YUKHARÜTI 12 - AMÜSA BAIBEL (BSI)

Jeftha ko Efraimrü

¹ Efraimrünü khatanung rungnümcho; arühnü Zafon lang Jordan Yongkhi keh wüpü Jeftha te yocho, “Tuepü Amon-rü te khatanung ihrü müdsipü lurü khu wücho? Ihrünü nü thah chah nührü kuh trüpjünung!”

² Ta Jeftha-nü arüh te yocho, “Ih ko I müyurüti Amon-rü te khütang nyümta licho. Ihnü nührü dsiko ta arüh khehlanü nührünü Ih mükhümcho.

³ Nührünü Ih mükhümchochehnungepü müdhechonü, Ihnü Ipu akang jo lurü tsü khu wünü arüh te khatacho ko arüh michah Abüdongba-nü I khyang akoh jücho. Hütsüeko tuepü ade nührü Ite khatanung roro?”

⁴ Hütsüde Jeftha-nü Gilead-rü apüm dsibülung ro Efraimrü te khatacho ko arüh kohcho. (Efraimrünü yocho, “Efraim ko Manase la Gilead-rü, nührü Efraim lanü atsichirü!”)

⁵ Efraimrü tsicheh mütsisohnung, Jordan kehchehnung müdümti tsü Gilead-rünü thsehticho. Khode Efraimrü khürü tsicho tsinung amülaba tsingdhingnang, Gilead-rünü hita tsingcho, “Nüh Efraimrü mah-o?” Abinü “Mah” pü yokhang,

⁶ arühnü abi khyang “Shibbolet” pü chodhingsohcho: Ta abinü “Sibbolet” pü yocho, tunüo abinü hütsü yuva tsa müchürochehcho. Hütsüde arühnü abi rangnü Jordan kehba müdüm khüdu lanü abi kyüsehcho. Hütsü shikhe Efraimrü hajar yürepü anyüh kyüsehcho.

⁷ Jeftha-nü Israelrü kang dhüroh nüchicho. Hütsüpü abi sücho ko Gilead la apu yangdila dhrürangcho.

Ibzan, Elon ko Abdon

⁸ Jeftha khanglang, Bethlehem lanü Ibzan-nü Israel nücho.

⁹ Abi atsurü adhrerü sangre ko khingkurü sangre licho. Abinü atsularüti yucho palang xengsohcho ko atsurüti nengdang yangpilangnü khingkurü sangre noro kuh kangsohcho. Ibzan-nü Israel kang dhünyeh nücho,

¹⁰ Hütsüpü abi sücho ko Bethlehem la dhrürangcho.

¹¹ Ibzan khanglang, Zebulun lanü Elon-nü Israel kang dhüre nücho.

¹² Hütsüpü abi sücho ko Zebulun lih la Aijalon la dhrürangcho.

¹³ Elon khanglang, Perathon lanü Hillel tsurü Abdon-nü Israel nücho.

¹⁴ Abi tsurü adhrerü yüre ko shümtsurü sangre licho ko arühnü gadu nyühre chah pümcho. Abdon-nü Israelrü kang keh nücho,

¹⁵ Hütsüpü abi sücho ko Amalek-rü azonglih Efraim la Pirathon la dhrürangcho.