YUKHARÜTI 21 - AMÜSA BAIBEL (BSI)

Benjamin Hung nengdang Nitpürü

¹ Khode Israelrü Mizpa la shimükhongcho, arühnü Abüdongba te yuchüm khüdu külüpcho: “Benjaminrü sü khyangsü Ihsa tsularüti mükhyüsohnung.”

² Hütsünü Israelrünü wü Bethel la Abüdongba te nyüzeh pümcho. Arühnü dee thsengnü züde longricho:

³ “Abüdongba, Israel Tsingrang, tuepü hita tikehcho? Israel lanü khütapü Benjamin hung changnung?”

⁴ Nyangnyü khüu tsü müyurütinü hütsüla bholu khüdu külüpcho ko akehta kangmübü ko üpümshünü kangmübü trüpcho.

⁵ Arühnü tsingdhingcho, “Mizpa la Abüdongba yang shimükhongde Israelrü hung khürü müzehcho mah-o?” (Mizpa lang sü müwünang süsohnungpü arühnü yuchümpü licho.)

⁶ Israelrünü arüh jünirü Benjaminrü shulüm dhsa lümchonü yocho, “Chünye Israel hung khüdu chahko.

⁷ Nying liba Benjaminrü khyang khingkurü khüdenü khyüjünung? Tunüo Ihsanü arüh khyang Ihsa tsularüti mükyüsohnung Abüdongba te yuchümko.”

⁸ Arühnü Mizpa lang Israelrü hung khürü dusü müwücho mülinangpü tsingdhingde, Gilead lanü Jabesh-rü süsü müzehchoepü rangchehcho;

⁹ arüh neng dside Jabesh lanü sünüsü mülengchocho.

¹⁰ Achotsü ashimükhongnü athrungrü hajar dhüreanyüh yuzeng hi jo wüsohcho, “Wüng ko Jabesh la khingkurü azarü zeh atümung kyüsehng.

¹¹ Adhrerü apüm ko khingkurüsü amümüthsengcheh apüm kyüsehng.”

¹² Jabesh-rü yola arühnü amüthsengcheh lazarü nyüh thsih müyü ngucho, achotsü arüh tsü Kanan la liba Shiloh yang norocho.

¹³ Hütsüpü ashimükhong tsünü Rimon Lung la liyarü Benjaminrü te tsü adelü khata changkarepü yuva müthehcho.

¹⁴ Benjaminrü tsü thali rocho ko arüh khyang Jabesh lanü mükyüsehpü nororü khingkurüti tsü jücho. Ta arüh nengdang mükükyücho.

¹⁵ Müyurütinü Benjaminrü nengdang tsü dhsa lümjücho, tunüo Israelrü hung kahla akehta tsü Abüdongba-nü thsangnyangjücho.

¹⁶ Achotsü ashimükhongla langnürütinü yocho. “Benjamin hung la khingkurü mühle. Ko arüh amüjehrü nengdang Ihsanü khüdenü khingkurü jünung!

¹⁷ Israelrü hung khüdusü müchangnungbae. Ihsanü arüh nengdang lang khüdu yangchibae,

¹⁸ ta Ihsanü arüh khyang Ihsa tsularüti müjücheh, tunüo sünü Benjaminrü khyang Ihsa tsularüti khyüsohnang abilü Ihsanü chokehcholako.”

¹⁹ Hütsüde arühnü lümcho, “Shiloh la kang mükhu Abüdongba thsüti chii role.” (Shiloh tsü Bethel kihku lahpi, Lebona kihjing lahpi ko Bethel e Shekem kahla langla nyüchürolang licho.)

²⁰ Arühnü Benjaminrü te tsü yocho, “Wüng ko shükusiluh la rang chehdhing yaang.

²¹ Khode Shiloh-larü thsütila tsü nyiichinung chüronang, nührünü Shükusih luh la tsünü chürung. Arüh yola tsünü nührü müipinü khingkurü khüdu-khüdu rang ko Benjamin lih lang nührü te nowüng.

²² Arüh aurü mahkhang amungrü ro nührü te yatikhang nührünü hita young, ‘Yanglilüm ihrü khyang arüh khyüsohng, tunüo ihrünü arüh khata lanü ihrü nitpürü thsanung khyürü mah. Ko nührünü ihrü khyang arüh jürü mah, hütsüeko nührü yuchüm thsangnyangcho mülang mühle.’”

²³ Benjaminrü tsünü hütsüta nguchicho; arüh müipinü Shiloh la nyiichiyarü yola tsünü arüh nitpürü thsanung khüdu-khüdu throcheh notsicho. Hütsüpü arühnü arüh lih lang wücho, arüh yangdi külüpchicho ko hütsüla licho.

²⁴ Hütsütapü anyingcho Israelrü tsü tsicho ko arüh atümung palu hung, palu kukhi ko thsiking yangchi thalicho.

²⁵ Hütsü shikhe Israel la yangthsarü mülicho. Nyitsarü müipi palu thsanyücho thsa licho.