YUKHARÜTI 4 - AMÜSA BAIBEL (BSI)

Debora ko Barak

¹ Ehud süpü, Israelrünü thali amünyi shitpahcho

² Achotsü Abüdongba-nü Hazor yangdila Kanan-rü yangthsaba Jabin khyang arüh mahsohcho. Rothsarü yola anüchiba tsü yangpirü Harosheth la liba Sisera licho.

³ Jabin idhse nyübong akhüluba thsih düku licho ko abinü Israelrü michah dee khingchi ko shühkhatohnü kang mükyü yangthsacho. Hütsüde Israelrünü Abüdongba yang atroba ching züdecho.

⁴ Ade Lappidoth nitpü Debora tsü azikehlarü khüdu licho ko hütsü shikhe Israelrü nengdang yukharü thsa licho.

⁵ Abükyünü Efraim azong lih Rama ko Bethel nyüh kahla sedong khüdu pohki lede pümcho ko Israelrünü abükyü te müchehnung hütsülang wücho.

⁶ Nyümong khüdu abükyünü Naftali la Kedesh yangdi lanü Abinoam tsurü Barak dsinung müthehcho. Abükyünü abi te yocho, “Abüdongba, Israel Tsingrang-nü nü khyang yuzeng hi jüre: ‘Naftali ko Zebulun hung lanü nyüh hajar dhüre nüng ko Tabor Zonglang iiwüng.

⁷ Kishon yongkhi la nührü nyüm khatanung Ihnü Jabin rothsarü anüchiba Sisera noronung. Abinü apu nyübong akhüluba ko rothsarü noronung, ta abi michah Ihnü nührü khyang akoh jünung.’”

⁸ Hütsüde Barak-nü lalingcho, “Nüh I yola rokhang Ih wünung, ta nüh mürokhang Ihsü müwünung.”

⁹ Abükyünü lalingcho, “He, Ih nü yola wünung, ta akoh nengse nüyo müthsanung, tunüo Abüdongba-nü Sisera tsü khingkurü khüdu kheh la jünung.”

¹⁰ Barak yola Kedesh lang Debora shemüsucho. Ko Barak-nü Kedesh la Naftali ko Zebulun hung dsiyohcho ko nyüh hajar dhüre abi khanglang iiwücho ko Debora abi yola wücho.

¹¹ Hütsütade Ken-rü Heber-nü Zananim la langsingdong amünyeh Kedesh la abi Shükuh külüp-pü licho. Abinü Mosa ajangnang Hobab trah Ken-rü tenü shehmüi tsipü licho.

¹² Khode Sisera-nü Barak tsü Tabor zonglang tuwükopü yuchicho,

¹³ abinü abi yo nyübong akhüluba thsih düku ko abi nyitsarü apüm dsicho ko yangpirü Harosheth lanü Kishon Yongkhi yang arüh wüsohcho.

¹⁴ Hütsüde Debora-nü Barak te yocho, “Wüng! Abüdongba-nü nüh nünung! Chünye abinü Sisera michah nü khyang akoh jüko.” Achotsü Barak-nü abi nyitsarü hajar dhüre yola Tabor khanglanü jowücho.

¹⁵ Khode Barak-nü abi rothsarü yola wü becho, Abüdongba-nü Sisera, abi nyübong akhüluba ko abi nyitsarüti apüm yola lümdhamasohcho. Sisera-nü abi nyübong akhüluba lanü jüro ajingnü drü tsicho.

¹⁶ Barak-nü nyübong akhüluba ko rothsarüti tsü yangpirü yo Harosheth chii iiwücho ko Sisera rothsarü apüm kyüsehcho. Nyüh khüdusü münyingcho.

¹⁷ Sisera-nü Kenit-rü Heber nitpü Jael Shükuh yang tsiwücho, tunüo Hazor yangthsaba Jabin-nü Heber tsutpu te yangtsa licho.

¹⁸ Jael-nü chüdu Sisera mütoh abi te yocho, “Adirü, I Shükuh la zürung. Tüdrü” Achotsü abinü züducho ko abükyünü abi achongsah la rangsohcho.

¹⁹ Abinü abükyü te yocho, “I khyang kih shingo tieng; Ih xosehle.” Abükyünü nyikih shinga khangthru abi khyang tihcho ko thali rangsohcho.

²⁰ Hütsüta abinü abükyü te yocho, “Trahtri la tsü yaang ko khürü ro hila khürü müro-opü tsingdhingkhang, süsü müropü young.”

²¹ Sisera tsü kyahsehchonü yüpsehpecho. Achotsü Jael-nü Shükuh thüsing khüdu ko ahamsing khüdu bipü khai küdu sing tsünü anangrih lanü khakhu alih la hamrang hamseh süsohcho.

²² Khode Barak Sisera yangchi rocho, Jael-nü chüdu abi mütoh abi te yocho, “Rung! Nühnü yangchiba nyitsarü tsü Ihnü nüte ngusohnung.” Achotsü abinü abükyü yola wücho ko hütsüla Sisera alih la athah khakhu hamseh so jocho.

²³ Hütsü nyümong Tsingrangba-nü Israelrü khyang Kanan-rü yangthsaba Jabin michah akoh jücho.

²⁴ Arühnü abi müchangsohde alaa alaa abi nyümcho.