ROMRÜ 9 - AMÜSA BAIBEL (BSI)

Tsingrangba ko Abi Nyitsarü

¹ Khrista nengla Ihnü yuje chore; Ih Khrista yo ko Ihnü mürakhehre. I lümlongnüsü I nengdang Anbü Amüsa la Ih mürakhehrepü yuzi jüre.

² I lasih la alongri amülah ko münyehliba achongcha lile.

³ Shutsa la I jünirüti ko trahva khyanglangnü Khrista tenü za Ih chokehcholachoepü thsasohnyüre.

⁴ Arüh tsü Israelrü; abinü arüh abi tsurüti kangsohcho ko abi ahechi arüh te mishacho; arüh te abinü azengchotaba külüpcho ko arüh khyang yuzengjücho; arüh nyüje mübüba lile; arühnü Tsingrangba anyengchochoti khyüchocho;

⁵ arüh tsü anengkhong Ibrirü jümürüti chahnü trahchocho; ko shutsa lahpinü Khrista tsü arüh hung lanü lile. Tsingrangba sünü atümunglang yangthsaro, abi müchangkapü seing! Amen.

⁶ Tsingrangba anyengchocho tsü amükoh ngukopü Ihnü müyore; tunüo Israelrü atümunglü Tsingrangba tsurü mah.

⁷ Mahkhang Abraham chahnü trahchochoti atümunglü Tsingrangba tsurü mah. Tsingrangba-nü Abraham te yocho, “Ihnü nüte nyengchoba tsü Isak khu trahchonung.”

⁸ Hütsü adüzü, ayah khu surochoti tsü Tsingrangba tsurüti mah; ta Tsingrangba anyengchocho khu surochoti du tsü yujeba majüh-epü khichire.

⁹ Tunüo Tsingrangba anyengchocho yu tsü hi: “Becho la Ih thali ronung ko Sara-nü adhrerü khüdu nümüsunung.”

¹⁰ Ko hütsü du mah. Tunüo Rebeka tsurü anyüh au tsü khüdu du, ko hütsü Ihsa jümürü Isak.

¹¹ Ta atsurü khüdu throchehba tsü Tsingrangba apu lümcho thsanung nengdang, Tsingrangba-nü abükyü te yocho, “Azibanü azaba dikehnung.”

¹² Abinü hi arüh atsa amütsa tu münguchiede ko arüh müsuroede chocho; hütsünü Tsingrangba-nü throba tsü arühnü nguchinü mah, ta abi adsiba khu licho.

¹³ Amüsa yunü yocho kyo, “Ihnü Jakob müicho, ta Esau thrünyicho.”

¹⁴ Akhanglü Ihsanü tu yonung, Tsingrangba chah yuje mülirü mah-o? Hütsü roh-i khodesü mah.

¹⁵ Tunüo abinü Mosa te yocho, “Ihnü süte yanglilüm ngunyüro abi te ngunung; Ihnü süte müinyüro abi te müinung.”

¹⁶ Hütsünü lüpcho tsü nyitsarünü khyünyücho mahkhang nguchichonü mah, ta Tsingrangba yanglilüm chah kehle.

¹⁷ Tunüo amüsa yunü Ijiprü yangthsaba te yocho, “Nüh khu I zii ngusohnung ko limih apümlang I neng sobhonung shulüm Ihnü nüh yangthsaba kangsohcho.”

¹⁸ Hütsüta, Tsingrangba-nü lümrü te yanglilümre, ko sürü lasih müküpsohnyüro abinü müküpsohre.

Tsingrangba Rihlong ko Yanglilüm

¹⁹ Ta nührü yola khürünü yonung, “Hütsütakhang, Tsingrangba-nü khüta mülang rangnung? Sünü Tsingrangba lümcho yatichehnung?”

²⁰ Ta nüh nyitsarü khüdu, Tsingrangba te lalingnung nüh süo? Alih füh khüdunü atangrü te, “Tukülüp Ih hita tangcho pü yochehnung mah-o?”

²¹ Tunüo, füh tangrü tsünü lishe tsü alümcho la bichinung kohle, lishe mülung khüdu lanü changshonü dhsütah pathsa la bichiba füh, ko changshonü masü la bichiba füh tangnung kohle.

²² Ko Tsingrangba-nü nguchiba tsü yuje lile. Abinü abi rihlong ko abi zii müdhesohnyücho. Ta abi rihlong mütohnungrü sürü changnung licho, arüh te abinü dee rangchocho.

²³ Ihsa abi yanglilüm ngunungrü ko Ihsa sürü abi ahechi ngusohnung rungnüm licho, arüh te abi athangchi ahechi mishasohnyücho.

²⁴ Tunüo Jihudarü yolanü du mah, ta yangpirü yolanüsü dsicho abi nyitsarü Ihsa lile.

²⁵ Hosea vakha la hita yore: “Sürü I nyitsarü mahro, arüh te Ihnü ‘I nyitsarü’ pü dsinung. Ihnü mümüiba yucho te, Ihnü ‘I müilatpü’ pü dsinung.

²⁶ Ko ‘Nührü I nyitsarü mah’ pü yoba müdümla tsü, arüh te akang liba Tsingrangba tsurüti pü dsinung.”

²⁷ Ko Isaya-nü Israelrü nengdang hita züdecho, “Israelrü lihpi toi thsanye, arüh azikyah du khümchonung;

²⁸ tunüo Abüdongba-nü tunyah mülipü limih te anguchi ajeng hümnung.”

²⁹ Hi Isaya-nü papade yocho kyo lile, “Akohba Abüdongba-nü Ihsa khyang majüh müpehjülang, Ihsa Sodom ko Gomora kyo kangpü libae.”

Israel Nengdang Paul Dangkhidangnang

³⁰ Hütsünü yangpirü sürünü Tsingrangba te alanglang müyangchinye, arüh yudsi khu arüh langjüchoepü Ihsanü yore.

³¹ Ta Israelrü sürünü yuzeng khu alanglang yangchinye, arühnü müngucho.

³² Tu chahnüo? Tunüo arühnü yudsi chah mahpü nguchi chah longdicho. Hütsüta amüsa yunü yoba:

³³ “amüthikehsing lung” chah arüh müthikehcho: “Dhing, Ihnü Zion la amüthikehsing lung khüdu, arüh ngahsehsohnung yohpüre: Ta sünü abi chah yudsinang abi amüwanung.”