SOLOMON KHI 6 - AMÜSA BAIBEL (BSI)

Khingkurüti

¹ Khingkurüti yola atsah tsalatpü, nü müibong khüde tsicho? Khüiba langla tsichonang ihrü te young ko ihrünü yangchijünung.

Khingkutpü

² I müibong balsam singdong yaba atbülang wüko. Abi tbü la tsü santi nyahle ko lurü yungpi khungbülungle.

³ Imüibong tsü Iyo, ko Ih abi yo; lurü yungpi yola abi santi nyahre.

Amüngauba Khi Adhreba

⁴ I müilatpü, nüh Jerusalem ko Tirza yangdi kyo atsah atsa, Nisan hipü rachiba rothsarü amülung roh-i adrünung.

⁵ I chahnü nü nah ximülaang; arühnü Ih rangpehko. Gilead azonglanü santi khyachi jürocho kyo, nü kuva kichire.

⁶ Nü ha tsü ade mütsah chürocho santi kyo thrule. Khüdusü müshohjo; arüh apüm khütang müjangle.

⁷ Müshüticho pohki nü müchüp tsü tehre.

⁸ Yangthsaba tsü yangthsalarü rohre, ashamtpü, qure ko lazalarü mükhilong lisohng.

⁹ Ta Ihnü khüdu du müire, ko abükyü tsü mümüdhrü kyo amüinung kehle. Abükyü tsü atpa chahnü amüleng, atpanü mürüpba tsurü. Khingkurü atümungnü abükyü chah dhingre ko sere; yangthsalarüti ko ashamtpürütinü abükyü se khi thsare.

¹⁰ Adhingnung nyüjing kyoba hi süo? Nyü mahkhang chonu kyo ririba kyo abi atsah atsa ko avisa.

¹¹ Ih almond singdong yola angah la singnuti dhingnung, Shükusih chah ava anu ko tsanümsih sing pichehcho dhingnung Ih jürocho.

¹² Ih dhridhrire; nyübong akhüluba nührünü khata nengdang shangcho kyo, nühnü amüi nengdang Ih mükhyahsohko.

Khingkurüti

¹³ Shulam latpü, nyiiching, nyiiching. Nüh nyiichide ihrünü dhingnung. Adhingrü mükangtipü I nyiichicho nührü tu adhingnyünung kehcho?