THSINGYURÜ 5 - AMÜSA BAIBEL (BSI)

Dhsüdhsara Tünyengcho

¹ Amübükuhlang wüba nengdang müzahmükieng. Amüsithsarünü atsa amütsa mütsüp-pü kangmübü jücho tenü hütsüla nyichonung wücho atsau.

² Müchoede lümdhing, ko Tsingrangba te dhsüdhsara tünyengcho. Abi ninglang ko nüh alih la lire, hütsüeko nüyu adükeh du thsaang.

³ Nüh alaa wahde nü melang alaa du mütsanung, ko alaa chode alaa amüsithsa yu du chochehnung.

⁴ Hütsüeko nühnü Tsingrangba te anyengchoba khüdu külüpde, hütsü zah nyengchoung. Amüsithsarü khüdu abi nengdang akhyüchah mühle. Nühnü tu nyengchocho hütsü nguching.

⁵ Nyengchopü münguchinung tenü münyengchojungcho atsau.

⁶ Bebürü te nühnü hütsüta mülümchoepü yonungthsa, nüpu yunü nüpu amünyi tüshitpahsoh. Tuepü nüte Tsingrangba zichürosohro? Tuepü abi khyang nühnü nguchicho thsangnyangsohro?

⁷ Nühnü khütoi melangnye, amükhyu khütoi nguchinye, khütoi chonye, nühnü Tsingrangbalü drübae.

Akang Hi Amükang

⁸ Yangthsabanü ailümrü nyüpmüseh arüh athsalang sehticho ngu tünyemüyang. Adirü mükhu abi michah adirü khüdunü tsungtire, ko anyüding tsü anyüh michah adirü khüdunü tsungtire.

⁹ Yangthsarü khüdu mii luh chah ngakeh lire.

¹⁰ Nühnü thsi müikhang, nüh khodesü nahkohmüjengnung; nühnü alirü kangnung mükhyahkhang, nühnü khyünyücho apüm khodesü müngunung. Hi amükang.

¹¹ Nüh alaa alirü kangde, akangnung alaa du kangnung. Nü ajingcho apümnü nüh alirüeba aneng du tsü thsanung.

¹² Anguchirü khüdu tsü atsunung kükyo linung kohle, mahkhang mülinungsü kohle, ta aromanglü longnyüp yüpnung. Ta alirülü, khütang lipü müyüpseh lümkang lümxü linung.

¹³ Hiba lih la Ihnü adrünung khüdu nguba tsü hi: Nyitsarünü arüh dhsütahde khyang arüh thsi zahkehre.

¹⁴ Hütsüpü suro mütsa khürü mütohde arüh tsuzarü khyang mii tusü münyingpü apüm changre.

¹⁵ Limih la khehshü rocho kyo du Ihsanü limih pehjünung. Ihsanü khee nguchicho tusü Ihsa te mühitsinung.

¹⁶ Hi athsalang mah! Ihsa rocho kyo tsinung. Ihsanü khee nguchi, nyübong rangnung müküpcho, ko Ihsanü tu ngucho?

¹⁷ Ihsa akang amarürah ko alongrila, wah, zichüro ko füdhsa linung du.

¹⁸ Ihnü rangchehcho tsü hi: Tsingrangba-nü jücho shikhe akhikyah hila palu nguchichehcho lanü tsuyong künyangchi linung tsü atsauba; hi nyitsarü müngu.

¹⁹ Tsingrangba-nü nyitsarü khyang kuthsi ko kohro jo künyangsohkhang, abinü anengsejo anguchichehcho tsü longnyüp bichi libae. Hiba hi Tsingrangba chahnü jiyü lile.

²⁰ Tsingrangba-nü abi künyang linung jücho tsü, abinü akang tsü khüta akhikyahnang tu lümxü mülümnung.