THSINGYURÜ 9 - AMÜSA BAIBEL (BSI)

¹ Hiri apüm nengdang Ihnü anyahli ko soh lümdhingcho ko amüdherü ko Amüsarü nguchi, arüh amüi ko thrünyicho mii Tsingrangba-nü nüchirepü müdhecho. Sünüsü bekhu tu liro hütsü mümüdhe.

² Tu papa mühle. Amüsarü ko münyirü atsarü ko amütsarü, yangthsa thurü ko müthurü, kangmübü jürü ko müjürü atümung suro akyokyo du. Nyitsarü atsasü münyirü tenü atsau mah; yuchümrüsü yu-müchümrü tenü atsau mah.

³ Atümung yang akyokyo suro rore, ko limih la amütsa khüdu tsü hi lile. Nyitsarü akangli ayung arüh lümlong amünyi ko mükyangmüzang dunü jeng lire, ko dhrongyengnü arüh süre.

⁴ Ta akang lirü limih la sü akang liro alongdi azikyah lile; akang liba füza tsü asücho kangdi tenü atsau.

⁵ Ho, akang lirünü arüh sünungepü müdhele, ta asüchonü mümüdhe. Arüh angunung jiyü mühle, arüh sehseh nbüchüpehko.

⁶ Arüh amüi, arüh thrünyiba, arüh mükhyahmürah apüm arüh süde ii süre. Arühnü khodesü thali hiba lih la nohlüm mükhyüchehnung.

⁷ Nüh tsuyongnung tsu künyang lieng; nüh yongkha yong ko künyang. Hütsü Tsingrangba jingte tumüthsa.

⁸ Lede longphi künyang lieng.

⁹ Tsingrangba-nü jücho hiba limih la amükhyu akang lide, nühnü müiba nü nitpü te longnyüp lieng. Amükhyu nyümongti apüm bichieng, tunüo nü chongcha apüm mülih nüh ngunung apümnü hütsü du.

¹⁰ Nühnü tuturü nguchinang müküp nguching, tunüo asürü lih la anguchicho mülinung, alümdhing mülinung, amüdhe mülinung, ko lümlong mülinung ko nüh hütsülang tsü würe.

¹¹ Ihnü apa khüdu lümchehcho, ko hütsü hiba lih la dsaya shangrünü lede mükohre, ko athrungrünü lede khata mükohre. Lümlong lirünü lede akang linung müshehre, athsehdhsarünü lede alirü mükangre, ko nguchi kohrü lede amungthriba jingkih müngure. Suro mütsa atümungchah tikehre.

¹² Nü bekhyah khode rorünang nühnü khodesü mümüdhe. Uza kyo neh dunü zeng la xohnung, nguh kyo yojeh la xohnung. Ihsanü mülongdiba bekhyah amütsa khüdula Ihsa xohre.

Lümlong ko Amüsithsa Nengdang Lümcho

¹³ Ihnü adesü lango ngucho, hütsü hiba lih la lümlong tsü khüta khichicho hütsü adüzü.

¹⁴ Nyitsarü nungza liba yangdi azikyoh khüdu licho, ko hütsü rezeh yangthsarü khüdunü mahcho. Abinü hütsü mükangticho ko tbü tsü müp-phoh züdunung küdangpü licho.

¹⁵ Hütsüla ailümrü khüdu licho, ta abi khura thsehdhsachonü abinü yangdi tsü khümchocho. Ta sünüsü abi mükhichicho.

¹⁶ Ihnü lede lümlong tsü re tenü atsauepü yoko, ta sünüsü ailümrülü asithsa roh-i mülümre, mahkhang abinü tu yorünang hütsü münyire.

¹⁷ Amüsithsa ashimükhongla yangthsarü khongcho nyinung tenü asithsarü longlüm yu nyinung atsau.

¹⁸ Lümlongnü thsunohrü tenü alaa atsau nguchire, ta münyirü khüdunü atsa adrong thsangnyangjüre.