THSINGYURÜ 1 - AMÜSA BAIBEL (BSI)

Akang hi Adeng

¹ Jerusalem la yangthsaba, David tsurü, Athsingyurü yu.

² Amükang yola amükang, Thsingyurü tsünü yore, akang hi amükang, apüm adeng.

³ Nyitsarünü ning pohki kheseh nguchicho tu jingchoro?

⁴ Shang khüdu tsire ko shang apa khüdu rore, ta limihlü asusuh du lire.

⁵ Nyü tsü chürore ko thali achürojilang dhsüdhsa züdure.

⁶ Nyübong tsü kihjinglang ko kihku lang mükang du mükang füre.

⁷ Yongkhi apüm kihdi la pohyohre, ta kihdi tsü müjengre. Kih tsü apohchehcholang thalire ko pohchehlire.

⁸ Lüpcho bhamülingnü jeng lile; benü müyochehba bhamüling. Anguchonü nahkoh müjeng ko ayuchichonü nangkhi müjengre.

⁹ Tu licho hütsü du linung; tu nguchicho hütsü du thali nguchinung. Ning pohki tu asi mühle.

¹⁰ “Dhing, hi asiepü yonungthsa lango lirü do?” Ta, hütsü papadenü licho.

¹¹ Papade tikehcho sünüsü mülümkehre ade ko aronungla tu tikehnung hütsüsü sünüsü mülümkehnung.

Athsingyurü Akangla Atikehcho

¹² Ih, Athsingyubong tsü Jerusalem la Israel michah yangthsarü thsacho.

¹³ Ning pohki nguchiba lüpcho nengdang thsadsü yangchinung Ihnü dhrongchehcho. Tsingrangba-nü Ihsa khyang thsamütsa dira jüko.

¹⁴ Ning pohki nguchicho lüpcho Ihnü nguko ko Ihnü yore, hi apüm amükang. Hi nyübong iichicho kyole.

¹⁵ Nühnü akureng müchongsohnung mükoh; mülicho khidhingnung mükoh.

¹⁶ Ihnü Ipu te yocho, “I müngu Jerusalem la yangthsarü atümung tenü khüdupinü I lümlong aliba kangko. Lümlong ko amüdhe tsü tunang Ihnü müdhele.”

¹⁷ Amüdhe ko amümüdhe, lümlong ko amüsithsa papa tsü tunang nyichehnung Ihnü dhrongchehcho. Ta hütsüsü nyübong iichicho du kyonungepü Ihnü rangchehcho.

¹⁸ Alaa asithsau kangde alaa lümtpanah rore; alaa amüdheu kangde alaa du awah zikehre.