THSINGYURÜ 12 - AMÜSA BAIBEL (BSI)

¹ Hütsüeko nüh kunu thsa lide nü Külüprü lümcheng, mahkhang amütsaba nyümong ko kang ronung, hütsüde nühnü yonung, “Akang linung alongnyüpnung mühle.”

² Hütsüde nyü, chonu ko chenghiti atsingse nü nengdang rümrüm kangpehnung, ko tsing nyükhi khodesü mükhu tsinung.

³ Hütsüde nü tsungtiba lohla dhridhrinung, ko ade rezeh liba nü jing remüzehpehnung. Tsang mükahnahnung nü ha zara kangnung ko nü nah khura rümrümpehnung.

⁴ Yanglong khiyu nengdang nü nangkhi tbengpehnung. Anyehsing yuva ko khi thsacho yuva thri du yuchinung, ta uza yuvanü mii nüh khamüsunung.

⁵ Nühnü lungdhong drünung ko atsehnung dhsürü thsanung. Nüh kutpoh chüronung; hariri rachichehnung ko akhyünyüba apüm khutsipehnung. Ihsa achangka akyahshang lih yang würe, hütsüpü yanglongla meshüba linung.

⁶ Taripi ixilih tohnahnung, hon dsi longnung ko müpnahnung; kihkong la rangshü tohsahnung ko kihbong tsü müprüpnung.

⁷ Ihsa fü alih kangnung ko akang sah ajühbong Tsingrangba yang thali wünung.

⁸ Amükang, amükang, Thsingyurü tsünü yore. Hi apüm amükang.

Zika Müdsangchehcho

⁹ Ta Thsingyuwüba tsü lümzehchonü, abinü nyitsarü te abi müdhecho mütozah docho. Abinü choyoh vakha khicho ko yuje tsü müchehdhingcho.

¹⁰ Alümdhingbongnü atbachi yu yangchinung müküpcho, ta abinü thrahba yuti tsü yuje thsacho.

¹¹ Lümlong lirü choyoh yu tsü san-nyahrü imühi ja, ko izinü drengdreng hamkehcho akhyübülungcho yu kyole. Arüh tsü Ihsa atümung nyahbong Tsingrangba-nü jücho.

¹² Itso, hichah lahkeh lango amüzahnung lile. Vakhati thrahba achangka mühle ko khura khichonü nüh kyahpehnung.

¹³ Apüm khanglang, ayonung khüdu du: Tsingrangba drüng ko Abi yuzeng bichieng, tunüo nyitsarü anguchinung apümnü hidu.

¹⁴ Ihsanü nguchicho atsanye amütsanye, rang nguchicho mii lüpcho Tsingrangba-nü yukhanung.