SOLOMON KHI 1 - AMÜSA BAIBEL (BSI)

¹ Khi yola atsauba Solomon khi.

Akhudiba Khi Khingkutpü

² Nü beküpnü I chah müthsüpre; Yongkha tenü nü amüi atsau.

³ Nü nengdang axümlichi kehle; nü neng tsünü hütsü lümchehsohre. Hütsünü khingkurünü nüh müire.

⁴ Nü yola Ih nüng, ko rang tsinung; nüh I yangthsaba kang ko nü yüpjilang Ih nowüng. Ihjüding müjang künyangtanung, mücha yongnung ko müitanung. Khingkurü atümungnü nüh müirepü müdhele.

⁵ Jerusalem-larü, Ih nyahle ta; atsah atsa, Kedar rangmü la shükuh anyah kyole, ta Solomon kuh la akitising kyo atsah atsa.

⁶ Ih senji mütsacho ngang tümükhimüngu, tunüo hi nyünü tahchonü. I jünirütinü Ite zichüro shükusih luh la Ih nguchisohcho. I bükyüh müshonung shikhe mühlicho.

⁷ Ite young, I müibong, nü santi lamungsohnung khüde nowünung? Nyüthung nyü chahnü arüh khüde kumünyinung? Bürü santi nyahrü yola tuepü Ihnü nüh yangchinung?

Adhreba

⁸ Nühnü müdüm tsü mütsüp ang? Khingkurü yola atsautpü! Wüng ko santi khanglang iing; San nyahrüti shükuh shündhün nü santi lamungsohng.

⁹ Nüh, I müilatpü, kuri atrühnü Farao nyübong kuri apung thsümüsucho kyo, adhrerü thsümüsure.

¹⁰ Nü müchüpla nü kuva tsü adhingnung atsa, ko lah kyo nü hong la chichore.

¹¹ Ta ihrünü nü khyang hon ko taripinü lah mükingjünung.

Khingkutpü

¹² I yangthsaba ayüpjichah yüpjocho, ko I axümlichinü kuh jengjücho.

¹³ I müibong I drengkhu chah ngakehde, axümlichi kehre.

¹⁴ I müibong sü Engedi la shükusih luh la piba rangmü yungpi kyole.

Adhreba

¹⁵ I müitpü, nü tsah khüta atsa; nü nah la khüta amüi zeh dhingro!

Khingkutpü

¹⁶ I müibong, nü nyükheh khüta atsa; nühnü Ih khüta künyangsohro! Zanu amüyah tsü Ihjü chongnong thsanung;

¹⁷ Cedar singnü Ihjü kuh akhengdi, ko drexang tsü cypres singnü thsanung.