SOLOMON KHI 5 - AMÜSA BAIBEL (BSI)

Adhreba

¹ I tbü la Ih züroko, I müitpü, I nitpü. Ih axümlichi ko müchiji khyübülungre; Ih thsakukih müthsüpre; Ih yongkha ko nyikih yongre. Amüinü mümüchade, I müibong, tsung, yong!

Khingkutpü Müyüuba Khi

² Ih yüpnye I lümkang licho. I müibongnü kukhangchah hamchi melangcho. Ih zürosohng, I müilatpü, I nitpü. Yingkihnü I thah kyangle, ko müdhrangnü I kuva yüyüple.

Adhreba Khingkutpü

³ Ih jengki mükhyü, tuthsanung thali khyünung? I jing thsütohko; tuthsanung thali münyisohnung?

⁴ I müibongnü akheh kukhangla tohyohchücho, ko abi amünyethsa rochonü Ih dhridhricho.

⁵ Ihnü abi zürosohnyücho. Ihnü kukhang kheh ramehji chah ramehde, I kheh ko I müyungza müchiji kihnü jengcho.

⁶ Ihnü I müibong khyang khangthrujücho, ta abi tsipehpü licho. Ihnü abi yuva khüta nyinyücho! Ihnü abi yangchicho, ta müngu; Ihnü abi dsicho ta tu müyuchi.

⁷ Yangdi thsehyarütinü Ih ngucho; arühnü I chah xüp dhsakehjücho; yangdi tbükhüm nyahrünü I kuthri rehnahjücho.

⁸ Jerusalem-larü, nührünü I müibong shirükhang, I lümtohchonü tase müzeh licho yonungepü nyengchoung.

Khingkurüti

⁹ Khingkurüti yola atsah tsalatpü, aparü atümung tenü nü müibong pathsa mah-o? Nüte abi nengdang nyengchonungthsa abi tu pathsa licho?

Khingkutpü

¹⁰ I müibong tsü pümtrung atsa ko re azeh; hajar dhürela abi khüdu.

¹¹ Aromih imüyeng ko anana; abi kuva khüyahla kyo anyah ko ji-ile.

¹² Anahtse tsü yongkhi shündhün mümüdhrü kyo atsah atsa, mümüdhrü yongkhi shündhün nyikihla mütsahpü pümcho kyo.

¹³ Amüchüp tsü singvarova ko axümlichi chiba tbü kyo amüinung kehle. Abeküp tsü lurü yungpi kyo müchijinü kyang lile.

¹⁴ Akheh tsü khütang müjangle, ko imüshi thsidilung zehpü. Afü tsü safir thsidilung yoh dhsüro-hanü külüpcho kyo anana.

¹⁵ Aphüm tsü hon yohnü külüpcho alabaster dongdi kyole. Abi adhingnung tsü cedar singnü khüpticho Lebanon zong kyole.

¹⁶ Abe tsü amüthsüpnung anyiyah; abi nengdang lüpchonü Ih müshülire. I müibong tsü hi kyole. Jerusalem-larüti.