ROMRÜ 14 - AMÜSA BAIBEL (BSI)

Ajünirü Yu Tükha

¹ Yudsi la sumüzehrü khüdu nührünü künyang khyüchoung, ta abi lümcho nengdang türehta.

² Nyüh khüdu ayudsinü masü tsunung müzongre, ta yudsi la sumüzehba khüdulü singvarova du tsure.

³ Sünü masü tsuro abinü amütsuba tümükhimüngu; ko sünü mütsuro abinü masü tsuba yu tükha; tunüo Tsingrangba-nü abi khyüchoko.

⁴ Bürü dikehrü khüdu yukhanung nüh süo? Abinü kohnung mahkhang mükohnung lümchehnung tsü abi abüdongba tsü lile. Ko abinü kohnung, tunüo Abüdongba-nü abi khyang kohsohnung kohle.

⁵ Nyüh khüdunü nyümong khüdu tsü apa nyümongti tenü atsauepü lümre, ta aparü khüdunü nyümongti atümung sakoepü lümre. Nyitsarü müipinü palu lasih la longi tsüpnungbae.

⁶ Sünü nyümong khüdu nengdang khütang lümro, abinü hütsü Abüdongba nengdang lümre; sünü masü tsuro abinü hütsü Abüdongba nengdang tsure, tunüo abinü hütsü nengdang Tsingrangba khyang anengse jüre. Sünü mütsuro abinü hütsü Abüdongba nengdang mütsure, ko abinü Tsingrangba khyang anengse jüre.

⁷ Ihsa süsü abürü nengdang du akang mülire, sünüsü palu nengdang du müsüre.

⁸ Ihsa akang likhang, hütsü Abüdongba nengdang akang lire, ko Ihsa sükhang, hütsü Abüdongba nengdang süre. Hütsüeko, Ihsa akang linye mahkhang sünye, Ihsa Abüdongba yo.

⁹ Tunüo akang lirüe asürü nyüh michah Abüdongrü thsanung nengdang Khrista sücho ko kanglicho.

¹⁰ Khang, singvarova du tsuba, nüh tuepü nü jünirü yu kharo? Ko masü tsuba, nüh tuepü nü jünirü mükhimünguro? Ihsa atümung Tsingrangba yukhaba bete yanung.

¹¹ Tunüo amüsa yunü yore: “Ih akang liba Tsingrangba, Abüdongba-nü yore, Nyitsarü atümungnü I jingte mükhukehnung, Ko nyitsarü atümungnü Ih Tsingrangbaepü nyengchonung.”

¹² Ihsa müipi Tsingrangba jingte palu nengdang lalingnung.

Nü Jünirü Tüshohjosoh

¹³ Hütsüeko Ihsanü khüunü khüu yu mükhanung. Ta nü jünirü müthikehnung mahkhang amünyi la shohjonungthsa khodesü münguchinung dhrongchehng.

¹⁴ Tsuyongnung tusü ajangjangthsa amümüsa mühle ko Abüdongba la Ihnü tsüple; ta nyüh khüdunü tsuyongnung khürü amümüsaepü lümkhang, abi nengdang hütsü amümüsa kangre.

¹⁵ Nühnü tsucho langonü nü jünirü müthikehsohkhang, hütsü amüinü nguchirü mah. Nühnü tsuyongba khu nyüh khüdu sü nengdang Khrista sücho abi tüchangsoh.

¹⁶ Nühnü atsaepü khichiba khu nengchü tühirosoh.

¹⁷ Tunüo Tsingrangba yanglih tsü tsuba yongba nengdang mah, ta Anbü Amüsanü jüba amüsaba, atbachi ko akünyang lile.

¹⁸ Ko khode nyüh khüdunü hütsüta Khrista dikehnang, abinü Tsingrangba künyangsohre, ko nyitsarünü khyüchore.

¹⁹ Hütsüeko, tunü atbachi chürosohro ko khüunü khüu rezehsohro, hütsüri tsü Ihsanü bichinung.

²⁰ Tsuyongnung thsacholanü Tsingrangba nguchi tüthsangnyangjü. Tsuyongba apüm amüsa lile, ta tsuyongba khüinü nyüh khüdu amünyi la shohjosohro, hütsü tsunung amüthsalang.

²¹ Athsalang nguchi tsü shuh mütsunung, yongkha müyongnung, mahkhang nü jünirü shohjonungthsa tusü münguchinung.

²² Hütsünü, hi nengdang nühnü tu nyichehro, hütsü Tsingrangba nühjü kahla yohpüng. Sünü abürü nguchi tsü athsalangepü lümro abi akünyangnung.

²³ Ta abinü lümxü tsukhang, Tsingrangba-nü mülangjüre, tunüo abi nguchi tsü yudsi chah müdümpi. Ko yudsi chah müdümpiba apüm tsü amünyi.