SOLOMON KHI 8 - AMÜSA BAIBEL (BSI)

¹ Itpa abükyü nyikihnü nümüsuba, nüh Imung thsasohnyüle. Ihnü nüh yanglongla shirünye, nü chah müthsüpnung, ta sünüsü do müthsanung.

² I tparü kulang nüh nowü hütsüla nü amüi Ite donung. Ihnü nü khyang athsengchehcho yongkha tihba thsako.

³ Nü kheh fülilang I thah pohki, ko nü kheh tsalangnü Ih khyahrire.

⁴ Jerusalem-larüti, nührünü ihrü amüi mülongmüzinungepü nyengchoung.

Adhüroh-uba Khi Khingkurüti

⁵ Lipilih langnü amüibong te khyahritapü royaba hi süo? Nüh nümüsuba müthohdong pohki Ihnü nüh khamüsucho.

Khingkutpü

⁶ I chah khu aparü amüi te nü lasih khangtieng; I chah khu sü chahsü tükhyahri. Amüi hi asüba kyo tase azeh; mükhyahba hi asüba kyo suh azeh. Hi mihmüle kang tsohrüpre ko michangnü kyo trüpre.

⁷ Kihnü hütsü mümehsohcheh; Kihmülümnü hütsü mütungmehcheh. Ta nyüh khüdunü kuthsinü amüi lihnung müküpkhang, abi du müthsamünyü ngunung.

Khingkutpü Jünirüti

⁸ Ihrü nirü khingkurü khüdu lile, ko ade yingcheh amama aikyah-e. Adhrerünü abükyü müxing rode Ihrünü tu nguchinung?

⁹ Abükyü tsü züdierelang, ihrünü taripi roshengvi thsajünung. Abükyü tsü tbükhüm-erelang, ihrünü Cedar singnü abükyü tsungtinung.

Khingkutpü

¹⁰ Ih züdie, ko I mama tsü abi roshengvi lile. I müibongchah I akyahshang ko atbachi lilepü abinü müdhele.

Adhreba

¹¹ Solomon shükusiluh khüdu Baal Hamon müdümla lile. Luthsarünü abi te müthsüre; nyitsarü müipinü taripi thsi hajar khüdu-khüdu jüre.

¹² Solomon-nü thsi hajar khüdu ngure, ko luthsarü tsü arüh nohlüm thsih anyüh ngure; Ipu shükusiluh khüdu lile.

¹³ I müilatpü, I khyang tbü la tsünü nü yuva yuchisohng; I shangrütinü nü yuva nyinyüre.

Khingkutpü

¹⁴ Ih yang rung, I müibong, Axümlichi chiba azongchah shuhu ko shümüshü apung kyo, Imüibong, Ih yang rung.