YUKHARÜTI 7 - AMÜSA BAIBEL (BSI)

Gideon-nü Midian-rü Kohchehcho

¹ Nyümong khüdu Gideon ko abi nyitsarüti mütoh suropü wü Harod Kihna shündhün müdongcho. Midian-rü tsü More Zong te arüh tenü kihku lahpi angah la liyacho.

² Abüdongba-nü Gideon te yocho, “Midian-rü michah Ihnü akoh jünung nengdang nü nyitsarü drongrale. Arüh jangjang kohchoepü lüm arühnü Ih mükhichinung.

³ Hütsüeko müyurü te hita züdeing, ‘Sürünü drü lümro arüh thali tsieng. Ihrü hila Gilead Zong la liyanung.’” Hütsüde nyüh hajar mükyüpü anyüh thali tsicho, ta hajar dhüre nyingcho.

⁴ Hütsüpü Abüdongba-nü Gideon te yocho, “Adesü drongrale. Yongkhilang tsü arüh nojowüng ko nü nengdang hütsüla Ihnü arüh changsahjünung. Nyitsarü sü nü yola wünung Ihnü yonang, abi wünung. Nyitsarü sü nü yola müwünung Ihnü yonang, abi müwünung!”

⁵ Gideon-nü yongkhilang tsü arüh nojowücho ko Abüdongba-nü abi te yocho, “Füza kyo amülenü kih müyah yongrü ko mükhohnü thungpü yongrü papa khisahng.”

⁶ Khehnü khachehpü yongrü arüh thsih asang ko anyingcho tsü mükhoh thungpü yongrü thsacho.

⁷ Abüdongba-nü Gideon te yocho, “Ihnü kih khachehpü yongrü nyüh thsih asang tsü bichi Median-rü michah nü khyang akoh jünung. Aparü atümung kulang thali tsisohng.”

⁸ Hütsüta Gideon-nü arüh thsih asang khyang tsü thsunohrü ko rühti bisohcho, ta aparü Israelrü atümung kulang thalisohcho. Midian-rü tsü arüh pohki angah la liyacho.

⁹ Hütsü romang Abüdongba-nü yuzengjo Gideon te yocho, “Shemüsung ko arüh yang tsü mahng; Ihnü nü khyang hütsü michah akoh jüre.

¹⁰ Ta nühnü mahnung drükhang, nü kulirü Pura nüpü amüdonglang jowüng.

¹¹ Arühnü tu chotarünang nühnü yuchinung ko arüh mahnung müdrünung.” Achotsü Gideon-nü akulirü Pura nüpü arüh lichah achangka chii jowücho.

¹² Midian-rü, Amalek-rü ko azong nyitsarüti tsü angah la tsü khengqu tii kyo sühpücho ko kihbekhümla lihpi toi hütsüla arüh ut licho.

¹³ Khode Gideon chihcho, nyüh khüdunü amüyangrü khüdu te abi melang yocho abinü yuchicho. Abinü hita yocho. “Lüdinü külüpcho hümdhse khüdu Ihsa lichah khülu jüro Shükuh khüdu chah müpkeh Shükuh tsü khülutsu alih la yüpjo melangko.”

¹⁴ Amüyangba tsünü lalingcho, “Hütsü Joash tsurü Gideon, Israelrü nohsheng thsanung! Apa tu adüzü müthsanung! Tsingrangba-nü abi khyang Midian ko Ihsa rothsarü apüm michah akoh jüko!”

¹⁵ Khode Gideon-nü nyitsarüba melang tsü ko hütsü adüzü tsü yuchicho, abinü mükhoh thung Tsingrangba mübücho. Hütsüpü abinü Israelrü müdonglang thali wünü yocho, “Shemüsung! Abüdongba-nü Midian-rü rothsarü michah nührü khyang akoh jüko.”

¹⁶ Abinü anyitsarü thsih asang tsü mülung asang kang changnahcho ko nyitsarü müipi khyang rühti khüdu ko dsi ayonglang zehpü alihfüh khüdu-khüdu jücho.

¹⁷ Abinü arüh te yocho, “Khode Ih arüh lichah amünyeh chihnang, Ih dhing, ko Ihnü tu nguchinang hütsü kyo nguching.

¹⁸ Khode ihrü mülungnü rühti tsü mehnang, hütsüde nührüsü nührü rühti arüh lichah mükang mehng ko hita züdeing, ‘Abüdongba ko Gideon nengdang.’”

¹⁹ Gideon ko abi yola nyüh thsih khüdu yürüptülung chinyo rode, anyahrü mülitayeng, arüh müdongchah amünyeh chii rocho. Hütsüde arühnü rühti tsü mehcho ko arühnü biba füh tsü müpnahcho,

²⁰ ko aparü mülung anyüh tsünüsü hütsüta nguchicho. Arüh atümungnü fülilangnü dsi tsü bicho ko tsalangnü rühti tsü bipü züde, “Abüdongba ko Gideon nengdang nohsheng khüdu!”

²¹ Nyitsarü müipi yang tsü mükangmüla palu yaji la yacho ko arorüh rothsarü atümung drü tsipehcho.

²² Arühnü rühti tsü mehyade, Abüdongba-nü arorühti tsü nohshengnü arühbürü khatasohcho. Arühnü Zarethan langthring Beth Shita ko Tabat shündhün Abel Mehola chii rang tsicho.

²³ Hütsüpü Naftali, Asher ko Manase anyüding lanü nyitsarü dsipü arühnü Midian-rü iiwücho.

²⁴ Gideon-nü azong lih apümlang yuva mütheh yocho, “Midian-rü te khatanung jürung. Midian-rü keh mütsisohnung Jordan Yongkhi lanü Bethbara yongkhi chii mükangtieng.” Efraim la lirüti dsimükhong, arühnü Jordan yongkhi lanü Bethbara yongkhi chii mükangticho.

²⁵ Arühnü Midian-rü akurahrü anyüh Oreb ko Zeeb rangcho; ko arühnü Oreb tsü Oreb lung ko Zeeb tsü Zeeb Cikih nyehjila müpsehcho. Mütozah arühnü Midian-rü tsü iiwücho ko Gideon Jordan nyüchürolang liyade, abi yang Oreb ko Zeeb nyüh thah hirojücho.