THSINGYURÜ 10 - AMÜSA BAIBEL (BSI)

¹ Sümüza asücho khüdunü axümlichi apüm asüh xümsohre, ko amüsithsa azikyahnü lümlong adiuba changjüre.

² Asithsarünü athsalang nguchinung ko amüsithsarünü amüthsalang nguchinung tsü ayah du.

³ Abi dohba tsü langla mütohcho shirü nüsü tsidsa müdhenung; abi amüsithsarüepü atümung te apunü müdhesohre.

⁴ Yangthsarünü nüte zichüronye, nüh tüzah; nühnü longlüm likhang thsameh amülah tsüsü mülangpehjünung kohle.

⁵ Limih la yuje mücho khüdu yangthsarünü nguchicho Ihnü ngure.

⁶ Alirü sehtipü adohrü khyang jingkih atsa jüre.

⁷ Ayurü kuri chah pümsohpü adirü jingnü ayurü kyo tsehsohcho Ihnü nguko.

⁸ Nühnü mütrüm jukhang, nüh hütsüla dhrümyohnung; nühnü dengzi thsangnyang züdukhang, mürü khüdunü nüh mükyühnung.

⁹ Nüh lungsüh la nguchikhang, nüh lungnü dhsakehnung. Nüh sing thsukhang, hütsü nguchide nüh dhsakehnung.

¹⁰ Nü püh tsü münyühkhang ko müzakhang, nüpu du alaa khenung. Tsehleh lümchung tsü apisaba.

¹¹ Mürü khyang akhu nüh mükyüsohkhang, mürü yümnung müdheba tsü akhyüchah mühle.

¹² Amüdherünü tu choro hütsünü apu khyang adhichi hirore, ta amüsithsarülü apu yunü achangba hirore.

¹³ Abinü lalolashi yu cho dikehnung ko mükyangmüzang yunü changkare.

¹⁴ Amüsithsarünü yu chodu chore. Tu tikehnungnang sünüsü mütsüp, ko Ihsa süpü khanglang tu tikehnung sünüsü müyocheh.

¹⁵ Khura amüsithsarü dunü kulang thalide nguchichonü kyahsehpü ngusohre.

¹⁶ Limih khüdu yangthsaba dhrezarü detingde ko langnürütinü müyüp thsüti khyüde limih tsü dhsürü mütohre.

¹⁷ Ta abürü jangjang adhrongcheh khyüba yangthsarü ko bechola tsuyongba ko abürü jangjang rahseh ko mümüchaba langnürüti liba limih tsü amüwanung.

¹⁸ Nyüh khüdu khura dserechonü abi kuh müsühyohkhang, hütsü shonung ko kuh tsü trümtsunung.

¹⁹ Thsütinü nüh künyangsohre ko yongkhanü nüh thsümüsure, ta anyüding tsü thsi mühlikhang ngunung mükoh.

²⁰ Lüm la dusü yangthsarü tüchokehchola ko nü chongnong chah rang dunüsü alirü tüchokehchola. Nühnü choba yu tsü uzanü hiwü arüh te yonung kohle.