RUTH 1 - AMÜSA BAIBEL (BSI)

Elimelek ko abi Kukhi Moab Lang Shehmüicho

¹ Papade, Israel michah yangthsarü müli chichah, yangkong amülah tikehcho.

² Hütsüde Bethlehem la lirü Efrathrü tsutpu lanü nyüh khüdu anengnü Elimelek, anitpü Naomi ko atsurü Malon ko Chilion nüpü Moab lih la azachah linung wücho.

³ Arüh hütsüla lide, Naomi te atsudhre nyüh ko anyüh nitpü nyüh

⁴ Moab-larü Orpa ko Ruth nyüh pehjüpü Elimelek sopehcho.

⁵ Kang dhüreo khanglang Malon e Chilion nyühsü atpa Naomi pehjüpü sücho.

Naomi ko Ruth nyüh Bethlehem yang Thalicho

⁶ Khü lipü, Abüdongba-nü abi nyitsarüti pungrohirosoh müwajücho Naomi-nü yuchicho. Achotsü abükyünü atsunyahla nyüh nüpü Moab pehjüpü shemüsunung rungnümcho.

⁷ Arühnü Juda lang thalinung shemüsucho.

⁸ Ta langla abükyünü anyüh te yocho, “Nührü kulang thalieng ko nütparü te lieng. Nührünü Ite ko asürü te tsacho kyo Abüdongba-nü nührü te tsaangtü.

⁹ Nühjüding thali xengyangpi linungthsa Abüdongba-nü troung.” Hütsüta Naomi-nü aza yu yo arüh chah be müthsüpcho.

¹⁰ Ta arühnü abükyü te tranü yocho, “Imoh! Ihjü nü yola nührü nyitsarü yang wünung.”

¹¹ Naomi-nü lalingcho, Itsu nyüh, nühjü thalieng. Tuepü I yola ronyüro? Nühjü khyüsohnung Ihnü thali adhrerü surochehnung do?

¹² Thali tsieng, tunüo Ih xenglinung shirako. Ihnü alongdi linü shomülangnü xengpü azarü linye,

¹³ nühjünü arüh yingchehnung do? Hinü nühjü axeng münusohnung. I tsularüti, doh, hütsü amükohnung. Abüdongba-nü Ite mütsa bichiko ko Ihnü nührü nengdang dee dhsa lümjüre.

¹⁴ Arühnü anyüpiusü tranung dikehcho. Hütsüpü Orpa-nü anii atpa chah tsü bemüthsüp aza yu yopü arüh kulang thali tsicho, ta Ruth-nülü müpehjücho.

¹⁵ Hütsüde Naomi-nü abükyü te yocho, “Ruth, nü müyangtpülü arüh nyitsarü ko arüh tsingrang yang thaliko. Nühsü abi yola kulang thalieng.”

¹⁶ Ta Ruth-nü lalingcho, “Ite nüh pehjünung tüyo! Ih nü yola wünung. Nüh khüde wünang Ihsü ronung; nüh khüde linang Ihsü hütsüla linung. Nü nyitsarü tsü I nyitsarü thsanung. Nü Tsingrang tsü I Tsingrang thsanung.

¹⁷ Nüh khüde sonang Ih hütsüla sünung ko hütsüla I me rangnung. Asü chah khu apanü Ihnü nü tenü zakhang, Abüdongba akhingchi amütsau I chah kürosohng.”

¹⁸ Hütsüta Ruth-nü abükyü yola wünung adhrongchehba ngunü Naomi-nü tusü müyocho.

¹⁹ Achotsü anyünü Bethlehem müchi tashi wücho. Arüh wü chihde, yangdila lirü atümungnü nyekacho ko hütsüla khingkurütinü yocho, Hi yuje Naomi-sü mah-o?

²⁰ Abükyünü lalingcho, Ite Naomi pü tüdsi, ta Mara pü dsing, tunüo Akohbong Tsingrang-nü I akang akha kangsohko.

²¹ Ih hilanü tside pisa licho, ta Abüdongba-nü I khehshü thali noroko. Akohbong Abüdongba-nü Ih hitoi dhsümthse thrüchahchüpehjüpü lide, Ite tuepü Naomi dsiro?

²² Hütsüroh-i Moab lanü Naomi e Moab-larü atsunyahlatpü Ruth nyüh thalicho. Arüh ro Bethlehem chihde lüdi maxabhülong licho.