THSINGYURÜ 7 - AMÜSA BAIBEL (BSI)

Akang Nengdang Lümdhingcho

¹ Aneng atsa tsü thsidi axümlichi tenü atsau; ko asü nyümong tsü suro nyümong tenü atsau.

² Thsüti liba kulang wünung tenü metra pümba kulang wücho atsau, tunüo asübanü Ihsa atümung yingrepü akang lirünü lümkehbae.

³ Alongri tsü münyücho tenü atsau; hütsünü nü romih mükhümsohnung kohle, ta hütsünü nü lasih künyangsohre.

⁴ Lümzehrü lasiking tsü metraba kuh la lile; ta amüsithsarü lasiking tsü künyangküshi kuh la lile.

⁵ Adohrünü nü neng sesohnung tenü amüdherünü nüh yübüsohcho atsau.

⁶ Adohrü münyüba tsü michang la zeng tahde tsohcho kyole. Hütsü tu adüzü mühle.

⁷ Sehchiba nguchinü amüdherü amüsithsa kangsohre. Nühnü pohsa khyükhang, hütsünü nü saying thsangnyangjüre.

⁸ Lüpcho achangka tsü adikeh tenü atsau. Arangcho tsü amüthseh tenü atsau.

⁹ Dhsüdhsa zii tüchüro; tunüo zichüroba tsü amüsithsarü dreng chah kehle.

¹⁰ “Akhulang kohro tuepü khüdupinü atsauo” pü khodesü tütsingdhing. Hi athsehdhsa atsingdhingba mah.

¹¹ Akang lirü atümung asithsa thsabae; hi thsiking khyücho te sako du,

¹² ko thsinü atsikeh jücho kyo hütsünü jüre. Lümlongnü nüh khümcho yohpüre amüdhe amüwa tsü hi lile.

¹³ Tsingrangba nguchi tsü lümdhing. Tsingrangba-nü kurengsohcho sünü müchongsohnung?

¹⁴ Nüh rii jode, künyang ko chongcha rode, lümdhing: akünyang ko chongcha anyüding Tsingrangba-nü jüre; müchikeh tu tikehnungnang nühnü tu mümüdhe.

¹⁵ Amükhyu I kang la Ihnü lüpcho nguko. Nyitsarü atsa süre; ta nyitsarü amütsa kutsüp lire.

¹⁶ Hütsüeko, khura tsa mahkhang sithsara tüthsa, tuepü abürü jangjang müpsehnung?

¹⁷ Ta khura mütsara mahkhang dohra tüthsa; tuepü müsükyange sünung?

¹⁸ Anyüding khuranung lanü ranglieng. Nühnü Tsingrangba müdhekhang kohnung.

¹⁹ Yangdi khüdula yangthsarü dhüre tenü lümlongnü asithsarü khüdu alaa sithsasohre.

²⁰ Limih la athsalang du nguchirü ko khodesü müthsamehrü süsü mühle.

²¹ Nyitsarünü yocho yu apümlü tünyi, tunüo nüpu kulirünü nüh müthsamünyücho yuchinung;

²² ko nühnüsü adrongpi bürü müthsamünyüko pü nüpunü müdhele.

²³ Hiri apüm thsadsünung Ihnü I lümlong bichicho. “Ihnü asithsa kangnung lümcho” ta hütsüsü müchihcho.

²⁴ Akang tsü tunang sünü yangchichehnung? Hi sohrale, hi nyichehnung Ihsa nengdang thsahrale.

²⁵ Ta Ipu jangjang Ihnü amüdhe ko yangchibala khakhuchüjücho; Ihnü lümlong nguchehnung ko I atsingdhingbala alalingba ngunung, ko amükhyu amüsithsa tsü tunang müdhenung lümcho.

²⁶ Ihnü khingkurü tsü asüba tenü amütsauepü müdhecho. Abükyünü jüba amüi tsünü nüh zeng la kyo xohnung; abükyü pükyang nü chah khyahriba tsü tpolunü kyo nüh xohnung. Tsingrangba künyangsohrü dunü tsiphunung, ta münyirülü abükyünü rangnung.

²⁷ Athsingyuba tsünü yocho, ho, alalingba yangchide khai khai Ihnü hütsü rangchehko.

²⁸ Ihnü alalingba apa khüdu yangchicho ta tusü müngu. Ihnü jengreng jünung hajar yola adhrerü khüdulü ngure, ta khingkurülü khüdusü müngu.

²⁹ Ihnü nyichocho apümnü hi: Tsingrangba-nü Ihsa müchongkhüti thricho, ta Ihsa jangjang thsangnyangcho.