SOLOMON KHI 4 - AMÜSA BAIBEL (BSI)

Adhreba

¹ I müitpü, nü tsah khüta atsa! Nü thah phaticho pohki nü nah khüta amüinü jeng liro. Gilead zong lanü santi khyachi jürocho kyo, nü kuva kichire.

² Nü ha ade müjüpyeng ko thsütohcho san kyo thrule. Khüdusü müshohjo; arüh apüm khütang müjangle.

³ Nü beküp tsü amohmürüm; nüyu chode arüh khüta amüinung. Müshühticho pohki nü müchüp tsü tehre.

⁴ Nü hong tsü David roshengvi kyo amülung ko anana, nü lah tsü tsung hajar khüdu müdongmülacho kyole.

⁵ Nü mama tsü shuhu kyole, ko lurü yungpi yola shümüshü aza anyüh nyikih tii yacho kyole.

⁶ Mütsingsede ko anyangnyü nyübongza müfü yingcheh, Ih müchiji ko axümlichi zong la linung.

⁷ I müilatpü nü tsah khüta atsa; nüh khütoh-i adekheng!

⁸ Lebanon zong lanü I yola rung, I nitpü; Lebanon lanü I yola rung Amana Khang chah tsünü jürung, Kangdi ko khünying mungba Senir Zong ko Hermon Zong lanü jürung.

⁹ Nü nah chah dhingcho, ko nühnü lahba lah tsünü I lasih fotsipehko, I müilatpü ko I nitpü.

¹⁰ Nü müinü Ih künyangsohre, I müilatpü ko I nitpü. Yongkha tenü nü amüi tsü atsauba; lüpcho tenü nü axümlichi tsü atsaba.

¹¹ Nü beküp la thsakukih kehle, I müilatpü; I nengdang nü müle tsü nyikih ko thsakukih. Jengki apüm tsü Lebanon axümlichi kehle.

¹² I müilatpü, I nitpü tsü arang tbü, atbüticho tbü, nabi kihnatung;

¹³ hütsüla singdonglidong zire. Tsanümsih singsih tbü la kyo singsih atsauba sihre. Axümlichi lüpcho, henna, nard,

¹⁴ saffron, calamus ko shingsheng mümüdsi. Axümlichi apüm yola müchiji ko aloes hütsüla chürore.

¹⁵ Tbü la tsü kihna kih, poh yaba yongkhi kih, ko Lebanon zong lanü poh jüroba yongna kih tsünü xahre.

Khingkutpü

¹⁶ Surong, kihku lang nyübong. Kihjinglang nyübong, I tbü la füng; nyübong tsü axümlichinü jengsohng. I müibong tsü atbüla züdu singsih atsauba tsü tsusohng.