YUKHARÜTI 13 - AMÜSA BAIBEL (BSI)

Samson Surocho

¹ Israelrünü Abüdongba nyüm thali amünyi shitpahcho ko abinü arüh michah Filistinrü khyang kang yüre yangthsasohcho.

² Hütsü shikhe Zora yangdilanü nyüh khüdu anengnü Manoa licho. Abi Dan hung la khiyoh khüdu licho. Anitpünü khodesü azarü mülicho.

³ Abüdongba ninglang riwürünü abükyü te chüro yocho, “Nüh pümdongcho ko tsuzarü mühle, ta tunyah mülipü nüfü müdeng kangnung ko azarü khüdu suronung.

⁴ Hütsüeko müzahmükieng, yongkha mahkhang phüpkih tüyong, mahkhang ayaticho tsuyongba tütsu;

⁵ ko azarü tsü suropü, nühnü khodesü akuva tühehjü, tunüo abi suro nyümong tinü abi Tsingrangba khyang müsacheh Nazirit linung. Abinü Israelrü Filistinrü khehlanü khümchonung nguchimüsunung.”

⁶ Achotsü khingkutpü tsünü wünü anii te yocho, “Tsingrangba nyitsarü khüdu I yanglang rocho ko abi Tsingrangba riwürü kyo adrünung khüdu licho. Abi khüdenü rochonang Ihnü mütsing ko abinü anengsü Ite müyo.

⁷ Ta abinü Ifü müdeng kangnung ko azarü khüdu nümüsunungepü yoko. Abinü Ite yongkha mahkhang yongkha azi mahkhang ayaticho tsuyongba mütsunung yoko, tunüo azaba tsü abi akangli ayung, Tsingrangba khyang Nazirit kang müsachehnung.”

⁸ Hütsüde Manoa-nü Abüdongba te dangkhidangnangcho, “Abüdongba! Yanglilüm Nühnü müthehba nyitsarü tsü ronü azaba tsü suropü khanglang ihrünü tu nguchinung ihrü te yosohng.”

⁹ Manoa-nü tsingcho kyo Tsingrangba-nü nguchicho ko abi riwürü tsü khingkutpü luh la pümde rocho. Hütsüde anii Manoa tsü hütsüla mülicho,

¹⁰ achotsü abükyünü shang wüpü yocho, “Dhing, atü I yanglang roba nyitsarü thali roko.”

¹¹ Manoa-nü shemüsu anitpü khanglang iiwücho. Abinü nyitsarüba yanglang wünü tsingdhingcho, “I nitpü te chotaba nyitsarüsü nüh mah-o?” Abinü lalingcho, “Ho.”

¹² Hütsüde Manoa-nü tsingdhingcho, “Nüyu tikehde, akhunga tsünü tu nguchinung? Abi khütari akang lisohnung?”

¹³ Ninglang riwüba tsünü lalingcho, “Ihnü nü nitpü te tu yocho hütsü lüpcho nguching.

¹⁴ Abükyü shüsinü külüpcho tusü mütsubae; abükyünü yongkha mahkhang phüpkih tusü müyongbae mahkhang yaticho tsuyongnung tusü mütsubae. Ihnü abükyü te yocho adhangpi abükyü khyang nguchisohng.”

^15-16 Manoa-nü hütsü Abüdongba riwürüepü mümüdhecho, achotsü abinü abi te yocho, “Yanglilüm mütsipü ying. Nü khyang mizaza khüdu rungnümjünung.” Ta riwüba tsünü yocho, “Ih nyehlinye, Ihnü nü tsang mütsunung. Ta nühnü rungnümnyükhang, hütsü Abüdongba khyang trüp mübü kang jüng.”

¹⁷ Manoa-nü lalingcho, “Nüyu tikehde ihrünü Nüh hechinung shulüm, ihrü te Nü neng young.”

¹⁸ Ninglang riwüba tsünü yocho, “Tuepü nührünü I neng müdhenyüro? Hiba hi anyemüyangnung neng lile.”

¹⁹ Achotsü Manoa-nü mizaza khüdu ko tsang azikyah hiro anyemüyangnung nguchiba Abüdongba lung bholu chah mübücho.

^20-21 Bholu chah mihmüle tsü trude, Manoa ko anitpü nyühnü Abüdongba riwürü tsü mihmüle la ninglang tuwü ngucho. Hütsüde du hütsü Abüdongba Riwürüepü Manoa-nü müdhecho ko anitpü anyüdingnü alih la hüpkehcho. Arühnü riwüba tsü khodesü thali müngucho.

²² Manoa-nü anitpü te yocho “Ihjü süririe, tunüo Ihjünü Tsingrangba nguko.”

²³ Ta anitpünü lalingcho, “Abüdongba-nü Ihjü süsohnyürelang, abinü Ihsa amübü mükhyüchopü linung; abinü hiri apüm müngusohnung ko hiri müyonung.”

²⁴ Khingkutpü tsünü azarü khüdu nümüsucho ko aneng Samson dsicho. Azaba tsü zicho ko Abüdongba-nü abi müwajücho.

²⁵ Ko abi Zora e Eshtaol nyüh kahla Dan la lide, Abüdongba ziinü abi rezehsohnung dikehcho.