YUKHARÜTI 20 - AMÜSA BAIBEL (BSI)

Israelrünü Khatanung Küdangcho

¹ Kihku lahpi Dan lanü kihjing lahpi Beersheba chii ko nyüchürolang Gilead lih chiinü Israelrünü adsiba tsü lalingcho. Arühnü Mizpa la Abüdongba liba la khüdu kang shimükhongcho.

² Ko hiba Tsingrangba müyurü shimükhongbala Israel hung apüm lanü langnürüti zehcho ko alih la rothsarü arüh lakh müyü licho.

³ Hütsüde Benjaminrünü Israelrü aparülü Mizpa la shimükhongko pü yuchicho. Israelrünü tsingdhingcho, “Nguchi amütsa hi khüta tikehchonang ihrü te young?”

⁴ Asütpüh anii Levibanü lalingcho, “I ashamtpü Ihjü Benjamin lih Gibea la romango kyahshangnung wücho.

⁵ Aromang tsü Gibea-rünü Ih mahnung ro kuh becho. Arühnü Ih müpsehnyücho; ta hütsü mülih arühnü I ashamtpü te khing thsangnyangcho ko abükyü sücho.

⁶ Achotsü Ihnü abükyü fü hirocho ko khanahpü Israel hung dhüreanyüh müipi yang khüdu-khüdu mühehcho. Hiri nyitsarünü Ihsa yola amünyi ko amümüsa nguchi nguchiko.

⁷ Nührü hila yarü atümung Israelrüe. Hi nengdang Ihsanü tu nguchinung?”

⁸ Nyitsarü atümungnü shemüsu yocho, “Shükuh la liba thsanye ko kuh tsala liba thsanye Ihsa süsü kulang müthalinung.

⁹ Ihsanü hita nguchinung; Ihsanü zii thsadhing Gibea mahnung nyitsarü khürü throchehnung.

¹⁰ Israel la lirü nohlüm dhürela nohlüm khüdunü rothsarü khyang tsuyongnung müchinung, ko anyingcho tsünü wü Israel la nguchi amütsa hi nguchicho shulüm Gibea-rü khingchinung.”

¹¹ Achotsü Israel la nyitsarü apümnü hütsüba yangdi mahnung nahdhingkeh la shimükhongcho.

¹² Israel hungtinü Benjamin lih apümlang yusi hi yonung wüsohcho, “Nührünü hi tu nguchicho?

¹³ Gibea la nyitsarü mabomashirüti tsü ihrü kheh la khülo ko Israel lanü hiba amünyi khyümüipehnung, ihrünü arüh müpseh pehnung.” Ta Benjaminrü hungnü hütsüri nangyüthsa pehjücho.

¹⁴ Ko Benjamin yangditi apüm lanü hiri Israel aparü te khatanung Gibea yang shibülungcho.

^15-16 Hütsü nyümong arühnü yangditi lanü rothsarü nyüh hajar mükyüpü dhüroh dsibülungcho. Hirichah lahkeh, Gibea lanü fülitsung adhrerü nyüh thsih dhünyeh shibülungcho. Arüh atümungnü kuva püm khüdu mii müthsamehpü lung tsamüthehnung koh licho.

¹⁷ Benjamin hung mükhipü Israelrü aparü dunü athsachehcho rothsarü lakh müyü norocho.

Benjaminrü Nyüm Khata

¹⁸ Israelrünü Bethel la amübükuh yang wücho ko hütsüla arühnü Tsingrangba te tsingdhingcho, “Benjaminrü tsü tu hungnü akhu mahnung?” Abüdongba-nü lalingcho, “Juda hung.”

¹⁹ Achotsü Israelrünü nyangnyü khüu shemüsu wü Gibea yangdi shündhün müdongcho.

²⁰ Benjaminrü mahnung rothsarü tsü yangdi lahpi be pipü thseh pümsohcho.

²¹ Benjaminrü rothsarü yangdila tsünü chürocho ko mümah-edenü Israelrü rothsarü hajar mükyüpü anyüh kyüsehcho.

²² Achotsü Israelrünü wü amübükuh la Abüdongba te maanü meshücho.

²³ Arühnü abi te tsingdhingcho, “Ihrü jünirü Benjaminrü nyüm ihrünü adesü wü khatanung mah-o?” Abüdongba-nü lalingcho, “Ho wüng.” Hütsünü Israel rothsarüti rezehchicho ko arühnü akhudi nyümong kyo thseh pümcho.

²⁴ Arühnü anyüpiu Benjamin rothsarü nyüm shemüsucho.

²⁵ Ko anyüpiusü Benjaminrünü Gibea lanü chüro hütsü nyümong Israelrü athsachehrü rothsarü nyüh hajar dhürekeh kyüsehcho.

²⁶ Achotsü Israelrü apümnü Bethel lang tuwü meshücho. Arühnü hütsüla Abüdongba te müyangtsupü maa pümcho. Arühnü akehta amübü ko üpümshünü kangmübü Abüdongba khyang jücho.

²⁷ Hütsü bekhyah Tsingrangba Yuzeng Singdi hütsüla licho ko Aron shümtsurü ko Eleazar tsurü Finehas-nü hütsü xüküm licho.

²⁸ Müyurünü Abüdongba te tsingdhingcho, “Ihrü jünirü Benjaminrü nyüm thali khatanung a pehjünung?” Abüdongba-nü lalingcho, “Khataang. Atu Ihnü nührü khyang arüh michah akoh jünung.”

²⁹ Achotsü Israelrünü Gibea mükang khürü jüm pümsohcho.

³⁰ Hütsüpü arühnü asang nyümongsü Benjaminrü nyüm shemüsucho ko akhudi kyo Gibea lahpi be pipü rothsarüti pümsohcho.

³¹ Benjaminrünü khatanung chürocho ko yangdila tsünü arüh münyeh tsicho. Akhulang kyo arühnü Bethel lang wüba ko Gibea lang wüba langla jungchah Israelrü tsü khürü kyüsehcho. Arühnü Israelrü sangreo kyüsehcho.

³² Benjaminrü tsünü yocho, “Akhudi kyo ihrünü arüh kohko.” Ta Israelrü tsünü arüh lang papa la münyeh tsinung lümchung külüpcho.

³³ Israelrü alangkhurü tsünü shehli Baaltamar la tsübülungde, Gibea mükang rang pümrütisü shichehcho.

³⁴ Israel nyüh hajar dhüre tsünü Gibea mahcho ko dee zii khatacho. Benjaminrünü arüh riri changjünungepü mümüdhecho.

³⁵ Abüdongba-nü Israel khyang Benjamin rothsarü michah akoh jücho. Hütsü nyümong Israelrünü nyüh hajar mükyüpü münga thsih khüdu kyüsehcho

³⁶ ko Benjaminrünü bürünü arüh kohchehko pü lümchehcho. Israel rothsarü alangkhurü tsü shehlicho, tunüo Gibea mükang thseh pümsohrü tsü arüh alongdi thsacho.

Israelrünü Khüta Kohcho

³⁷ Hiri tsünü Gibea lang tsü tsohsho züdupü yangdila lirü apüm kyüsehcho.

³⁸ Israelrü alangkhurü ko thseh pümrüti tsü amüdhethsa khüdu külüpcho. Khode arühnü yangdila tsü mikhu nyükhi roh-i phung ngunang,

³⁹ Israelrü khata ngah la lirüti tsü ximüla ronung. Hütsüdelü Benjaminrünü Israelrü nyüh sangre kyüsehpü licho. Arühnü lümcho, “Akhudi roh-i ihrünü arüh kohko.”

⁴⁰ Hütsüde yangdila tsü amüdhethsa tsü mikhu nyükhi kyo phungcho arühnü ngucho. Benjaminrünü ximüla dhingde, arüh yangdi trüpkhang yacho ngu nyekacho.

⁴¹ Hütsüde Israelrü tsünü ximülacho ko Benjaminrü mütishosohcho, tunüo arüh achangkhangrüepü müdhecho.

⁴² Arühnü Israelrü tenü shehli rangmülang tsicho, ta mütsiphucho. Arüh tsü Israelrü alangkhurü ko yangdilangnü chürorü kahla beticho ko arüh changcho.

⁴³ Israelrünü arorüh tsü arüh rahla xohcho ko Gibea nyüchürolang chii arüh iiwü kyüsehkhangcho.

⁴⁴ Benjaminrü athrungrü dunü nyüh hajar dhürekeh kyüsehcho.

⁴⁵ Ko aparü tsü Rimon Lung yang ximüla rang tsicho. Langlanü arüh hajar münga kyüsehcho. Israelrünü anyingcho tsü Gidom lang iiwünü nyüh hajar anyüh kyüsehcho.

⁴⁶ Hütsü nyümong Benjaminrü athrungrü dunü apüm yohrüta nyüh hajar mükyüpü münga kyüsehcho.

⁴⁷ Ta arüh nyüh thsih dhürohlü Rimon Lung lang lipilih lang wü tsichehcho ko arühnü hütsüla choo müyü licho.

⁴⁸ Israelrünü thali wü anyingcho Benjaminrü khingkurü, adhrerü ko azarü ko kanglungrü apüm kyüsehcho. Arühnü hütsü lih la yangdi apüm trüp-pehjücho.