon-nü arüh müwajüpü atpa Mary te yocho, “Israel la khütango thsangnyangjünung ko khümchonung Tsingrangba-nü hiba azarü hi throchehko. Abi tsü Tsingrangba chahnü amüdhethsa khüdu khüi nyitsarü adrongnü nyüm chonung

³⁵ ko hütsüta arüh arang lümlong mishajünung. Ko nohsheng akoh kyo, awah tsünü nübükyü lasih khakhu thranung.”

³⁶ Asher hung lanü Fanuel tsulatpü azikehlarü chomilarü khüdu anengnü Anna licho. Abükyü xengpü kang dhünyeh du anii te licho, ko ade abükyü kang qurepü müyü ashilarü licho.

³⁷ Abükyünü khodesü amübükuh müpehjücho; ama atsingse, kongnü dangkhidangnang Tsingrangba mübücho.

³⁸ Hütsü shikhela abükyü tsü rocho, ko Tsingrangba khyang anengse jücho ko Jerusalem nyüje kangnung Tsingrangba yingrü atümung te azarü nengdang tsü chocho.

Nazaret lang Thalicho

³⁹ Josef e Mary nyühnü Abüdongba yuzengnü dhsütahcho atümung nguchikhangpü, Galil la arüh yangdi Nazaret yang thali rocho.

⁴⁰ Azarü tsü zicho ko suzeh kangcho; abi lümlong ajeng ko Tsingrangba amüwa abi michah licho.

Amübükuh la Azarü Jisu

⁴¹ Kang mükhu Jisu tpurü tsü Jerusalem lang Phungkhu Thsütila zehnung wücho.

⁴² Khode Jisu kang dhüreanyüh dhreza kangcho, ayah roh-i arühnü thsütila zehnung wücho.

⁴³ Thsüti tsü changkapü, arühnü kulang thalicho, ta azaba Jisulü Jerusalem la nyehlipehcho. Abi tpurünü hütsü mümüdhehcho;

⁴⁴ arühnü abi tsü amülung yola tsehlepü lümnü mükhyang tsehpü khanglang arüh tsutpurü ko shangrüti yola yangchinung dikehcho.

⁴⁵ Arühnü abi müngucho tsü abi yangchi Jerusalem lang thali wücho.

⁴⁶ Asangu nyümong arühnü abi amübükuh la Jihudarü adorüti yola, arüh yu nyinü, ko arüh te tsingdhingnü püm ngucho.

⁴⁷ Abi yu yuchirü atümungnü abinü thsehdhsa lalingcho ngu nyemüyangcho.

⁴⁸ Abi tpurünü abi ngude, arüh nyemüyangcho, ko atpanü abi te yocho, “Ale, tuepü hiroh-i nguchiro? Nüu Ihjü dee müci rohcho nüh yangchirü mado.”

⁴⁹ Abinü arüh te lalingcho, “Tuepü nührü Ih yangchiro? Ih I U kuh la linungepü nührünü mümüdhecho mah-o?”

⁵⁰ Ta arühnü abinü lalingba tsü mühnyichehcho.

⁵¹ Achotsü Jisu-nü arüh yola Nazaret lang thali wücho ko hütsüla abinü arüh yochonyi licho. Atpanü hiri atümung alasih la lümkehnü yohpücho.

⁵² Jisu shutsa ko lümlong anyüdingla, Tsingrangba ko nyitsarünü khyünyünungthsa zicho.