ROMRÜ 6 - AMÜSA BAIBEL (BSI)

Amünyi la Sücho ta Khrista la Kanglire

¹ Akhang Ihsanü tu yonung? Tsingrangba achomang zikehsohnung Ihsanü amünyi la mütozah linung do?

² Khodesü mah! Ihsa amünyi la süko, khang Ihsanü khüta hütsüla du linung?

³ Tunüo khode Ihsa Jisu Khrista la bapticho, Ihsa abi sücho lasü baptichoepü nührünü longi müdhele.

⁴ Hütsünü, khüta Au ahechi zii khunü Khrista asücho lanü kanglisohcho, hütsüta Ihsasü akang asi la linung shulüm, Ihsa baptiba tsünü abi te dhrürangre, ko abi asü la changtare.

⁵ Tunüo abi asüba la Ihsa khüdu kangcho kyo, kangliroba la abi kyo Ihsa khüdu kangnung.

⁶ Ko amünyi zii afü thsangnyangnung ko adelü amünyi yurü mükangnung shulüm, Ihsa ahiba akang tsü khala chah Khrista te hamkehpehkopü Ihsanü müdhele.

⁷ Tunüo khode nyüh khüdu sonang, abi amünyi zii lanü lehchehre.

⁸ Ko Ihsa Khrista te süchonü, Ihsasü abi te linungepü Ihsanü yudsire.

⁹ Tunüo Khrista asücho lanü kangliko ko khodesü müsünung ko adelü asünü abi mükohnungepü Ihsanü müdhele.

¹⁰ Hütsüeko, Abi süba tsü lede nengdang khüdupi amünyi la sücho; ko ade liba abi akang tsü Tsingrangba nengdang lire.

¹¹ Hütsü kyo, nührüsü amünyi la sücho, ta Jisu Khrista la Tsingrangba te akang lilepü nührünü khiching.

¹² Nührü shutsa mükhyahmürah la yocho mühnyinungthsa, nührü asüba fü michah amünyi khyang tüyangthsasoh.

¹³ Mahkhang amükhyu amünyi nguchi nengdang nührü lohla tusü tüjü. Ta kanglirocho akang kyo nührü akang apüm amüsa nguchi Tsingrangba nengdang abi khyang jüng.

¹⁴ Amünyi tsü nührü abüdongrü tüthsasoh; tunüo nührü yuzeng pohki mah ta Tsingrangba achomang pohki lire.

Amüsaba Yurü

¹⁵ Akhanglü tu? Ihsa yuzeng pohki mah, ta achomang pohki lichonü, Ihsanü amünyi nguchinung do? Hütsüta khodesü mah!

¹⁶ Khode nührünü khürü te yochonyinung nengdang nührü jangjang ayurü roh-i kangnang, ajüje nührünü nyiba te asü hiroba amünyi te mahkhang langjüsohba yochonyiba tenye nührü ayurü kangre.

¹⁷ Ta Tsingrangba neng seing! Tunüo nührü khüdupi amünyi yurü thsanye, nührünü khyüchocho adoba lanü nguba yuje la tsü nührü lasih apümnü nyicho.

¹⁸ Nührü amünyi lanü lehcheh amüsaba yurü kangko.

¹⁹ (Nührü sumüzehchonü Ihnü shutsa lahpinü chore.) Khüdupi ayurü kang amümüsa, akhürah ko amükhyu nguchi nengdang nührübürü jücho. Hütsü kyo, nührünü ade amüsaba yurü kang amüsa nguchi nengdang jüng.

²⁰ Khode nührü amünyi yurü licho, nührü amüsa lanü lehcheh licho.

²¹ Nührünü ade shah lümba nguchi nguchichonü nührü tu jingchoro? Hütsüri nguchi amii tsü asüba lile.

²² Ta ade nührü amünyi lanü lehcheh Tsingrangba yurü lile. Nührü ajingcho tsü abi nengdang khakhuchüjüba ko hütsü amii tsü müchangkaba akang tsü lile.

²³ Tunüo amünyi mii tsü asüba; ta Ihsa Abüdongba Khrista Jisu la Tsingrangba amükang jiyü tsü müchangkaba akang lile.