ROMRÜ 12 - AMÜSA BAIBEL (BSI)

Tsingrangba Dikehba la Akang

¹ Hütsünü, Jünirüti, Tsingrangba yanglilüm amülah khu Ihnü nührü te kihchire: nührünü palu fü akang mübü khüdu, amüsa ko Tsingrangba-nü khyüchochehnungthsa mübüng. Hiba hi nührünü mübünung yuje amübü tsü lile.

² Hiba limih saying roh-i nührü tüli, ta nührü lasih asi kangchinü Tsingrangba khyang mülichisohng. Hütsüde, Tsingrangba lümcho khüi atsa ko abinü künyangnungthsa ko adekheng liro, hütsü nührünü müdhenung.

³ Ko Tsingrangba achomang jiyü I khyang jo lichonü Ihnü nührü atümung te yore: Nührünü abürü nengdang alaa dinü tülüm. Ta Tsingrangba-nü nührü khyang jücho yudsi aichi abürü nengdang longlüm lümdhing.

⁴ Ihsa füla lohla adrong lile, ko hiri lohla atümung anguchi papa lile.

⁵ Hütsü kyo, Ihsa adrong linye, Khrista la füpüm khüdu du lile, ko Ihsa füpüm khüdula lohla papanü khüdunü khüdu te chungkehta lile.

⁶ Hütsünü Tsingrangba-nü Ihsa khyang jücho achomang aichi Ihsa jiyü papa tsü bichibae. Choyohba jiyü thsakhang Ihsa yudsi aichi choung;

⁷ dikehba jiyü thsakhang, Ihsanü dikehng; donung jiyü thsakhang, Ihsanü doung;

⁸ thsüchinung jiyü thsakhang, Ihsanü hütsüta nguching. Sünü jüro abinü lümkhungnü jüng; sünü thsaro abinü rahtah thsaang; sünü yanglilüm nguro abinü künyangsehnü ngung.

⁹ Akhürah müzehpü amüi lieng. Khüi amütsa hütsü thrünyieng; khüi atsa hütsü yümpung.

¹⁰ Jünirü roh-i khüdunü khüdu te müitaang, ko khüdunü khüdu te jengreng jütanungla longphieng.

¹¹ Müdserepü müküp nguching. Lasih apümnü khakhuchüjo Abüdongba dikehng.

¹² Alongdila künyang, akhingchi la rangchoung, ko lede dangkhidangnang.

¹³ Jünirü dhsütah la changtaang ko shirü te amüi ngung.

¹⁴ Nührü dhsümthserü müwajüng; tüchokehchola, ta müwajüng.

¹⁵ Künyang lirü te künyangtaang, atrarü te tratrotang.

¹⁶ Atümung te kehta lieng; tümüthseh, ta alonglümrü te shangrü thsaang. Nü müdhecho la tülonglang.

¹⁷ Sü khyangsü amütsa müli amütsa tüjü, atümungnü tsalecho nguchinung müküpm.

¹⁸ Atümung te yangtsa la linung akohchonü müküpm.

¹⁹ Jünirüti, khodesü rüh tüyang, ta Tsingrangba rihlong chüroba khyang pehjüng. Tunüo amüsa yunü yore, “Rühyangba I yo, Ihnü rühyangjünung pü Abüdongba-nü yore.”

²⁰ Hütsü müli, “Nührü rorüh yangkhang, yangtüpm; xokhang, abi khyang tieng; tunüo nühnü hütsüta nguchide abi shahsehnung.”

²¹ Amütsa khyang nüh tükohsoh; ta atsanü amütsa tsü kohsohng.