ROMRÜ 8 - AMÜSA BAIBEL (BSI)

Anbü la Akang

¹ Ade Khrista Jisu la lirüti nengdang mülangjüba mühle.

² Tunüo Anbü yuzeng khüinü Khrista Jisu la Ihsa khyang akang jücho, hütsünü Ih amünyi ko asüba yuzeng lanü nyüje kangsohcho.

³ Nyitsarü sumüzehcho khu Yuzengnü khüi münguchichehcho, hütsü Tsingrangba-nü nguchicho. Shutsa ayah münyi mülangjü amünyi pehjünung nengdang amünyi shutsa la abinü apu Tsurü müthehcho.

⁴ Ihsa sürünü shutsa la mahpü Anbünü khyünyücho la liro, yuje yuzengnü khyünyücho Ihsa chah tikehnung nengdang Tsingrangba-nü hi nguchicho.

⁵ Sürünü shutsanü khyünyücho roh-i liro arühnü shutsa nengdang lümre. Ta sürünü Anbünü khyünyücho roh-i liro arühnü Anbü nengdang lümre.

⁶ Shutsa nengdang lümba tsü asüba; ta Anbü nengdang lümba tsü akang ko atbachi lile.

⁷ Hütsünü khode nyüh khüdunü shutsa nengdang lümnang abi Tsingrangba rorüh kangre; tunüo abinü Tsingrangba yuzeng mübichire, abinü hütsü bichinung mükoh.

⁸ Sürü shutsa la liro, arühnü Tsingrangba künyangsohnung mükoh.

⁹ Ta Tsingrangba Nbü nührü chah likhang; nührü shutsa la mah, ta Anbü la lire. Sü chah Khrista Nbü müliro abi tsü abi yo mah.

¹⁰ Ta nührü chah Khrista likhang, amünyi khu nührü fü tsü sünye, amüsaba khu nührü Anbü akang lile.

¹¹ Jisu asücho lanü kanglisohba Tsingrangba Nbü nührü chah likhang, nührü chah Anbü licho khu Khrista asücho lanü kanglisohbanü nührü asüba fü khyangsü akang jünung.

¹² Hütsüeko, Jünirüti, Ihsa anguchinung khüdu lile, ta hütsü Ihsa shutsanü mürucho la linungba mah.

¹³ Tunüo nührü shutsa la likhang, nührü sünung; ta Anbünü nührü amünyi nguchiti süsohkhang, nührü akang linung.

¹⁴ Sürü Tsingrangba Nbünü nüro, arüh Abi tsurüti lile.

¹⁵ Tunüo Tsingrangba-nü jüba Anbünü nührü ayurü mükangsoh ko müdrüsohre; ta anbü tsünü nührü Tsingrangba tsurüti kangsohre ko Anbü zii tsünü Ihsanü Tsingrangba te, “Abba! Uwa, pü dsire.”

¹⁶ Ihsa Tsingrangba tsurüti ko Tsingrangba Nbünü apu jangjangthsa Ihsa nbü te yuzi jüre.

¹⁷ Ihsa abi tsurüti thsachonü, abi nyitsarüti khyang yohpüjüba thsiking tsü Ihsanü ngunung, ko Khrista khyang Tsingrangba-nü yohpüjüba thsiking tsü mii Ihsanü ngunung; tunüo Ihsanü Khrista chongcha changtakhang, abi ahechisü changtanung.

Aronung Ahechi

¹⁸ Ade chongchaba hi ahechi khüi Ihsa te mishanung liro hütsüte khüdenü mükitacheh pü Ihnü khichire.

¹⁹ Athricho apümnü Tsingrangba tsurüti mishanung nengdang nahmürah longphi yingre.

²⁰ Tunüo athricho nahdhingkeh tsü apu lümchonü mah, ta Tsingrangba-nü hütsüta mülangjünung lümjungcho.

²¹ Ta athricho tsü ajangjangthsa nyümong khüdu ayurü suro lanü nyüje ngunung, ko süpü Tsingrangba tsurüti te nyüje ahechi changtanung.

²² Tunüo ade yingcheh athricho apüm akhunga zatbüde mikhung ro dhsacho kyo rühchirepü Ihsanü müdhele.

²³ Ta athrichoti du rühchirü mah; Tsingrangba akhudiba jiyü roh-i liba Ihsa anbüsü atsurüti kangsoh Ihsa füpüm shünü lehchehnung yingde Ihsabürü füla mii rühchire.

²⁴ Tunüo hiba alongdila Ihsa khümchoko; ta nahnü nguba alongdi tsü yuje mah. Tunüo ngucho khüdu nengdang sünü longdiro?

²⁵ Ta müngucho khüdu nengdang Ihsanü longdikhang, hütsü nengdang Ihsanü rangcho yingre.

²⁶ Hütsü kyo Anbünü Ihsa sumüzehba trore. Tunüo Ihsanü khüta dangkhidangnangnung hütsü mümüdhe; ta anbünü Ihsa nengdang yunü müchochehnungthsa rühchi kihchijüre.

²⁷ Ko Tsingrangba, sünü Ihsa lasih müdhero, abinü anbünü lümba tsü müdhere; tunüo anbünü Tsingrangba-nü lümcho roh-i abi nyitsarüti nengdang kihchijüre.

²⁸ Tsingrangba-nü abi müirüti sürü abi lümcho la dsi liro, arüh te lüpchola atsa du nguchirepü Ihsanü müdhele.

²⁹ Atsudhre tsü jünirüti adrong yola aukhuba thsasohnung nengdang sürü Tsingrangba-nü throchehcho, arüh tsü atsudhre kyosohnung abinü arüh pathsa yohpüre.

³⁰ Sürü Tsingrangba-nü pathsa yohpücho, arüh abinü dsicho; ko sürü abinü dsicho, abinü langjü abi ahechi arüh te changtacho.

Jisu Khrista la Tsingrangba Amüi

³¹ Hiri atümung ngude, Ihsanü tu yonung? Ihsa te Tsingrangba likhang, Ihsa nyümnung sü liro?

³² Tsingrangba sünü apu Tsurü mütphahlipü Ihsa atümung müli khakhuchüjücho, abinü Ihsa khyang lüpcho müjünung ang?

³³ Tsingrangba-nü throchehcho nyüm sünü mülangjünung? Tsingrangba apunü arüh langjüpehko.

³⁴ Khang, sünü arüh mülangjünung? Khrista Jisu, sü sücho, ta kanglicho, ko Tsingrangba tsalang pümpü Ihsa nengdang kihchijüro, abinüsü mümülangjücheh.

³⁵ Khang, Khrista amüi lanü sünü Ihsa zachehsohnung? Adhsangthsi mahkhang achongcha mahkhang dhsümthse mahkhang yangkong mahkhang ailüm mahkhang dhsürü mahkhang nohsheng hirinü zachehsohnung do?

³⁶ Amüsa yunü yocho kyo, “Nührü khyanglangnü shikhe apüm la ihrü asü dhsürüla lire; Amüpsehnung nowüba San kyo ihrü khichicho.”

³⁷ Mah, hiri apüm lanü sünü Ihsa müicho, abi khu Ihsa akohrü tenü awüba.

³⁸ Tunüo abi amüi lanü tunüsü Ihsa zasohnung mükoh pü Ihnü longi tsüple: asü mahkhang akang, riwürüti mahkhang ninglang yangthsarüti mahkhang ziiti, ade mahkhang aronung,

³⁹ amilang limih mahkhang apohki limih tunüsü Ihsa Abüdongba Jisu Khrista khu Tsingrangba amüi lanü zasohnungthsa athrichoti yola tusü mühle.