SOLOMON KHI 3 - AMÜSA BAIBEL (BSI)

¹ I yüpji chah yüpjopü, romang mükhu Ihnü müibong melangcho; Ihnü abi yangchicho, ta müngucho.

² Ihnü yangdi tungtela ko langtpahtila rümchicho. Ihnü müibong yangchicho. Ihnü yangchicho, ta abi müngucho.

³ Yangdi nyah langsahrünü Ih ngucho. Ihnü arüh te, “I müibong münguo” pü tsingdhingcho.

⁴ Ihnü arüh pehjüyeng, Ihnü abi shirücho. Ihnü abi chah ramehcho ko Itparü kulang, I nümüsuba chongsah chi Ihnü abi münowüde mümüthehcho.

⁵ Jerusalem-larü, adsaya shümüshü ko shuhu nenglanü nührünü ihrü amüi mülongmüzinungepü nyengchoung.

Asangu Khi Khingkutpü

⁶ Ramgmü langnü shithsabhülehrünü iba müchiji ko axümlichi, mikhu kyo loh roba hi tuo?

⁷ Solomon, yangthsaba pümji lanü dhipü; Israel la rothsarüti nyüh rohrenü müyangpü role.

⁸ Arüh atümung nohzikehrü du; arüh athrungrü rothsarüti du, Arüh nyitsarü müipi amala bede khyang nohsheng khüdu-khüdu bile.

⁹ Yangthsaba Solomon tsü sing atsaubanü külüpcho yangthsaba pümjila dhi tsehle.

¹⁰ Kuhbi tsü taripinü müshühko; ko hütsü hon-nü riiyohcho shünü müshühko. Apümji tsü Jerusalem-larünü kyahcho ameyü shünü müshühko.

¹¹ Zionlarü, ro yangthsaba Solomon dhingdhing. Abi kukang akünyangu nyümong atpanü athah la thrijüba kuthrisü thrile.