ROMRÜ 2 - AMÜSA BAIBEL (BSI)

Tsingrangba Yukhaba

¹ Jünirüti, nührünü aparü yu kharü do? Nührü süsü thsanye, mülang pehba mühle. Tunüo nührünü aparü yu khapü arühnü nguchiba tsü nührübürünü nguchide, nührü mülangjüre.

² Hiri kyo nguchirü Tsingrangba-nü yukhaba tsü athsalangepü Ihsanü müdhele.

³ Ta jünirüti, nührünü aparü yukhaba nguchi akyokyo tsü nührünü nguchire. Nührünü Tsingrangba yukhaba lanü tsiphunungepü lümrü do?

⁴ Mahkhang nührünü abi amüi amülah, arahseh ko arangcho tsü mükhimüngure. Tsingrangba tsü amüiepü nührünü müdhele, tunüo abinü nührü lasih thsamülasohnyüre.

⁵ Ta nührü lasih azi ko amüküp thsachonü, Tsingrangba rihlong chüroba ko yuje yukhaba misha nyümong nührü akhingchi tsü alaa du adiu külüpre.

⁶ Tunüo nyitsarü müipi palu nguchi aichi Tsingrangba-nü jiyünung.

⁷ Khürünü mütozah atsa nguchinü ahechi, adhichi ko müsüba akang yangchire; arüh khyang Tsingrangba-nü müchangkaba akang jünung.

⁸ Ta atürütseh ko yuje mübichirü michah Tsingrangba-nü abi rihlong chüroba ko awah jünung.

⁹ Amütsa nguchirüti akhu Jihudarü ko yangpirüti atümung khyang chongcha roto linung.

¹⁰ Ta atsa nguchirüti akhu Jihudarü ko yangpirüti atümung khyang Tsingrangba-nü ahechi, adhichi ko yangtsa jünung.

¹¹ Tunüo Tsingrangba-nü tsah müdhingre.

¹² Yuzeng mülipü amünyi shitpahrü atümung yuzeng müzehpü changnung; ko yuzeng pohki amünyi shitpahrü atümung yuzengnü yukhanung.

¹³ Tunüo yuzeng yuchichonü Tsingrangba jingte amüsa kangrü mah, ta yuzeng bichirü langjünung.

¹⁴ Yuzeng mülirü yangpirüti ayahnü yuzeng nguchiti nguchide, yuzeng tsü mülinye hütsü arüh yuzeng kangre.

¹⁵ Arüh sayingnü yuzeng tsü arüh lasih la thrah licho ngusohre. Arüh lümlongnüsü hi yuje-epü ngusohre, tunüo arüh lümlongnü khüpipi arüh mülangjürü ko khüpipi arüh khümre.

¹⁶ Hütsüta, Ihnü thsingyuba Yuse Atsanü yocho müjang, Tsingrangba-nü Jisu Khrista khu apüm arang lümlong hütsü nyümong yukhanung.

Jihudarü ko Yuzeng

¹⁷ Nührübürü khüta? Nührü jangjang Jihudarüepü dsire; nührünü yuzeng chah dümpipü Tsingrangba nengdang müthsehre;

¹⁸ Tsingrangba-nü tu nguchinyüro hütsü nührünü müdhele, ko tu athsalang hütsü throchehnung nührünü Yuzeng lanü nyichoko;

¹⁹ nührü tsü anahtohrü nengdang langnürü, ko amala lirü nengdang atsingse,

²⁰ akakarü thülarü ko amümüdherü nengdang adorüepü nührünü müdhele. Yuzeng la amüdhe ko yuje ajeng zehlepü nührünü tsüple.

²¹ Nührünü aparü te dore, tuepü nührübürü müdoro? Nührünü, “Tüfü” pü thsingyure, ta nührülü müführü mah-o?

²² “Nahtrahnaxeng tübichi” pü nührünü yore, ta nührülü nahtrahnaxeng mübichirü mah-o? Nührünü kyothri thrünyire, ta amübükuh müzührü do?

²³ Tsingrangba yuzeng nengdang nührünü müthsehre, ta yuzeng thsangnyangnü abi khyang ashah mühirojürü do?

²⁴ Amüsa yunü yore, “Nührü Jihudarü thsacholanü yangpirünü Tsingrangba mütsa chore.”

²⁵ Nührünü Yuzeng bichikhang, nührü müjüp-pehba tsü amii lile; ta nührünü Yuzeng mübichikhang, mümüjüp-pehcho atsau.

²⁶ Mümüjüp-pehba yangpirü khüdunü Yuzengnü mülacho bichikhang, abi amüjüp-pehrü khüdu roh-i Tsingrangba-nü mükhichinung do?

²⁷ Nührü yuzeng linye ko müjüp-pehnye ko yangpirü arüh shutsa la mümüjüp-pehnye, arühnü yuzeng bichichonü, arühnü nührü mülangjünung, tunüo nührünü yuzeng tsü thsangnyangre.

²⁸ Yujenü müjüp-pehba yuje Jihudarü sü liro? Amilang nahnü ngu shutsa müjüp-pehba tsü Jihudarü mah.

²⁹ Ta, yuje Jihudarü tsü, sü ayonglang lasiking la müjüp-pehro hütsü yujeba Jihudarü tsü lile. Ko hi tsü athrahcho yuzengnü mah, ta anbü nguchi khu lile. Hitari nyitsarü anengse tsü nyitsarü khunü mah, ta Tsingrangba chahnü lile.