YUKHARÜTI 6 - AMÜSA BAIBEL (BSI)

Gideon

¹ Adesü thalinü Israelrünü Abüdongba nyüm amünyi shitpahcho, hütsü khu arüh michah Midian-rü khyang kang dhünyeh yangthsasohcho.

² Midian-rü tsü Israelrü tenü re azeh-u thsacho ko Israelrünü arüh tenü lungkoh la ko akhang lih la rangcho.

³ Khodederü Israelrünü majüh lango shunang, Midian-rünü Amalek-rü ko azong nyitsarüti nüpü ro arüh mahcho.

⁴ Arühnü hütsüla licho ko kihjing lahpi Gaza mükang chii arüh tsahma thsangnyangjücho. Israelrü khyang tusü münyingjüpü san, misü ko gadu apüm khyüjücho.

⁵ Arühnü khengquti kyo arüh kanglungrü nüpü ko Shükuh hipü rocho. Arühbürü ko ut-ti tsü mükhilongcho. Arühnü ro alih thsangnyangjücho

⁶ ko Israelrünü arüh nyüm tu münguchichehcho.

⁷ Hütsüde Israelrünü Abüdongba te Midian-rü nyüm troungpü kihchicho,

⁸ ko Abinü arüh yang azikehrü khüdu müthehcho ko Abinü yusi hi arüh yang Abüdongba Israel Tsingrang chahnü hirocho. “Ijip la ayurü suro lanü Ihnü nührü nüchehcho.

⁹ Ijiprü ko hiba lih la nührü nyüm khatarü khehlanü Ihnü nührü khümchocho. Nührü wüde Ihnü arüh iipehjücho ko Ihnü nührü khyang arüh lih jücho.

¹⁰ Ih Abüdongba nührü Tsingrangepü nührü te yoko ko nührünü ade liyaba Amor-rü tsingrang mümübünung nührü te yoko. Ta nührünü I yocho münyi.”

¹¹ Hütsüde Abüdongba ninglang riwürü ro Ofra yang la Abiezer hung lanü Joash yo langsing pohki pümcho. Atsudhre Gideon tsü Midian-rü khyang müngusohnung cikih nyehji lanü litoh aza nyehchi yacho.

¹² Abüdongba ninglang riwürünü hütsüla abi te chüro yocho, “Abüdongba nüte zehle, Akurah ko athrungrü nyitsarü!”

¹³ Gideon-nü abi te yocho, “Abüdongba, Ihrü te Abüdongba zehkhang, tuepü ihrü chah hitoi tikehro? Abüdongba-nü thsayahiya hütsütoi nguchicho ko Ijip lanü nüchehcho ihrü tpurünü ihrü te yobasü khüta? Abüdongba-nü ihrü thrüchahchüpehko ko Midian-rü kheh la ihrü jüko.”

¹⁴ Hütsüde Abüdongba-nü abi te yuzengjücho, “Nü re amichahbala wüng ko Midian-rü khehlanü Israelrü khümchoung. Ipunü nüh müthehre.”

¹⁵ Gideon-nü lalingcho, “Ta Ihnü khüta Israelrü khümchonung? Manase hung la I tsutpu tsü azauba lile ko I kukhi la Ih azauba lile.”

¹⁶ Abüdongba-nü yocho, “Nühnü hütsü kohnung tunüo Ihnü nüh rükunung. Nühnü Midian-rü tsü nyüh khüdu roh-i du mülakhüti changjünung.”

¹⁷ Gideon-nü yocho, Nühnü lümkhang, yujeba Nüh tsü Abüdongba epü müdhenung yuzi khürü jüng.

¹⁸ Ihnü Nü khyang tsang mübü mühiro yingcheh yanglilüm tütsi. Abinü yocho, “Nüh müthalide Ih mütsinung.”

¹⁹ Achotsü Gideon-nü abi kulang züdu mizaza khüdu ko hüm süreh dhüre khyo bhüpza müyohpü hümdhse külüpcho. Abinü shuh tsü loh khüdula ko hikih tsü füh khüdula yohcho ko hiro langsing pohki jücho.

²⁰ Ninglang Riwürü tsünü yocho, “Shuh ko hümdhse tsü lung hichah kehpüng ko hütsü michah hikih tsü tungzieng.” Gideon-nü hütsüta nguchicho.

²¹ Hütsüpü Abüdongba ninglang riwüba tsünü abinü biba ja tsünü shuh ko hümdhse chah tsü thahpücho. Ko lung la tsünü michang chüro shuh ko hümdhse tsü müyahpehcho. Hütsüpü ninglang riwüba tsü mülipehcho.

²² Hütsüde Gideon-nü hütsü Abüdongba ninglang riwürü abinü ngukopü müdhe abinü drümüyang yocho. “Akohba Abüdongba, Ihnü Nü riwürü romih dhsükehta nguko.”

²³ Ta Abüdongba-nü abi te yocho, “Tbachi lieng! Tüdrü. Nüh müsünung.”

²⁴ Gideon-nü hütsüla Abüdongba khyang bholu khüdu külüp-pü hütsüte, “Abüdongba Atbachi” pü dsicho. (Hütsü Abiezer hung yo Ofra la ade yingcheh yale)

²⁵ Hütsü romang Abüdongba-nü Gideon te yocho, “Nüu misüpung ko apa misüpung khüdu kang dhünyeh azicho khyüng, nüu yo Baal bholu tsü thsangnyang ko hütsü müshüm liba Ashera tsingrang kyothri tsü müpnahpehng.

²⁶ Hütsü khangte Abüdongba-nü Tsingrang khyang bholu atsanü külüpm. Hütsüpü anyüuba misüpung tsü khyüng ko nühnü müpnahjüba Ashera kyothri tsü tahnü üpümshünü trüp mübü jüng.”

²⁷ Achotsü Gideon-nü akulirü dhüre nüpü Abüdongba-nü yocho kyo nguchicho. Hütsü anyümong nguchinung arüh tsutpu ko müyurü drüchonü, abinü hütsü amala nguchicho.

²⁸ Khode yangdila müyurüti nyangnyü khüu mütoh surocho, Baal bholu ko Ashera kyothri tsü müpnahpehpü ngucho ko hütsüla bholu khüdu külüp hütsüchah anyüuba misüpung tsü trüp-pü ngucho.

²⁹ Arühnü tsingtacho, “Hi sünüo?” Arühnü hütsü Joash tsurü Gideon-nüepü rangchehcho.

³⁰ Achotsü arühnü Joash te yocho, “Nü tsurü tsü hila nüchehng, ihrünü abi müpsehnung! Tunüo abinü Baal bholu thsangnyangnü Ashera kyothri müpnahko.”

³¹ Ta Joash-nü abi nyümrü atümung te yocho, “Nührünü Baal nengdang yarü mah-o? Abi khümrü mah-o? Sünü abi nengdang yarünang mütsingsede abi müpsehnung. Baal tsü tsingrang thsakhang, apu jangjang khümsohng. Athsangnyangba hi abi bholu lile.”

³² Hütsütinü Gideon te Jerubal dsicho, tunüo Joash-nü yocho, “Baal tsü apu jangjang khümsohng; athsangnyangba hi abi bholu lile.”

³³ Hütsüde Midian-rü, Amalek-rü ko lipilih la liba yuchoti apüm shimükhongcho ko Jordan yongkhi kehpü Jezrel Ngah la licho.

³⁴ Abüdongba nbünü Gideon nücho ko Abiezer yuchode abi khanglang rung pü yonung shulüm rühti mehcho.

³⁵ Abinü Manase anyüdinglang lirü yang abi khanglang ronung yuva müthehcho. Abinü Asher, Zebulun ko Naftali yuchoti yanglang abi yola zehnung yuva jücho ko arühsü ro zehcho.

³⁶ Hütsüpü Gideon-nü Tsingrangba te yocho, “Israelrü khümchonung Ih bichinungepü nühnü yoko.

³⁷ Ade, Ihnü litoh nyehjila shunbüh yohpüre. Anyangnyü alih la mahpü shunbüh chah du yingkih kehkhang, nühnü Ih bichinungepü Ihnü müdhenung.”

³⁸ Ko hütsüta tikehcho. Nyangnyü khüu mütoh Gideon suro abinü shunbüh tsü yümde kihnü mütpah-tbhü khüdu jeng yümchocho.

³⁹ Achotsü Gideon-nü Tsingrangba te yocho, “Ite zii tüchüro; I khyang khüdupi chosohng. Adesü shunbüh chah tsü khüdupi thsadsüdhingsohng. Ade, shunbüh tsü kungsohng ko alih tsü kyangsohng.”

⁴⁰ Hütsü romang Tsingrangba-nü hütsüta nguchicho. Nyangnyü khüu shunbüh tsü kung licho ta alih tsü yingkihnü kyangpü licho.