SOLOMON KHI 2 - AMÜSA BAIBEL (BSI)

¹ Ih sharon la rangmü yungpi, ko azong ngah la lurü yungpi khüdu du.

Adhreba

² Zeng yola lurü yungpi kyo khingkurü yola I müitpü lile.

Khingkutpü

³ Mürong sing yola müthohdong khüdu kyo, Adhrerü yola I müibong lile. Abi khümki Ih pümnyüre, ko abi singsih tsü anyiyah lile.

⁴ Abinü Ih abi thsüti kuh la norocho ko amüi nissan I chah dhimüsucho.

⁵ Shükusih pinü I re zehsohng ko müthohnü I longtbasohng. Nahmürahchonü Ih sumüzeh.

⁶ Afühlilang kheh I thah pohki, ko akheh tsalangnü Ih khyahrire.

⁷ Jerusalem-larü, adsaya shümüshü ko shuhu nengla nührünü Ihjü amüi mülongmüzinungepü nyengchoung.

Anyüuba Khi Khingkutpü

⁸ Ihnü I müibong yuva yuchire. Abi azong tung ko akhang lahsah Ih yang shangre.

⁹ I müibong tsü shuhu ko shümüshü bongtho kyole. Abi tbü jüp hütsüla yale. Abinü nyübongkhi khu dhingre ko ariticho khu ridhingre.

¹⁰ Imüibongnü Ite chotare. Rung, hütsüeko I müitpü; I müitpü I yola rung.

Adhreba

¹¹ Tsingkang khuko; tsing zahko;

¹² Rangmü la yungpiti pile. Hi khithsanung shikhe; Luh la mümüdhrü yuva yuchire.

¹³ Ngurüsi nyire; shükusih pinü axümlichi jüre. Rung hütsüeko I müitpü; I müitpü I yola rung.

¹⁴ Nüh lungdhong la rang pümba mümüdhrü kyole. Adhingnyünung nü romih I khyang ngusohng ko nü yuva yuchisohng.

¹⁵ Api pithoh liba shükusih luh müthsangnyangdenü, shirungti ko azati tsü rang.

Khingkutpü

¹⁶ I müibong tsü Iyo, ko Ih abi yo. Mütsingsede, ko anyangnyü nyübongza müfüde,

¹⁷ abinü lurü yungpi yola abi santi kangre. I müibong thali rung, Bether zong chah shuhu ko shümüshü apung kyo.