THSINGYURÜ 8 - AMÜSA BAIBEL (BSI)

¹ Amüdherü dunü kohro khüdu tsü tunang hütsü müdhere. Lümlongnü romih müyasohre ko romih mükhümba tsü changsohre.

Yangthsaba Yocho Nyieng

² Yangthsabanü yocho nyieng, ko Tsingrangba te dhsüdhsara anyengchoba tükülüp.

³ Yangthsabanü apu khyünyücho masü nguchinung kohle, hütsüeko abi tenü zang; hütsütari dhsürü müdümla tüli.

⁴ Yangthsabanü tase keh nguchire, ko abi te sünüsü mükhyangchicheh.

⁵ Nühnü abi yochonyi tashi, nüh khümcho lile, ko hütsü khüta ko khode nguchinung asithsarünü müdhele.

⁶ Lüpcho nguchinung akyang ko athsalang lile, ta Ihsanü zara müdhere!

⁷ Tu tikehnungnang sünüsü mümüdhe, ko Ihsa te yonung süsü mühle.

⁸ Sünüsü asünung lanü za mülicheh mahkhang asü nyümong müphungkhucheh. Hi Ihsanü mütsiphuba khata; Ihsanü hi mürahmütsacheh.

Amütsa ko Amüsa

⁹ Ning pohki khode khürü tase keh ko khürü arüh pohki chongchaba nguchichoti lümdhingde, Ihnü hiri apüm nguko.

¹⁰ Ho, amütsarü arüh kong la dhrürangcho Ihnü ngucho, ta kongyo langnü thalide arühnü amütsa nguchiba yangdi tsatsala tsünü arühnü arüh sere. Hi amükang.

¹¹ Tuepü nyitsarünü hitoi müla yuzeng thsangnyangro? Tunüo athsamehrü tsü adhsadenü mükhingchichonü.

¹² Münyirü khüdunü thsihpili yuzeng thsangnyangpü adesü lidure. Ho yuje, arühnü yoba tsü Ihnü müdhele: “Nühnü Tsingrangba yocho nyikhang, lüpcho tsapenung,

¹³ ta amütsarü nengdanglü mütsanung. Arüh akang tsü nbükhüm khüdu kyole ko arüh azadenü sünung, tunüo arühnü Tsingrangba yocho mühnyi.”

¹⁴ Ta hi amükang. Limih la tu tikehrünang dhingdhing: Khüpi amütsarü nengdang amüsarü khingchire, ko amüsarü jiyü amütsarünü ngure. Ihnü yore, hi amükang.

¹⁵ Hütsünü nyitsarü khüdu tsü künyangchi libaepü Ihnü lümre, tunüo akangla akünyang tsü tsunung, yongnung ko künyangchi linung hidue. Tsingrangba-nü hiba limih la akang yohpüjü abinü nguchi lide, abinü hidusü nguchinung kohle.

¹⁶ Khodederü Ihnü hiba limih la liba asithsa ko amüdherü kangnyünang, ama atsingse müyüpseh.

¹⁷ Tsingrangba-nü tu nguchirünang münyichehre. Nühnü khütoh-i müküpnye, nühnü khodesü müyangchichehnung. Asithsarünü müdhelepü yonung kohle, ta arühnü mümüdhe.