YUKHARÜTI 14 - AMÜSA BAIBEL (BSI)

Samson ko Timna lanü Khingkurü

¹ Nyümong khüdu Samson-nü Timna lang jowücho ko hütsüla Filistinlarü khüdu ngucho.

² Abinü kulang thalicho ko au e atpa nyüh te yocho, “Timna la Ihnü Filistinlarü khüdu nguko ko Ihnü hütsü müire. I nitpü thsanung abükyü I khyang norojüng.”

³ Ta au e atpa nyühnü abi te yocho, “Tuepü müyudsirü Filistinlarü nü nitpü thsanung khyünung? Ihsabürü lih la, Ihsabürü yucho lanü khingkurü müngunung do?” Ta Samson-nü au te yocho, “Hütsütpi du tsü I khyang khyüjüsohnyüre. Ihnü abükyü müire.”

⁴ Hütsüta nguchinung Abüdongba-nü Samson nürepü abi tpurünü mümüdhe, tunüo Filistinrü te khatanung Abüdongba-nü thsatsa tsa khüdu jüm licho. Hütsü shikhe Israel tsü Filistinrünü yangthsathsa licho.

⁵ Achotsü Samson-nü Timna lang au e atpa nyüh yola jowücho. Arüh Shükusih luh khüdu lahkhu tsi yade, abinü kihkhünyingza reng yuchicho.

⁶ Dhrongyengnü Abüdongba ziinü Samson rezehsohcho, ko abinü mizaza khüdu roh-i du kihkhünying tsü akhehshühnü rehnahcho. Ta abinü nguchiba tsü aurü te müyocho.

⁷ Hütsüpü abinü wü khingkutpü te tsü chotacho ko abinü abükyü tsü mürüpcho.

⁸ Azachah lipü Samson-nü abükyü te kuthrinung thali wücho. Langla abinü müpsehba kihkhünying tsü dhingnung mütrahyohcho, ko dhing, asücho füla tsü thsah ko thsakukih keh ngucho.

⁹ Abinü thsakukih tsü akheh la mürahcho bipü langla tsu wücho. Hütsüpü abinü atpa e au nyüh yanglang wücho ko anyüh khyangsü khürü jücho. Arühnü hütsü tsucho, ta arüh te Samson-nü hütsü kihkhünying asücho fülanüepü müyocho.

¹⁰ Aunü khingkutpürü kulang wücho ko hütsüla Samson-nü thsüti jücho. Hi dhrezarü yola yangthsa khüdu licho.

¹¹ Khode Filistinrünü abi ngucho, arühnü abi te müyangtanung dhrezarü sangre müthehcho.

^12-13 Samson-nü arüh te yocho, “Ihnü nührü te thohdüzü khüdu tsingdhingnung. Kukangba thsüti mükhude nyümong dhünyeh kahla nührünü yochehkhang Ihnü, ko müyocheh khang nührünü shü ariri anana sangre ko thsüti jengki sangre jütanung.” Arühnü yocho, “Nü thohdüzü tsü yodhing, ihrünü nyidhingnung.”

¹⁴ Abinü yocho, “Atsubong chahnü lango atsunung chüroko; Rezeh khüdu chahnü lango anyiyah chüroko.” Nyümong asang khanglang mii arühnü thohdüzü tsü müdüzüchehcho.

¹⁵ Amüyüu nyümong arühnü Samson nitpü te yocho, “Thohdüzü tsü yosohnung nü nii tsü kihchoung. Mahkhang nüurü kuh la michang thsürangjünung ko hütsüla nüh trüpsehsohnung. Ihrü chahnü rohcho khyünung, nühjünü ihrü dsiyohcho ang?”

¹⁶ Achotsü Samson nitpünü abi yanglang wünü tra yocho, “Nühnü Ih mümüi! Nühnü Ih thrünyire! Nühnü I shangrüti te thohdüzü yoko, ta Ite hütsü adüzü müyo!” Abinü yocho, “Dhing, Ihnü Itpa e uwa nyüh te mii hütsü müyo. Khang khütapü nüte yonung?”

¹⁷ Hütsü nengdang abükyünü thsüti ayung nyümong dhünyeh tracho. Ta dhünyeh nyümong khura tsingchonü abinü arangyu adüzü tsü abükyü te yocho. Ko hütsü abükyünü Filistinrü te yocho.

¹⁸ Hütsünü dhünyeh nyümong tsü, Samson müyüp-ede arühnü züdu abi te yocho, “Thsakukih tenü anyiyah-u tu? Kihkhünying tenü rezeh-u tu?” Samson-nü lalingcho. “I misü athsühinü alih tsü müdhrümnahjürelang, nührünü adüzü ade mümüdhenung.”

¹⁹ Dhrongyengnü Abüdongba ziinü abi rezeh kangsohcho ko abinü Ashkelon lang jowü hütsüla nyüh sangre müpsehcho, ko arüh jengki tsü khoh thohdüzü yochehrüti khyang jücho. Hütsüpü abi rihlong chüro kulang thali tsicho.

²⁰ Ko anitpü tsü kukangde abi müyangba khyang jücho.