YUKHARÜTI 5 - AMÜSA BAIBEL (BSI)

Debora ko Barak nyüh Khi

¹ Hütsü nyümong Debora ko Abinoam tsurü Barak nyühnü khi hi thsacho:

² Abüdongba seing! Israelrünü khatanung dhrongchehko; Müyurünü künyangseh jopehko.

³ Nyieng, nührü yangthsarüti! Lasih jüng, nührü athsarüti! Ihnü khi thsanung, Israel Tsingrang, Abüdongba khyang Ihnü khi thsanung.

⁴ Abüdongba, khode Nühnü Seir zong pehjücho, Khode Nüh Edom lih lanü chürocho, alih shühchicho ko ning chahnü tsing longcho. Ho, nyükhilanü kih pohcho jürocho.

⁵ Sinai Abüdongba bete, akhang shühchicho. Israel Tsingrang Abüdongba bete azongnü shühchicho.

⁶ Anath tsurü Shamgar chichah, Jael chichah, arüh lih khu shitsehrü mülicho, ko shitsehrünü mürilangnü tsehcho.

⁷ Israel yangditi thrüchahchüpehcho Debora-nü mürode arüh adeng yacho, Israel nengdang atpa khüdu kyo.

⁸ Hütsüde alih la khata licho, Israelrünü tsingrang asi throde. Israel la nyüh hajar yüre yola, khürünü tsung mahkhang thsuh licho do?

⁹ I lasih Israel anüchirü te lile, künyangseh khakhuchüjürü yola. Abüdongba seing!

¹⁰ Nührü gadu athru chah pümrüti, Hi young, shuküp pümji chah pümrü ko ajingnü tsehrüti khüdederü wünang.

¹¹ Nyieng! Kihkong mükang amülung yuva, Abüdongba akoh dangchire, Israelrü akoh, hütsüde Abüdongba müyurü Yangdi lanü zeh jowücho.

¹² Nowüng, Debora, nowüng! Nowüng, khi thsaang, nowüng. Bekhu wüng, Abinoam tsurü Barak, arangyohrü notsieng.

¹³ Hütsüde yuje chorüti arüh langnürü yang jürocho; Abüdongba müyurü abi yang khatanung khyangchi jürocho.

¹⁴ Arüh Efraim la angahlang jüro, Benjamin hung ko arüh müyurü khanglang. Makhir lanü anüchirüti jüro, Zebulun lanü thsazirüti jürocho.

¹⁵ Isakar langnürüti Debora yola; ho, Isakar ko Barak mii, ko angah yang abi khanglang iicho. Ta Reuben hung changnahcho; arühnü ronung müdhrongcheh.

¹⁶ Tuepü arüh san khanglang nyehlicho? San nyahrü atii dsicho nyinung mah-o? Ho, Reuben hung tsü changnahko; arühnü ronung müdhrongcheh.

¹⁷ Gad hung Jordan nyüchürolang licho, ko Dan hung tsü kihkuh te, Asher hung tsü kihbekhümla; arüh kihjüp licho.

¹⁸ Ta Zebulun ko Naftalirü khatala arüh akang jücho.

¹⁹ Tanak la, Megido yongkhi shündhün, yangthsarüti ro khatacho; Kanan yangthsarütinü khatacho, ta arühnü taripi mühitsi.

²⁰ Chenghitinü ningchah khatacho; ning lahkhu tside, Sisera nyüm khatacho.

²¹ Kishon la kihmülümnü arüh wohtsicho Kishon Yongkhi Kihlohnü. Ihnü rezehnü bekhu wünung.

²² Hütsüde kuriti tsohchinü, arüh müzinü alih la dhrümchinü.

²³ “Meroz chah chokehcholaang” Abüdongba ninglang riwürü tsünü yore, “Chokehcholaang, hütsüla lirüti chah chokehcholaang. Abüdongba tronung arüh müro, rothsarü kyo abi nengdang khatajünung müro.”

²⁴ Khingkurü yola suro tsalatpü Jael, Ken-rü Heber nitpü, Shükuh la lirüti yola suro tsalatpü.

²⁵ Sisera-nü kih chingcho, ta abükyünü nyikih tihcho; abükyünü abi adhingtang tbhü la asu ayühyeh hirocho.

²⁶ Shükuh thüsing akheh khüulang, ahamsing kheh khüulang, Sisera chah hamcho ko athah drosohcho; athah khakhu hamcho.

²⁷ Abi shongkehcho, Khülu abükyü jingte abi shongkeh khülucho; Alih la khülu sücho.

²⁸ Sisera atpanü nyübongkhilanü dhingcho; Nyübongkhilanü chehdhingcho. “Tuepü abi nyübong akhüluba hitoi münuro?” Abükyünü yocho. “Tuepü abi kuriti hitoi münu müthaliro?”

²⁹ Abükyü te asithsalarünü lalingcho, ko abükyünü loli yocho.

³⁰ Kengcho changtanung yangchile, rothsarü müipi khingkurü khüdu mahkhang anyüh, Shü atsa Sisera nengdang, axüyohcho shü yangthsatpü nengdang.

³¹ Nü rorüh hütsüta süsohng, O Abüdongba, ta nü shangrüti nyü kyo visohng! Ko hütsü lih la kang yüre yangtsa licho.