YUKHARÜTI 9 - AMÜSA BAIBEL (BSI)

Abimelek

¹ Gideon tsurü Abimelek-nü atparü jünirü atümung liba Shekem lang wücho

² ko Shekem-rü te hita tsingdhingnung arüh te yocho, “Nührünü khüi mürunung? Gideon tsurü nyühredingnü yangthsasohnung a mahkhang nyüh khüdu dunü yangthsasohnung? Abimelek tsü nührü shushüh khüduepü müdheing.”

³ Hütsü nengdang atparü tsutpurünü Shekem-rü te chotacho ko Shekem-rünü Abimelek khanglang wünung dhrongchehcho, tunüo abi tsü arüh tsutpurü thsacho.

⁴ Arühnü abi khyang azengtacho Baal amübükuh lanü taripi nyühre jücho, ko hütsüba thsi tsünü abi yola zehsohnung afüashi khürü mülihcho.

⁵ Abinü Ofra la au kulang wücho ko hütsüla lungpüm khüdu michahnü Gideon tsurü arüh nyühre tsü kyüsehcho. Ta Gideon tsurü achangba Jotham-lü rangpehpü mükyüsehcho.

⁶ Hütsüde Shekem-rü ko Bethmillorü atümung shimükhongcho ko Shekem la Amüsa langsing yang wücho ko hütsüla arühnü Abimelek yangthsaba kangsohcho.

⁷ Jotham-nü hütsü yuchide abinü wü Gerizim Khang chah yapü züdecho, “Nührü Shekem-rü Iyu nyieng, ko Tsingrangba-nü nührü te nyinung!

⁸ Shikhe khüdu singdongtinü arüh michah yangthsarü thronung shimükhongcho. Arühnü olive singdong te yocho, ‘Nüh ihrü yangthsaba thsaang’

⁹ Olive singdongnü lalingcho, ‘Nührü michah yangthsanung nengdang tsingrangrü ko nyitsarü hechijüba tuji chixiba pehjünung do?’

¹⁰ Achotsü arühnü ngurüsidong te yocho, ‘Nüh rung ko ihrü yangthsarü kang.’

¹¹ Ta ngurüsidongnü lalingcho, ‘Nührü michah yangthsanung nengdang Ih singsih anyiyah pehjünung do?’

¹² Achotsü arühnü shükusishü te yocho, ‘Nüh rung ko ihrü yangthsarü kang’

¹³ Ta shüsidongnü lalingcho, ‘Nührü michah yangthsanung nengdang tsingrangrü ko nyitsarü künyangsohba cikih pehjünung do?’

¹⁴ Achotsü singdong apümnü zengtrung te yocho, ‘Nüh rung ko ihrü yangthsarü kang’

¹⁵ Zengtrungnü lalingcho, ‘Nührünü yuje Ih nührü yangthsaba kangsohnyükhang, rung ko I khümki ku münyieng. Mahkhang I zengtrung lanü michang chüro Lebanon lanü Cedar sing tsü trüp-pehng.’

¹⁶ “Khang ade” Jotham-nü müchikeh yocho, “Nührünü Abimelek yangthsarü kangsohde lümkhung lümnü kangsohcho mah-o? Nührünü Gideon ko abi nguchi lümkeh abi kukhi te chomangcho mah-o?

¹⁷ Uwa-nü nührü nengdang khatajücho lümchehng. Midian-rü khehlanü nührü khümchonung abi akang jücho.

¹⁸ Ta chünye nührünü uwa kukhi nyüm yare. Nührünü abi tsurü nyühre lungpüm khüdu michahnü kyüsehpü, nührü tsutpurü thsachonü, Abimelek abi kulilarü tsurü nührünü Shekem yangthsaba kangsohre.

¹⁹ Hütsüeko chünye nührünü Gideon ko abi kukhi te tu nguchiro, hütsü lümkhung nguchirü thsakhang, Abimelek te longlang ko abinü nührü chah longlangsohng.

²⁰ Mahkhang, Abimelek chahnü michang chüro Shekem ko Bethmillo trüp-pehsohng. Ko Shekem ko Bethmillo chahnü michang chüro Abimelek trüp-pehsohng.”

²¹ Hütsüpü amung Abimelek drüchonü, Jotham-nü rang tsicho ko wü Beer la licho.

²² Abimelek-nü Israel la kang asang yangthsacho.

²³ Hütsüpü, Tsingrangba-nü Abimelek e Shekem-rü kahla mükehmükhu chürosohcho ko arühnü abi nyüm yacho.

²⁴ Hütsü Abimelek ko Shekem-rü sürünü Gideon tsurü nyühre kyüsehsohnung müci mülahsohcho, arüh rühyangnung nengdang tikehcho.

²⁵ Shekem-rünü akhangchah Abimelek nyüm jümsohcho ko alahkhurü atümung chahnü arühnü kengchocho. Ko hütsü Abimelek-nü müdhecho.

²⁶ Hütsüde Ebed tsurü Gaal Shekem lang anirüti yola rocho ko Shekem-rünü abi chah longlangcho.

²⁷ Arüh atümung arüh shükusih yolang wü shükusih laacho ko cikih külüp-pü thsüti licho. Arühnü arüh Tsingrang amübü kulang wücho ko hütsüla tsuyong Abimelek müthsamünyücho.

²⁸ Gaal-nü yocho, “Ihsa Shekem-rü hi tuo?” Tuepü Ihsa Abimelek pohki liro? Abi tsü süo? Gideon tsurü. Ko Zebul-nü abi chahnü amülaba khyüre, ta tuepü Ihsa abi pohki linung? Nührü jümürü Hamor yochonyi lieng.

²⁹ Ih nührü michah langnürüelang, Ihnü Abimelek süsohnung. Ihnü abi te, “Nü rothsarü thali norung ko khataang” pü yonung.

³⁰ Khode Gaal-nü hütsüta chocho yangdi yangthsaba Zebul-nü yuchicho, abi mükünyangcho.

³¹ Abinü Aruma la Abimelek yang yusi hirü mütheh yocho, “Ebed tsurü Gaal ko anirüti Shekem la roko, ko arühnü nüh yangdila müzürosohnung rungnümko.

³² Hütsüeko ade, nüh ko nü nyitsarüti shomülangnü shehmüi rangmü la rang.

³³ Ko atunyang mütoh dhrongyengnü yangdi tsü mahng. Khode Gaal ko abi nyitsarütinü nyüm yanang nühnü kohchonü arüh chah thahpüng.”

³⁴ Achotsü Abimelek ko anyitsarütinü aromang tsünü shehmüi Shekem shündhün mülung müyü kang changnahpü rang pümcho.

³⁵ Khode Abimelek ko abi nyitsarünü Gaal chüro yangdi tbükhüm te ya ngucho, arühnü arüh rang pümcho lanü shemüsucho.

³⁶ Gaal-nü arüh ngu Zebul te yocho, “Dhing! Azonglang tsünü nyitsarü shicho jürole.” “Hütsüri nyitsarü mah.” Zebul-nü lalingcho. “Arüh tsü azongchah nbükhüm due.”

³⁷ Gaal-nü thali yocho, “Dhing! Azong alongtüshung lanü nyitsarü jürole ko mülung khüdulü amüchehrü langsingdongla tsünü tung jürole.”

³⁸ Hütsüde Zebul-nü abi te yocho, “Nüyu mülahbasü khülo-o? Abimelek pohki Ihsa tuepü linungpü yoba tsü nüh mado? Nühnü mükhimünguba nyitsarü tsü hirie. Ade shemüsu wü arüh te khataang.”

³⁹ Gaal-nü Shekem-rü nüpü wü Abimelek te khatacho.

⁴⁰ Gaal rang tsicho ta Abimelek-nü abi iiwücho. Yangdi tbükhüm lanü mii arüh khütang lerohpehcho.

⁴¹ Abimelek Aruma la licho ko Zebul-nü Gaal ko anirüti Shekem la mülisohnung iipehcho.

⁴² Nyümong khüu tsü Shekem-rü luhlang wünung lümchung lilepü Abimelek-nü müdhecho.

⁴³ Achotsü abinü anyitsarü nowü mülung asang kang changpü rangmü la tsü arüh jüm pümsohcho. Arüh yangdila tsünü chürochi ngude, abinü arüh kyüsehnung chürocho.

⁴⁴ Khode Abimelek ko abi mülungnü yangdi tbükhüm la tsü jümnung dhsüdhsa wücho, aparü mülung anyüh tsünü luh la lirü tsü apüm kyüsehcho.

⁴⁵ Khata tsü mükhyang khatacho. Abimelek-nü yangdi tsü mahchehcho, nyitsarüti kyüsehkhangcho, yangdi tsü thsangnyangjücho ko alih tsü mihnü thohti yohpüjücho.

⁴⁶ Khode Shekem la langnürütinü hütsü yuchicho, arühnü azengtacho Baal tsingrang amübükuh roshengvi yang kumünyinung shangcho.

⁴⁷ Arüh hütsüla shimükhong liba tsü Abimelek-nü müdhecho,

⁴⁸ achotsü abinü anyitsarü nüpü Zalmon Khang chah küducho. Hütsüla abinü püh khüdu hiro singjengza khüdu kyüsahcho, ko apünurü chahnü dhicho. Abinü anyitsarü te abi kyo zah nguchinung yocho.

⁴⁹ Hütsüta nyitsarü müipinü singjengza khüdu-khüdu kyüsahcho; ko arühnü Abimelek iithsa sing tsü roshengvi chah tsü zangbhümcho. Arühnü nyitsarü tsü ayonglang pümsohpü hütsüchah tsü michang thsürangcho. Ko hütsüla lirü khingkurü adhrerü hajar khüdu-o sücho.

⁵⁰ Hütsüpü Abimelek-nü Thebez lang wü yangdi tsü mükangticho ko hütsü mahchehcho.

⁵¹ Hütsüla roshengvi arangcheh khüdu licho ko yangdila lirü khingkurü adhrerü apüm hütsüla tsiyohcho. Arühnü arühbürü jangjangthsa ayonglangnü khangticho ko kumunglang tuwücho.

⁵² Khode Abimelek-nü hütsü mahnung rocho, abinü hütsüchah michang thsürangnung trahtrilang tsü wücho.

⁵³ Ta khingkurü khüdunü zahlung khüdu dhi athahchah kengjücho ko athah müprüpcho.

⁵⁴ Hütsüde abinü abi thsunohrü hiba dhrezaba tsü zahnü dsi yocho, “Nü nohsheng tohcheh Ih kyüsehng. Khingkurü khüdunü Ih müpsehchoepü müdangchisohnyüre.” Achotsü dhrezaba tsünü khakhu thracho ko abi sücho.

⁵⁵ Khode Israelrünü Abimelek sücho ngucho, arüh atümung kulang thalicho.

⁵⁶ Hütsüta Abimelek-nü au nyüm ko arüh jünirüti nyühre kyüsehcho mülih Tsingrangba-nü mülihcho.

⁵⁷ Shekem-rüsü arüh mütsacho nengdang, Gideon tsurü Jotham-nü chokehcholade yocho kyo Tsingrangba-nü arüh chongchasohcho.