YUKHARÜTI 19 - AMÜSA BAIBEL (BSI)

Leviba ko Ashamtpü

¹ Hütsü bekhyah Israelrü michah yangthsarü müliede, Levirü khüdu Efraim azong lih ashu wüpü liba la licho. Abinü Juda la Bethlehem lanü khingkurü khüdu asham thsanung khyücho,

² ta abükyünü wahnü Bethlehem lang aurü kulang thali wücho ko hütsüla choo müyü licho.

³ Achotsü abinü abükyü yanglang wü thali rung pü kihchonung dhrongchehcho. Abinü abi yola akulirü ko gadu anyüh nüpü wücho. Khingkutpü tsünü abi tsü kuh la nüyohcho ko aunü abi ngu abi künyangseh khyüchocho.

⁴ Aku tsünü hütsüla mungnung kihchicho, achotsü abinü nyümong asang mungcho. Anyüh hütsüla müjang tsuyong müdongcho.

⁵ Amüyüu nyangnyü tsü anyünü shemüsu tsinung küdangcho. Ta akunü Leviba te tsü yocho, “Akhu lango dusü tsuyong. Hütsüpü du shemüsung.”

⁶ Hütsüta anyünü pümpü müjang tsuyongcho. Hütsüpü akunü abi te yocho, “Yanglilüm shomülanglü hila künyangta yüpm.”

⁷ Leviba tsünü tsinung shemüsucho, ta akunü dee kihchichonü, hütsüla romang khüdu thali yüpcho.

⁸ Amüngau nyangnyü tsü mütoh abinü tsinung shemüsucho, ta akunü yocho. “Yanglilüm lango dusü tsung. Nyü dhsengpü du shemüsung.” Achotsü anyüh tsü müjang tsuyongcho.

⁹ Khode abi, ashamtpü ko abi kuliba arüh tsü tsinung shemüsucho, akunü yocho, “Dhing, dee nyüzehko; shomülanglü yüpm. Zah mapehnung; shomülanglü hila künyang yüpm. Atunyang du mütoh suropü shemüsu tsieng.”

¹⁰ Ta abinü adelü thali hütsüla müyüpnyücho, achotsü abi ashamtpü, kulirü ko khe hiba gadu anyüh zeh shemüsucho.

¹¹ Arüh Jebus (hütsü, Jerusalem) chii rodelü mapehcho. Achotsü akulibongnü abüdongba te tsü yocho, “Ihsanü Jebus-rü yangdi hila shomülang nyehli yüpnung khüta?”

^12-13 Ta abi abüdongba-nü yocho, “Ihsanü Israelrü yangdi müthsacholalü münyehlinung. Ihsanü azachah wüpü Gibea mahkhang Rama la yüpnung.”

¹⁴ Achotsü arühnü Jebus lahkhu tsicho ko arüh Benjamin hung lih la Gibea chii rodelü mapehcho.

¹⁵ Arühnü wü hütsüla nyehkehnung ximüla züducho. Arühnü yangdila tsü züducho ko langtpah la tsü pümcho, ta sünüsü arüh münüyohcho.

¹⁶ Arüh hütsüla püm lide, luhlangnü ashirü nyüh khüdu lungcho. Abi azong lih Efraim lanü licho, ta ade abi Gibea la liyacho. (Hütsüla aparü tsülü Benjamin hung lanü licho.)

¹⁷ Ashiba tsünü langtpah la arüh ngu tsingdhingcho, “Nührü khüdenü roro ko khüde würo?”

¹⁸ Leviba tsünü lalingcho, “Ihrü Juda la Bethlehem lang wücho ko ade ihrü azong lih Efraim lang thalire.

¹⁹ Ko ihrü gadu nengdang tsuyongnung ko manying, ko Ih, I ashamtpü ko I kulirü nengdang hümdhse ko cikih lile, ta shomülang nengdang sünü münüyohre. Ihrü dhsütah kükyo lile.”

²⁰ Ashiba tsünü yocho, “Nührü I kuh la müdong! Ihnü nührü xükümnung; Nührü yanglongla mümüdongnung.”

²¹ Hütsüta abinü arüh abi kulang nowücho ko arüh kanglungrüsü yangtüpcho. Abi shirütinü arüh jing thsütohcho ko tsuyongcho.

²² Arüh hütsüla müdong lide, dhrongyengnü yangdila mabomashirütinü ro kuh tsü becho ko kukhangchah hamchicho. Arühnü ashiba te tsü yocho, “Nü yola roba nyitsarü tsü nochürung! Ihrünü abi te mükhongnung.”

²³ Ta ashiba tsünü chüdu arüh te yocho, “Shangrüti! Yanglilüm do! Hitari nguchi amütsa tünguchi. Nyitsarü hi I shirü lile.

²⁴ Dhing! Hila abi ashamtpü ko amüdhsengcheh I tsulatpü lile. Ihnü ade arüh norojünung. Nührünü tu nguchinyüro arüh te nguchieng!” Ta hitari athrünyinung tünguchi.

²⁵ Ta arühnü abi yu münyicho. Achotsü Levibanü abi ashamtpü dongkhu arüh khyang nüchehchü jücho. Arühnü abükyü te müyüp khing mükhongcho ko tsingse yingcheh bichicho.

²⁶ Anyangnyü mütoh khingkutpü tsü anii pümba ashiba kulang tsü rocho ko trahtri te khülu tsingse yingcheh abükyü hütsüla yüpjocho.

²⁷ Anyangnyü tsü anii tsü shemüsu kukhang khangthrunung wüde, abi ashamtpü tsü trahtri lang akheh müyungchü so jocho.

²⁸ Abinü yocho, “Shemüsung. Ihsanü tsinung.” Ta tu mülalingcho. Achotsü abinü Gadu chah dhikeh hipü kulang shemüsucho.

²⁹ Khode abinü ro chihcho, kuh la züdu ko noh khüdu hirocho. Hütsüpü abinü abi ashamtpü fü tsü hirocho ko dhüreanyüh kang khanahpü Israelrü hung müipi khyang khüdu-khüdu mühehcho.

³⁰ Hütsü ngurü atümungnü yocho, “Ihrünü hi kyo khodesü müyuchidhing. Israelrü Ijip lih lanü chüro nyümong tinü chünye yingcheh hitari khodesü mütikehdhing. Hi nengdang lango nguchinung! Hütsü tu thsanung?”