ROMRÜ 3 - AMÜSA BAIBEL (BSI)

¹ Akhang yangpirü michah Jihudarü tu ajingcho alaa liro? Mahkhang müjüp— pehcho tu ajingcho liro?

² Langkhüru la ajingcho khütang lile. Akhudibala, Jihudarü khyang Tsingrangba-nü abi yusi jücho.

³ Ta arüh yola khürü yuje müchokhang, hütsünü Tsingrangba yuje müchorü kangsohnung do?

⁴ Khodesü mah! Atümung arahkhehrü thsanye, Tsingrangba yuje linung. Amüsa yunü yocho kyo: “Nühnü chode nü athsalang tsü ngusohng; Nü yukhade nühnü kohng.”

⁵ Ta Ihsa thsameh nguchiba tsünü Tsingrangba yuje tsü alaa ngusohrü thsakhang, Ihsanü tu yonung? Tsingrangba-nü Ihsa khingchide abi thsamehrü mah-o? (Ihnü hi shutsa lahpinü chore)

⁶ Hütsü roh-i khodesü mah! Tsingrangba tsü yuje müthsakhang, abinü khüta limih yu khanung?

⁷ Ta Ih yuje müchocho khu abi yuje alaa tsidsa abi ahechi kükyüsohkhang, tuepü amünyirü khüdu kyo ade yingcheh Ih mülangjüro?

⁸ Khang, “Atsa chürosohnung tuepü amütsa münguchiro?” Ajüje, nyitsarü khürünü hitari yu yonü Ih mülangjü nyüpmüsehko. Hütsü kyo arüh mülangjünung.

Süsü Amüsa Mühle

⁹ Khang Ihsa Jihudarü yangpirü tenü atsau mah-o? Khodesü mah! Jihudarü ko yangpirü anyüding amünyi zii pohki lilepü Ihnü ngusohko.

¹⁰ Amüsa yunü yocho kyo: “Amüsa süsü mühle, khüdusü mühle,

¹¹ anyichehrü süsü mühle, Tsingrangba yangchirü süsü mühle.

¹² Tsingrangba tenü atümung zako; arüh atümung tsimehko; Atsa nguchirü süsü mühle, khüdusü mühle.

¹³ Arüh linga kong khangthrucho kyo lile; arüh müle athsüyohchünung bichire; Arüh beküp la mürü müyüh lile.

¹⁴ Arüh be chokehchola ko akhanü jeng lile.

¹⁵ Arüh jing shühkhatohnung adsaya;

¹⁶ arüh langla athsangnyang ko aroto lile;

¹⁷ arühnü atbachi lang mümüdhe.

¹⁸ Arüh bete Tsingrangba drüba mühle.”

¹⁹ Ade nyitsarü amütangba atümung yatinung ko limih apüm Tsingrangba yukhaba pohki noronung nengdang,

²⁰ yuzeng la licho lüpcho tsü yuzeng pohki lirüti chah bichinung. Tunüo yuzengnü tu mülacho hütsü nguchichonü Tsingrangba jingte süsü alanglang mükangnung. Yuzengnü nguchiba tsü abinü amünyi shitpahko pü ngusohnung nengdang lile.

Tsingrangba-nü Khüta Ihsa abi te Langsohcho

²¹ Ta ade Tsingrangba-nü apu te nyitsarü langsohba tsü mishako. Hütsü nengdang Mosa yuzeng ko azikehrütinü yuzi jünye, hütsü yuzeng te tu anguchinung mühle.

²² Jisu Khrista chah yudsi khu Tsingrangba-nü nyitsarüti langjüre. Khrista chah yudsirü atümung te Tsingrangba-nü hita nguchire, tunüo tu papa mühle:

²³ Atümungnü amünyi shitpahko ko Tsingrangba ahechi müchire.

²⁴ Ta Tsingrangba amükang jiyünü lehchehbong Jisu Khrista khu nyitsarü atümung abi te langjücho.

²⁵ Abi süchonü abi chah arüh yudsi khu arüh mülang pehji kangnung nengdang, Tsingrangba-nü abi amübü jücho. Abi amüsa ngusohnung nengdang Tsingrangba-nü hütsüta nguchicho.

²⁶ Atsicho la abinü rangchocho ko nyitsarüti münyi mükhichicho; ta adelü abi amüsaba ngusohnung abinü arüh münyiti khichire. Hütsüta Tsingrangba-nü apusü amüsaepü ngusohre ko Jisu chah yudsirü müipi abinü langjüre.

²⁷ Akhang, tu nengdang Ihsa mülahnung? Tu mülahnung mühle! Ko hütsü nengdang tu yuzi liro? Ihsanü yuzeng bichicho ngang mah-o? Mah, ta Ihsanü yudsichonü.

²⁸ Hütsünü nyüh khüdu yuzengnü mülacho bichichonü mah, ta yudsi khu dunü Tsingrangba te langsohre.

²⁹ Mahkhang Tsingrangba tsü Jihudarü yo du mah-o? Abi tsü yangpirü Tsingrang mii mahrü do? Ho, yangpirü Tsingrangsü lile.

³⁰ Tsingrangba tsü khüdu du, abinü Jihudarü arüh yudsi aichi langjünung, ko yangpirü arüh yudsi khu langjünung.

³¹ Hi adüzü hiba yudsinü Yuzeng tsü adeng kangjürü mah-o? Khodesü hütsüta mah; Ihsanü yuzeng tsü drengdrengsohre.