THSINGYURÜ 11 - AMÜSA BAIBEL (BSI)

Amüdherünü Tu Nguchiro

¹ Nü thsi limih pa shithsabhüleh la zahkehng, ko nyümong khüdu nühnü ajingcho ngunung.

² Müdüm adrongla nü thsi zahkehng, tunüo hiba lih la nü suro khütari tikehnungnang nühnü mümüdhe.

³ Singdong khüdu tsü khüi khüilangnye khülukhang, akhüluchola du yüpjonung. Khode nyükhi shüchinang, tsing rore.

⁴ Nühnü nyübong müro ko tsingnyü atsa yingde, nühnü khodesü müshuchehnung ko tusü müxasahnung.

⁵ Fü müdengba khingkurü azarü pümjila akang khüta dikehrü nühnü mümüdhecho kyo, Tsingrangba sünü lüpcho külüpro Abi nguchi mümüdhenung.

⁶ Anyangnyü ko anyüzehlang nü majüh tsü shung. Apüm tsa zinung a mahkhang khüdu tenü khüdu atsau zinung, nühnü khodesü mümüdhe.

⁷ Anyümong atsingse akünyang ngunung tsü alongnyüpnung.

⁸ Nüh kang mükhu licho künyang. Nüh khütoi kutsüp linye, nüh süpü anyahliu linungepü lümkehng. Bekhu dhingnung tu mühle.

Kunu te Athsüchiba

⁹ Dhreza lazarüti, nüh kunu thsade künyang. Nüh dhreza lazade künyang. Nü nguchinyücho nguching, ko nü lasihnü mürucho iiwüng. Ta nü nguchi ngang Tsingrangba-nü yukhanungepü lümkehng.

¹⁰ Tunüsü nüh tüwahsoh mahkhang adhsa tüchürosoh. Nüh anyahli kunuthsa mülinung.