TITAS 3 - AMÜSA BAIBEL (BSI)

Khristan Saying

¹ Nührü nyitsarüti te yangthsarü ko yangbe pohki linung ko lüpcho la atsa nguchinung rungnüm linung lümchehsohng.

² Sü nengdangsü amütsa müchonung, ta tsata linung ko lede atümung te kangli atsa ngusohnung young.

³ Tunüo Ihsasü khüdupi amüsithsa, yocho mühnyi, ko thsameh licho. Ihsa mükhyahmürah ko künyangküshi pohki ayurü kang licho. Ihsa akang tsü mükohdhing ko lungkha dunü jeng khüdunü khüdu thrünyita licho.

⁴ Ta khode Ihsa Kangchehjüba Tsingrangba amüi ko yanglilüm mishacho,

⁵ abinü Ihsa khümchocho. Hütsü Ihsa jangjangnü nguchi atsa nguchichonü mah, ta apu achomangnü, Anbü Amüsa sü khu Ihsa thsütohjo, asi surosoh akang asi jüro, abinü Ihsa khümchoko.

⁶ Tsingrangba-nü Ihsa Kangchehjüba Jisu Khrista khu Ihsa chah Anbü Amüsa bholo mükhakehjüko,

⁷ hütsünü abi achomangnü Ihsa longdiba müchangkaba akang thsiking nguchehnungthsa Ihsa langjüko.

⁸ Hiba choyoh yu yuje. Hi nengdang nüh alaa müci jüsohnyüre, hütsünü du sürünü Tsingrangba chah yudsiro arühnü atümung nengdang nguchi atsa nguchinung bekhyah jüchehnung.

⁹ Ta amükhyu la rehtaba, jümü trah chung, yubejarong ko yuji nengdang khataba hiri lanü za lieng. Hütsüri tsü amii mühle ko ajingcho mühle.

¹⁰ Achangnah chürosohrü te azaunü anyüpili amüzahnung young, hütsükonülü abi te tu tüyo.

¹¹ Hitari nyitsarü tsü athsangnyang ko apu münyinü abi tsü amüthsalangepü yuzi jüre.

Achangka Athülaba

¹² Khode Ihnü nü yanglang Artemas mahkhang Tychicus müthehnang, Ih yang Nikopolis lang ronung müküpm, tunüo Ih hütsüla tsingkangza linung dhrongchehko.

¹³ Yukharü Zenas ko Apollos nyüh shitseh shemüsunungthsa nü kohchonü troung, ko arüh dhsütah apüm rungnümjüng.

¹⁴ Ihsa nyitsarütinü ajingcho müliba akang tüli, ta yuje dhsütahti tsü desahnung nengdang; nguchi atsa nguchinung nyichosohng.

¹⁵ Ite lirü atümungnü salüm müdhesohre. Yudsi la Ihsa shangrüti te salüm young. Tsingrangba achomang nührü atümung te lieng.