YUKHARÜTI 10 - AMÜSA BAIBEL (BSI)

Tola

¹ Abimelek süpü khanglang, Pua tsurü ko Dodo shümtsurü Tola-nü Israel nüchehnung rocho. Abi Isakar hung lanü ko Efraim azong lih la Shamir la licho.

² Abi Israel langnürü thsa kang mükyüpü asang licho. Hütsüpü abi sücho ko Shamir la dhrürangcho.

Jair

³ Tola khanglang Gilead lanü Jair rocho. Abinü Israel kang mükyüpü anyüh langnücho.

⁴ Abi tsurü sangre licho ko arühnü arüh gadu sangre nücho. Gilead lih la arüh yangdi sangre licho, ko ade mii Jair yangdongti pü dsire.

⁵ Jair sücho ko Kamon la dhrürangcho.

Jeftha

⁶ Adesü thali Israelrünü Baal ko Ashtarot, Syria, Sidon, Moab, Amon ko Filistiarü tsingrangti mübü Abüdongba nyüm amünyi shitpahcho. Arühnü Abüdongba thrüchahchüpeh abi mümübücho.

⁷ Hütsü khu Israelrü te Abüdongba zichürocho ko Filistinrü ko Amon-rü khyang kohsohcho.

⁸ Kang dhürekeh Gilead la Jordan Yongkhi nyüchürolang Amor lih la liba Israelrü arühnü sehchi dhsümthse bichicho.

⁹ Amon-rünü Juda, Benjamin ko Efraimrü te khatanung Jordan mii keh küducho. Israelrü dee chongchacho.

¹⁰ Hütsüde Israelrünü Abüdongba te kihchi yocho, “Ihrünü Nüh pehjüpü Baal tsingrang mübü Nüh nyüm amünyi shitpahko.”

¹¹ Abüdongba-nü arüh te hita lalingcho, “Ijiprü, Amor-rü Amon-rü, Filistinrü,

¹² Sidon-rü, Amalek-rü ko Moabrünü, atsichola nührü sehchi rocho ko nührünü Ite kihchicho. Ihnü arüh khehlanü nührü mükhümchocho mah-o?

¹³ Hütsüpü mii nührünü Ih pehjüpü aparü tsingrang mübücho. Hütsüeko adelü Ihnü nührü mükhümchonung.

¹⁴ Wüng ko nührünü mübüba tsingrang te kihchieng. Nührü dhsürüla züdude arüh khyang nührü khümchosohng.”

¹⁵ Ta Israelrünü Abüdongba te yocho, “Ihrünü amünyi shitpahko. Nü nguchinyücho ihrü chah nguching, ta chünye ihrü khümchoung.”

¹⁶ Hütsüta arühnü shupa tsingrang pehjüpü Abüdongba mübücho; ko Israel chongcha nengdang abinü lümxücho.

¹⁷ Hütsüde Ammon-rü rothsarünü khatanung küdang Gilead la arüh müdongcho. Ko Israelrünü ro Gilead la Mizpa la müdongcho.

¹⁸ Hütsüla Israelrü müyurü ko langnürütinü tsingdhingtacho, “Ammon-rü nyüm khatanung sünü langnünung? Sünü nonang, abi tsü Gilead la atümung michah langnürü thsanung.”