TITAS 2 - AMÜSA BAIBEL (BSI)

Yuje Yudsidoba

¹ Ta nühnü yuje athonguba te phishu thsingyubae.

² Azirü te akichocho, alümdhing, ko abürü jangjang rahsehba; arüh yudsi la adrengdreng linung, amüi ko arangcho linung thülaang.

³ Hütsü roh-i tsü azilarü te amüsa akang ko khingkurü tsü khingkurü roh-i linung thülaang. Arüh tsü besüseh mahkhang yongkha yurü müthsabae. Arühnü azatpürü te arüh niirü ko tsuzarüti müisohnung

⁴ tu atsa liro hütsü thsingyubae,

⁵ abürü jangjang rahsehnung ko amüsa linung, kukhi abüdongtpü atsa ko palu niirü pohki liba thsanung, hütsünü du Tsingrangba chahnü khüi yusi roro, hütsü nyüm müchonung.

⁶ Hütsü roh-i dhrezarüti te abürü jangjang rahsehnung thsüching.

⁷ Nü jangjang lüpcho la saying atsa adüzü kang libae. Nü athsingyuba la dee müci jüng.

⁸ Mümüchongchijünungthsa yu atsa du choung, hütsünü du Ihsa nengdang amütsa müli nührü rorüh tsü ashah khyüsohnung.

⁹ Ayurütinü arüh abüdongrü pohki libae, ko lüpcho la arüh longlangsohng. Arühnü arüh te thali mülalingbae

¹⁰ mahkhang arüh yo müfühbae. Hütsü mülih, lede atsa ko longlangchehba tsü ngusohbae, khüi khu arüh nguchicho apümnü Ihsa Kangchehjüba Tsingrangba nengdang athsingyuba kükyüsohnung.

¹¹ Tunüo Tsingrangba-nü amüi tsurü atümung akangcheh nengdang abi achomang mishako.

¹² Hiba achomang tsünü Ihsa te amünyi akang ko limih mükhyahmürah pehjüpü abürü jangjang rahsehba, yuje ko hiba limih la Tsingrangba müdhe akang linung thülare,

¹³ hütsü Ihsanü longdiba amüwajüba Nyümong, khode Ihsa adibong Tsingrangba ko Ihsa Kangchehjüba Jisu Khrista ronang, hütsü nengdang yingre.

¹⁴ Abinü amütsa apüm lanü Ihsa khümchonung ko apu yo amüsa nyitsarü, atsa nguchinyürü kangsohnung abinü apu akang jücho.

¹⁵ Nühnü thsüchide ko yübüde tase apüm bichinü hiri thsingyung. Sü khyangsü nüh tümükhimüngusoh.