THSINGYURÜ 6 - AMÜSA BAIBEL (BSI)

¹ Hiba limih la yuje mücho arangcheh nguchicho Ihnü rangchehko.

² Tsingrangba-nü khürü khyang kuthsi, khürü khyang adhichi ko khürü khyang kohro jünung, ho, abinü khyünyücho lüpcho jünung, ta abi künyangchi mülisohnung. Ko shirü khürü uthring longnyüp linung. Hi amükang ko hi apüm arahkheh.

³ Nyüh khüdu atsurü thsih linung kohle ko kutsüp linung kohle, ta abi akünyang müngukhang, khütoi kutsüp linye ko ame rangrü akyühde müngukhang, Ihnü yore, akhunga asücho surocho tsü atsau.

⁴ Hütsüba akhunga tsü suronung müdhsütah; hütsü amarürah la changpehre ko nbüchüpehre.

⁵ Hütsünü anyümong avisa khodesü müngudhing mahkhang akang tsü tu kyorünang mümüdhe;

⁶ ta kang hajar anyüh linye akang longnyüp müliba nyitsarü tenü hütsülü akyahshang ngure. Tunüo anyüding müdüm khüdulang du würe.

⁷ Nyitsarü khüdunü nguchiba apüm tsü atsunung lango ngunung shulüm du nguchire, ta khodesü kükyo müngure.

⁸ Khütapü amüdherü khüdu amüsithsarü khüdu tenü atsauo? Ailümrü khüdunü akang khüta linung müdhecho tsünü tu jingchoro?

⁹ Hi amükang; hi nyübong iichicho kyole. Apa lango mükhyah du linung tenü nüh tu liro hütsünü longkyangcho atsau.

¹⁰ Atikehba lüpcho tsü papadenü dhrongchehpehcho lile, ko abi tenü rezeh nyüh khüdu te mürehtachehrepü Ihsanü müdhele.

¹¹ Alaa rehtade alaa amükhyu du kangre ko nüh atsau mükangre.

¹² Hiba amükhyu akang akhikyah, ko nbükhüm kyo lahkhu tsiba akang hi nengdang sünü atsauba tsü khütapü müdhenung? Abi süpü limih la tu tikehnungnang sünü khüta müdhenung?