ROMRÜ 15 - AMÜSA BAIBEL (BSI)

Aparü Künyangsohng

¹ Ihsa yudsi la suzehrütinü sumüzehrü bhamüling hitronung athsalang. Ihsabürü künyangnung tünguchi.

² Ta, Ihsanü ajünirüti arüh yudsi la suzehsohnung, ko tsasohnung nengdang arüh künyangsohng.

³ Tunüo Khrista-nü apu künyangnung tu münguchi, ta amüsa yunü yocho kyo, “Nü chah phungkehba müthsamünyü tsü I chah küroko.”

⁴ Amüsa yula Ihsa khyang jücho arangcho ko rezehcho khu alongdi ngunung nengdang Ihsa te donung thrahcho lile.

⁵ Nührünü yuva khüdu thsapü Tsingrangba ko Ihsa Abüdongba Jisu Khrista sesohnung

⁶ arangcho ko rezehsohba Tsingrangba-nü nührü khüdunü khüdu te Jisu Khrista kyo lasih khüdu thsasohng.

Yangpirü Nengdang Yuse Atsa

⁷ Hütsüeko, Khrista-nü nührü khyüchocho kyo, Tsingrangba ahechi nengdang khüdunü khüdu khyüchoung.

⁸ Tunüo Ihnü nührü te yore, Jisu Khrista-nü Jihudarü dikehba tsü Tsingrangba yuje tsü ngusohnung, abinü jümürü te nyengchocho tikehsonung

⁹ ko yangpirünü mii Tsingrangba yanglilüm hechisohnung nengdang licho. Amüsa yunü yocho kyo: “Hütsünü yangpirü yola Ihnü nüh senung; ko Ihnü nü nengsekhi thsanung.”

¹⁰ Thali abinü yore, “Yangpirüti, Tsingrangba nyitsarü yola künyangtaang!”

¹¹ Ko thali, “Abüdongba seing, yangpirü atümung; Atümungnü abi seing!”

¹² Adesü Isaya-nü yore, “Yangpirüti michah yangthsanung, Jesse ra lanü chüronung; Ko arüh alongdi abi chah linung.”

¹³ Anbü Amüsa zii khu nührü alongdi zinung shulüm, alongdi Tsingrang-nü nührü yudsi khu akünyang ko atbachinü nührü jengsohng.

Mithrungmizi Thrahnungthsa Paul Yuzi

¹⁴ Jünirüti, atsanü nührü jeng lile, amüdhe apüm lile ko nührü khüunü khüu thsüchitachehlepü Ihnü dee longlangre.

¹⁵ Ta hiba vathrah la Ihnü nührü te kepüba khiyu khürü nengdanglü Ihnü dee zinü thrahre. Ihnü yangpirüti nengdang nguchinung Tsingrangba-nü Jisu Khrista dikehrü kangnung achomang jüchonü I müci mülahre.

¹⁶ Yangpirüti tsü Tsingrangba jingte akhyüchochehba amübü khüdu, Anbü Amüsanü müsachehjüba thsanung nengdang, Yuse Atsa thsingyubala Ih bebürü khüdu kyo dikehcho.

¹⁷ Hütsünü, Jisu Khrista la Tsingrangba dikehba nengdang Ih mülahnung kohle.

¹⁸ Tsingrangba te yangpirüti ayocho nyisohnung Khrista-nü Ih khu tu nguchicho hütsü nengdang du Ihnü müci mülah chore. Abinü hütsü yu ko nguchi,

¹⁹ thsayahiya ko anyemüyangnung zii ko Tsingrangba Anbü zii khu nguchire. Hütsüta, Jerusalem lanü Ilerikum chii tsehnü, Ihnü Khrista nengdang Yuse Atsa ajeng thsingyuko.

²⁰ I nahdhingkeh tsü bürünü dikeh licho la thsakehlinung mah, ta khüdederü Yuse atsa müyuchiepü liro hütsürila thsingyunung lümchoba lile.

²¹ Amüsa yunü yocho kyo: “Sürü te abi nengdang müyocho arühnü ngunung, ko sürünü müyuchicho arühnü nyichehnung.”

Rom Xodhingnung Paul Lümchung

²² Hütsünü Ih adrongpi nührü yanglang ronung yaticho.

²³ Ta ade hiri limih la I nguchi thümchonü, ko kang adrong nührü shirünung lümtoh lichonü,

²⁴ Ihnü ade nührü shirünyüre. Ih Spain lang wüde nührü shirünyüre, ko nührü yola azachah mungpü hütsülang wünung nührü khyang trosohnyüre.

²⁵ Adelü, amüsarü dikehnung nengdang Ih Jerusalem lang würe.

²⁶ Tunüo Macedonia ko Akaia la Lithrotinü Jerusalem la amüsarü yola ailümrüti tronung amübü jünung rungnüm lile.

²⁷ Hütsü arüh jangjang lümchehcho; ta arühnü tronung tsü athsalang lile. Tunüo Jihudarünü anbü amüwa tsü yangpirü te changtarü tsü, yangpirünü kuthsinü Jihudarü tronung tsü athsalang.

²⁸ Khode Ihnü hiba nguchi thüm adhrichehcho thsi tsü arüh khyang jopehnang, Ih Spain lang shemüsunung, ko langla nührü xodhingnung.

²⁹ Ih khode nührü yang ronang, Khrista chahnü amüwa ajeng hironungepü Ihnü müdhele.

³⁰ Jünirüti, Ihsa Abüdongba Jisu Khrista-nü ko Anbünü jüba amüinü Ihnü nührü te kihchire: Tsingrangba te I nengdang dangkhidangnang trotaang.

³¹ Judea la müyudsirüti kheh lanü Ih khümchonung ko Jerusalem la I nguchi tsü hütsüla amüsarütinü khyüchochehnung shulüm dangkhidangnangjüng.

³² Tsingrangba lümcho thsakhang, künyangseh Ih nührü yanglang ro kyahshangnü nührü xodhingnung.

³³ Tbachijüba Tsingrang nührü atümung te lieng. Amen.