TITAS 1 - AMÜSA BAIBEL (BSI)

¹ Tsingrangba dikehrü ko Jisu Khrista riwürü Paul chahnü. Tsingrangba-nü throchehcho nyitsarü yudsi la tronung, ko Ihsa yangthsanü yocho yuje thongunung khüiba müchangkaba akang alongdi liro, hütsü nengdang Ih throcheh müthehcho.

² Tsingrangba sünü arahkheh müchoro, abinü hiba akang tsü adikeh lanü Ihsa te nyengchocho,

³ ko bechola hütsü abi yusi la mishacho. Hi I chah nyümkehjücho, ko Ihsa Kangchehjüba Tsingrangba yuzengnü hütsü Ihnü sobhore.

⁴ Aroh yudsi la I tsurükhung Titas yang Ihnü thrahre. Au Tsingrang ko Ihsa Kangchehjüba Jisu Khrista chahnü achomang ko atbachi thsaang.

Krete la Titas Nguchi

⁵ Ihnü Krete la nüh pehjüba tsü dhsütah nguchiti nguchinung, ko yangdi apüm la Lithro azibarü throchehnung nengdang thsacho. Ihnü thülachoti lümchehng:

⁶ Azirü tsü arah mükeh; anitpü khüdu du liba; atsurüti tsü amürahseh, ko ayocho mühnyiba müthsanung, ta yudsirü thsabae.

⁷ Tunüo Lithro langnürü tsü Tsingrangba nguchi la khehthsithsarü thsachonü, abi tsü arah mükeh thsabae. Abi hongzirü mahkhang zah zichürorü, mahkhang müchamülohrü, shühkhatohrü mahkhang thsi müruthsarü müthsabae.

⁸ Abi amüi kehba ko atsa müiba thsabae. Abi abürü jangjang rahsehba, yuje, amüsa ko arahsehcho thsabae.

⁹ Abi tsü yuje athsingyuba te phishuba yudsi la adrengdreng thsabae. Hütsü roh-i yuje adoba aparü thsüchinung kohnung, ko hütsü nyümrü te mülang tsü ngusohchehnung.

¹⁰ Tunüo nyitsarü adrong alathsa Jihudarü yangthsa lanü ximülarüti sürünü arüh amükhyu lümlong khu nyümcho, ko aparü thsüyohchü lile.

¹¹ Arühnü choba tsü yatinung dhsütahre, tunüo ashahnung nguchi thsi nengdang arühnü amüthsalang thsingyunü kukhi apüm thsangnyangjüre.

¹² Hütsü, arühbürü Krete-rü khüdu, arühbürü azikehrü khüdu, sünü hita yuje yocho, “Krete-rülü lede arahkhehrü, kanglungrü amütsa, ayungsüh ko amünyo.”

¹³ Hütsünü nühnü arüh dee yübünungbae, hütsünü du arüh yudsi la drengdreng lichehnung

¹⁴ ko Jihudarü yukheh nyitsarü sürünü yuje tsü mükhyüchocho arüh chahnü rocho nyitsarü yuzengtila rameh mülinung.

¹⁵ Amüsarü te lüpcho amüsa; ta müyudsirü ko amünyirü te tusü amüsa mühle, tunüo arüh thoh ko lümlong tsü münyipeko.

¹⁶ Arühnü Tsingrangba müdhelepü yore, ta arüh nguchinü hütsü münyengchore. Arüh athrünyinung ko ayocho mühnyi, tu atsa nguchinung müdekhing.