SOLOMON KHI 7 - AMÜSA BAIBEL (BSI)

Adhreba

¹ Nüh khütoh-i ahechi lazarü! Jingthrila nü jing khütoh-i atsah atsa. Nü phüm tsü kyothrirü khehthsi kyole.

² Münyehba yongkha füh khüdu hütsüla lile. Litoh bhong khüdu lurü yungpinü mükangtipü lile.

³ Nü mama tsü shümüshü za anyüh ko shuhu za anyüh kyole.

⁴ Nü hong tsü dhsüro-hanü külüpcho roshengvi kyole. Nü nahtse tsü yangdi arangcheh tbükhüm shündhün Heshbon yangdila kihting kyole. Nü nabong tsü Damaskas nyah yaba Lebanon roshengvi kyo amüinung kehle.

⁵ Nü thah tsü Karmel khang kyole. Nü akyahcho kuva tsü anana kyole; atsah atsa tsünü yangthsaba mii rangnung kohle.

⁶ Nüh khüta atsah atsa, ko adhingnyünung; Nü amüi khüta ajeng ko akünyangnung.

⁷ Nüh sedong kyo atba, ko nü mama tsü sesih müphung kyole.

⁸ Ihnü sedong chah küdunung ko asih laanung. Nü mama tsü I nengdang shükusih müphung ko nü sah tsü müthoh axümlichi kyole,

⁹ ko nü be tsü yongkha atsauba kyole. Hütsüeko yongkha tsü müchongkhüti I müibong bela pohyohsohng.

Khingkutpü

¹⁰ Ih I müibong yo, ko abinü Ih mürüpre.

¹¹ Rung, I müibong, Ihjülü rangmülang wünung, ko yangdongla tsü müdongnung.

¹² Ihsanü mütoh suronung ko shükusih tsü müzinang ko shükusih shü tsü müpichehnang dhingnung. Hütsüla Ihnü nü khyang I amüi jünung.

¹³ Nühnü mandrak yungpi xümnung, ko singsih atsa apüm Ihjü trahtrite linung. I müibong Ihnü nü khyang ahi ko asi akünyang yohpüjüle.