ROMRÜ 16 - AMÜSA BAIBEL (BSI)

Salüm Yu

¹ Ihsa Jünilarü Foebe, sü Cenkrea Lithro la dikehrü liro abükyü nengdang Ihnü yuzi jüre.

² Yudsirü nguchi athsalang roh-i nührünü Abüdongba nengla abükyü khyüchoung, ko nührü chahnü tu arüku dhsütahnang desahng; tunüo abükyünü nyüh adrong troko ko Ihsü dee troko.

³ Khrista Jisu la Ite müjang dikehrü Priscila ko Aquila nyüh te salüm young.

⁴ Arühnü I nengdang arüh akang mii jücho. Hütsünü Ihnü du mah, ta yangpirü lithroti atümungnü arüh te dee künyangre.

⁵ Ko arüh kuh la shibülungba Lithro tesü salüm young. Asia lih la akhu Khrista khyüchoba Ihnü müiba shangrü Efaenetus te salüm young.

⁶ Nührü nengdang khütang nguchitpü Mary te salüm young.

⁷ Ajünirü ko Ite müjang rangyohrüti Andronikus ko Junias nyüh te salüm young; arüh riwürüti yola anengkhong, ko I müngu arüh khristan kangcho.

⁸ Abüdongba la Ihnü müiba shangrü Ampliatus te salüm young.

⁹ Khrista la müjang dikehrü Urbanus ko Ihnü müiba shangrü Stachys nyüh te salüm young.

¹⁰ Khrista te longlangcheh liba nyitsarü Apelles te salüm young. Aristobulus kukhi te salüm young.

¹¹ Ajünirü Herodion ko Narcisus kukhi la lirü te salüm young.

¹² Abüdongba dikehrü Trefaena ko Trefosa, ko Abüdongba nengdang khütang nguchibong Ihnü müiba shangrü Persis te salüm young.

¹³ Abüdongba dikehba la anengkhong Rufus, ko atpa sünü lede atsurü khüdu roh-i Ih dikehcho, anyüh te salüm young.

¹⁴ Asenkhritus, Flegon, Hermes, Patrobas, Hermas, ko arüh te lirü jünirüti atümung te salüm young.

¹⁵ Filologus ko Julia, Nereus ko anilatpü Olympas ko arüh te lirü Tsingrangba tsurüti atümung te salüm young.

¹⁶ Nührü khüdunü khüdu te amüila salüm jütaang. Khrista Lithro apümnü nührü te salüm müdhesohre.

Achangka Athülaba

¹⁷ Jünirüti, achangnah chürosohrüti ko bürü yudsi la müthikehsohrü ko nührünü nyichocho adoba nyümrüti shulüm müzahngpü Ihnü nührü te thsüchire. Arüh tenü za lieng.

¹⁸ Hitari nguchirü tsü Ihsa Abüdongba Jisu Khrista dikehrü mah, ta arüh mibong nengdang du lile. Ko arüh aküna ko akichoba yunü achomükeh nyitsarü kihyochüre.

¹⁹ Nührü ayochonyicho atümungnü yuchiko, hütsü nengdang Ih künyangre. Nührü atsa la lümzeh ko amütsa la khoto lisohnyüre.

²⁰ Ko tbachijüba Tsingrangba-nü nührü jing pohki Satan zah dhrümnahsohnung. Ihsa Abüdongba Jisu achomang nührü te lieng.

²¹ Ite müjang dikehrü Timoti ko ajünirü Lucius, Jason, ko Sosipater-rünü nührü te salüm müdhesohre.

²² Ih, Tertius, hiba vathrah thrahbanü nührü yang salüm müdhesohre.

²³ I shikuh Gaius, sü kuh la Lithro shibülungro, abinü nührü te salüm müdhesohre; yangdi thsi zahkehbong Erastus, ko Jünirü Quartus nyühnü nührü te salüm müdhesohre.

²⁴ (Ihsa Abüdongba Jisu Khrista achomang nührü atümung te lieng. Amen)

Anengse Dangkhidangnang

²⁵ Ihsanü Tsingrangba khyang ahechi jünung! Jisu Khrista Yuse Atsa Ihnü thsingyucho ko papade shang adrong rang licho arangyu mishachonü, abinü nührü yudsi la drengdrengsohnung kohle.

²⁶ Ta ade, azikehrünü thrahcho khu hütsüba yu tsü misha lile; ko müchangkaba Tsingrangba yuzeng khu, atümungnü yochonyi yudsisohnung hütsü yucho atümung khyang müdhesohko.

²⁷ Tsingrangba, sü lüpcho la apisa liro, Jisu Khrista khu abi te müchangkapü ahechi thsaang! Amen.